Zhɛrɛmi 28 - Ghena ta Shala

Yɛ Zhɛrɛmi le nde mɛ ŋkwa Hananiya

¹ Ma te va shɛnyɛ, geze ta ŋkɛ te kwa wəfaɗe ta va ta Sɛdɛsiyas, meghea ka Zhəwda mbe meghe, mbe kwa mcɛfe ta tere ne, ma ke nde mɛ ŋkwa Hananiya, wəzege ta Azəwr, nde Gabawon sha 'ya mbe ghɛa Mahwətə kwa kema ta ka dzeghe Shala ba'a mbeli tagha pɛtɛ:

² «Wa nya ghena nya geze Mahwətə nde berete, Shala ta ka Israyɛl nya: ‹'Ya kateɓele sheghwəa meghea ka Babilone nya te welɛ va gheyɛ kala sla kewəza.

³ Tene va bake kape kape ne, katezhɛne wəshi kemene slene mbe ghɛa Mahwətə nyi fəghe meghe Nabəkodonozor kajive Babilone 'ya kase teke.

⁴ Tsagha shɛ tezhɛne yɛ Yekoniya, wəzege ta Zhowakim, meghea ka Zhəwda le ka Zhəwda nyi kefəghe geva kajive Babilone 'ya kase teke. Kwa nza ŋkɛ ne, 'ya kateɓele sheghwə nya vate meghea ka Babilone te welɛ va gheyɛ kala sla kewəza. 'Ya Mahwətə nde gezete.›»

⁵ Ma ke nde mɛ ŋkwa Zhɛrɛmi zhɛnete nda ke nde mɛ ŋkwa Hananiya kwa kema ta ka dzeghe Shala ba'a mbeli nyi mbe ghɛa Mahwətə pɛtɛ:

⁶ «Amɛn! Menete Mahwətə tsagha shɛ! Yipəyi ghena nyi gezete nyi na ŋkɛ kwa ba'a zhɛneke yɛ wəshi kemene slene mbe ghɛa Mahwətə le mbeli nyi kefəghe geva pɛtɛ kajive Babilone ŋkɛ kase teke.

⁷ Ama fate ghena nya tegeze nya 'ya kaŋa ŋa ba'a kaŋa mbeli nyi teke pɛtɛ:

⁸ Ma ka mɛ ŋkwa nyi kemenehwe slene ta nci mpelɛa ke 'ya ba'a mpelɛa ke gha vəashi ne, nahe hɛ kese kageze nda ghena ta mpa, ndiremi ba'a ba ke hɛɗi kwele kwele ba'a ke hɛɗia meghe nyi jama jama.

⁹ Ama kegezete ghena ta kwelɛŋe kwete nde mɛ ŋkwa ne, tsema nza mbeli kaɗepe Mahwətə nde ghweneke kaganda wa? Nda ghena nyi gezete ŋkɛ kayipəyi geva kwa nda tenza mbeli kaɗepete.»

¹⁰ Laŋe nde mɛ ŋkwa Hananiya kelemte sheghwə nya te welɛ va nde mɛ ŋkwa Zhɛrɛmi kala sla kewəza, hwepa'a ɓelemte.

¹¹ Kwa sebe ta ŋkɛ, ma ke nde mɛ ŋkwa Hananiya kwa kema ta mbeli nyi tagha pɛtɛ: «Wa nya ghena nya geze Mahwətə nya: ‹Tene va bake kape kape ne, 'ya kateɓele sheghwə nya veyi Nabəkodonozor, meghea ka Babilone te welɛ va pɛtɛa hwelefefi kala sla kewəza.›» Ntəŋə nde mɛ ŋkwa Zhɛrɛmi dzeghwanyɛ.

¹² Kwa sebe ta nya ɓelemte sheghwə nya kese te welɛa nde mɛ ŋkwa Zhɛrɛmi nde mɛ ŋkwa Hananiya, ma ke ghena ta Mahwətə gezeke nda geva ke Zhɛrɛmi:

¹³ «Kwiɗi geze nda ke Hananiya: Wa nya ghena nya geze Mahwətə nya: ‹Ma kwa nza ŋkɛ kwa sheghwə sheghwə yaɓelemte na ne, kwa lɛ lɛ yateve na te ŋkwa ŋkɛ.›

¹⁴ Kwa nza ŋkɛ ne, wa nya ghena nya geze Mahwətə nde berete Shala ta ka Israyɛl nya: 'Ya kateve kwa lɛ lɛ te welɛ va hwelefefi nyi te hɛɗi nya pɛtɛ. Mbe dzeve ta Nabəkodonozor, meghea ka Babilone tenza hɛ. Pa le wəshi keseɗa nyi hwa gamba teve 'ya mbe dzeve ta ŋkɛ.»

¹⁵ Ma ke nde mɛ ŋkwa Zhɛrɛmi sha nde mɛ ŋkwa Hananiya: «Fate Hananiya: keghwenakɛ ŋa Mahwətə we. Gha nde ghwete mbeli nyi kayɛ tseŋwə.

¹⁶ Wa nya ghena nya geze Mahwətə nya gɛ: Kateŋkamte ŋa 'ya te hɛɗi nya. Katemte na ɓeshi kava, kwa nza ŋkɛ nahe na ghweteyite mbeli yitea ɗema ghena ta Mahwətə.»

¹⁷ Mtiwə nde mɛ ŋkwa Hananiya te kwa mberefaŋe ta tere te va shɛnyɛ.