Zhɛrɛmi 26 - Ghena ta Shala

Mte Zhɛrɛmi yaɗe mbeli

¹ Temə vireɗi kwa sebe ta nya dzembe meghe Zhowakim, wəzege ta Zhoziyas, meghea ka Zhəwda, ma ke ghena ta Mahwətə gezeke nda geva ke Zhɛrɛmi:

² «Wa nya ghena nya geze 'ya Mahwətə nya: kwiɗi slete ŋa te ŋwela ta ghɛa Shala. Geze nda ghena ke mbeli nyi kese mbe meleme nyi mbe Zhəwda kezha gwəɗəŋə yitea 'ya ki ghɛa ɗa. Pɛtɛ geze nda ghena nyi gezave ŋa 'ya na ke hɛ, kaɗema kantamte kwete hwe.

³ Nda kwete katefate hɛ ba'a katempiyi dzeve hɛ kwetɛ kwetɛa nci va dzeghwa kwa ndiremia nci. Ma tsagha, katesərə wəsə kwa ndiremi nya zəzə 'ya kamene nda ke hɛ va slene nyi ndiremia nci 'ya.

⁴ Ma pa na sha hɛ gɛ: Wa nya ghena nya geze Mahwətə nya: ‹Ma keɗema yɛ keveyite mehele yitea zele wəshi nyi tekete ŋayɛ nyi 'ya,

⁵ ma keɗema yɛ fa ghena nyi geze ka mene slene ta ɗa nyi kaka mɛ ŋkwa nyi ghweneke ŋayɛ nyi 'ya kevə kevə, kaɗema yɛ kese kafa nda ghena ke hɛ ne,

⁶ ma tsagha gɛ, kateŋzlamte ghɛ nya 'ya kala nya ŋzlamte Silo 'ya ba'a katezhɛre meleme nya 'ya kawəsə nya bezla ŋkwa mbeli nyi te hɛɗi pɛtɛ le.›»

⁷ Ka dzeghe Shala, ka mɛ ŋkwa ba'a mbeli nyi tagha pɛtɛ kafa ghena ta Zhɛrɛmi te və nya zlape ghena shɛhɛ ŋkɛ te ŋwela ta ghɛa Mahwətə.

⁸ Ma kwa kiɗimte zlape nda ghena nya gezave nda Mahwətə Zhɛrɛmi ke mbeli pɛtɛ ne, rape ka dzeghe Shala, ka mɛ ŋkwa ba'a mbeli nyi tagha pɛtɛ keseve, ma ke hɛ: «Nahe na kemte!

⁹ Wa raberə geze na: ‹Kala Silo teŋzla ghɛ nya ba'a tetaze meleme nya, kaɗema wəndə katenza mbe›, a pa te sləa Mahwətə wa?» Pɛtɛ mbeli nyi mbe ghɛa Mahwətə tseneyite geva yitea Zhɛrɛmi.

¹⁰ Ma kwa fate wəsə nya kemenete geva mbelia jama ta ka Zhəwda ne, ŋkeɗe hɛ same kwa ghɛa meghe kadzembe ghɛa Mahwətə, kantishɛnji mɛa mɛnɛfɛa mɛ degha ta ghɛa Shala.

¹¹ Ma ke ka dzeghe Shala le ka mɛ ŋkwa sha mbelia jama ba'a sha mbeli pɛtɛ: «Wərə mte wəndə nya, kwa nza ŋkɛ nahe ŋkɛ kegezete ghena kwa ndiremi te Zhɛrəzalɛm kafefa yɛ le sleme ta ŋayɛ.»

¹² Ama ma ke Zhɛrɛmi sha mbelia jama ba'a sha mbeli pɛtɛ: «Mahwətə nde ghwenakɛ ɗa kageze ghena nyi fate nyi yɛ pɛtɛ te ghɛ nya ba'a te meleme nya.

¹³ Ma tsetsenya gɛ, zhɛrete mə dzeghwa ta ŋayɛ le slene ta ŋayɛ. Fa mə ghena ta Shala Mahwətə ta ŋayɛ. Ma tsagha, katebelewə ghwene ŋayɛ ndiremi nya gezete ŋkɛ ŋkɛ.

¹⁴ Ama 'ya ne, mbe dzeve ta ŋayɛ 'ya. Menete mə wəsə nya nakɛ yɛ megela ba'a tiɗiɗi le 'ya.

¹⁵ Ɗepete mə megela, ma kepeslekɛ ɗa yɛ ne, kwa ghəa ŋayɛ, kənəa meleme nya ba'a kənəa mbeli nyi mbe pɛtɛ tenza mte ta wəndə nya ɗema fete ve, kwa nza ŋkɛ Mahwətə nde ghweneke ɗa kaganda kageze ŋayɛ ghena shɛhɛ pɛtɛ.»

¹⁶ Ma ke mbelia jama le mbeli nyi tagha pɛtɛ sha ka dzeghe Shala ba'a ka mɛ ŋkwa: «Wəndə kepesle wəndə nya we, kwa nza ŋkɛ ne, te sləa Shala Mahwətə ta ɓəmə gezete ɓəmə ghena ŋkɛ.»

¹⁷ Pelɛhetɛme kweci mbelia jama nyi te hɛɗia shɛ sate te ŋkwa, ma ke hɛ sha mbeli nyi ketsenete geva pɛtɛ:

¹⁸ «Te vəa Ɛzɛkiyas, meghea ka Zhəwda ne, kwete nde mɛ ŋkwa nya nza sləa Mishɛ, kande Morɛshɛt ya shɛ. Ma ke sha ka Zhəwda pɛtɛ: Wa nya ghena nya geze Mahwətə nde berete nya: ‹Kawəve kwa wəza wəza tenza Siyon, kakwəfi tenza Zhɛrəzalɛm ba'a kagamba tenza ghweme ta ghɛa Mahwətə.›

¹⁹ Nahe yɛ meghe Ɛzɛkiyas le ka Zhəwda kepeslekɛ nde mɛ ŋkwa Mishɛ na? Ewə, ama nahe Ɛzɛkiyas kehawete nda hawe ke Mahwətə, kamenete wəsə nya kegweɗakwe nda wənə. Vatse belewəmte ndiremi nya gezete Mahwətə kave te hɛ ŋkɛ. Ama mbəhə kepeslekɛ wəndə nya gheɓəmə ne, beze ghena nya wəba yavate mə te ghəa ɓəmə.»

Zhowakim kapesle nde mɛ ŋkwa Əwriya

²⁰ Ma vəa ŋkwa shɛ ne, kwete wəndə nya nza sləa ŋkɛ kaƏwriya, wəzege ta Shemaya, kande Kiriyat-Yɛyarim ya shɛ. Ntake ŋkɛ kageze ghena te sləa Mahwətə te melemea shɛ ba'a hɛɗia shɛ kala Zhɛrɛmi.

²¹ Pa yɛ meghe Zhowakim le ka sewajɛa ŋkɛ ba'a ka mene slene ta ŋkɛ fate ghena nya gezete Əwriya. Ntake meghe kazele hweŋkwa kepesle ŋkɛ. Ma kwa fate Əwriya, pa ghazlənə zhɛte nda, prɛhe ŋkɛ hwɛnyɛ kadzawa Ɛzhipte.

²² Ama pa meghe Zhowakim ghwenakɛ mbeli kadzawa Ɛzhipte: yɛ Ɛlnatan, wəzege ta Akbor le kweci mbeli.

²³ Pa hɛ keseke Əwriya same kwa Ɛzhipte, keleghe nda ŋkɛ ke meghe Zhowakim. Pa ŋkɛ peslekɛ ŋkɛ ba'a negheyi wəndə kemte mtea ŋkɛ kwa kwele nya ɗema zləvə te.

²⁴ Ama Zhɛrɛmi le ŋa ŋkɛ ne, Ahikam, wəzege ta Shafan nde yakɛ ŋkɛ, te zlaɓa ta ŋkɛ ɗema mbeli kendeke nda Zhɛrɛmi ke mbeli nyi keɗe mte ta ŋkɛ.