Zhɛrɛmi 23 - Ghena ta Shala

Mbelia jama nyi keɗema kaka ya wəshi ganji

¹ Ma ke Mahwətə: «Ɗa ya te ka ya wəshi nyi kesərəakɛ wəshi keseɗa ta ɗa kapepahe ba'a kazeza.»

² Wa nya ghena nya geze Mahwətə, Shala ta ka Israyɛl te ghəa mbeli nyi keya mbelia ŋkɛ nya: «Nahe yɛ kesərəakɛ wəshi keseɗa ta ɗa katetazenji ba'a kazezanji. Kese yɛ kanewe ghweme te hɛ we. Vatse gɛ, 'ya katemeha ghwə te gheyɛ kala wəshi nyi ndiremi ndiremia ŋayɛ. 'Ya Mahwətə nde gezete.

³ 'Ya katetsene wəshi keseɗa ta ɗa nyi ketene te ghweme se te pɛtɛa hɛɗi nyi tetazeyi hɛ 'ya. Kateŋka hɛ 'ya kase kadzawa zlema ta nci, kateya hɛ kwele kwele kwa.

⁴ Ka ya wəshi ganji yateve 'ya te ghəa nci, katezhɛne wəshi keseɗa kaghazlənə keɗema kabare bare te zlaɓa ta nci we, kwete shɛ hwa hɛ katefama heka we. 'Ya Mahwətə nde gezete.»

⁵ Ma ke Mahwətə: «Katese kwete veci nya teya hwelefe ganyɛ 'ya sawa mbe David. Kameghe nya kesleke ŋkwa le hweŋkwa ta ŋkɛ tenza ŋkɛ, nya kemene slene nya tiɗiɗi ba'a nya kaganda te hɛɗi.

⁶ Ma ketedzete meghe ŋkɛ ne, pələsə tenza Zhəwda, gwezlayɛ tenza Israyɛl. Wa nya slə nya teve nda mbeli nya: ‹Mahwətə ya kambele ta ɓəmə.›»

⁷ Ma ke Mahwətə: «Kaganda ne, katese veci nya ɗema mbeli mba katezeme fela le ‹Mahwətə nya fəakave ka Israyɛl shave mbe Ɛzhipte›,

⁸ ama le ‹Mahwətə nya kefəakave ka Israyɛl shave mbe hɛɗi nya laka bela kwa gwela ba'a shave mbe hɛɗi nyi tazeyi hɛ ŋkɛ kezha zhɛne hɛ kanza te hɛɗia nci!›»

Ghena ta Zhɛrɛmi te ghəa ka mɛ ŋkwa

⁹ Wa nyi ghena nyi kegezete geva nyi te ghəa ka mɛ ŋkwa: Nahe helia ɗa keslanyɛ, pɛtɛ geva ta ɗa kabare bare. Kala wəndə nya keghwəyi ghwəyi 'ya, kala wəndə nya kelehwe mehele ta ŋkɛ tɛ 'ya, tewəmbəreke yɛ Mahwətə le ghena ta ŋkɛ nyi keveyi geva tekeleke.

¹⁰ «Rayɛ ŋkwa nya te hɛɗi nya va mbeli nyi kemene vale tahe. Wəsə kwa ndiremi yahwɛ hɛ yite, wəshi nyi ɗema ghə te yantsə geva hɛ yite. Va bezla ne, nehwene ya te hɛɗi nya ba'a pɛtɛ ŋkwa kezeme gwəzə ta wəshi keghwele ghwele.»

¹¹ Ma ke Mahwətə: «Pa le ka mɛ ŋkwa ba'a ka dzeghe Shala kapamte ɗa. Vaŋe ki ghɛa ɗa ntsate wəsə kwa ndiremia nci 'ya.

¹² Vatse tenza mazleraɗa kwa hweŋkwa ta nci. Katempempə nda ghə hɛ ke ghəa nci mbe ŋkwesle, katebete hɛ kadzete hɛɗi, vəa ŋkwa nya teghwene nda ndiremi 'ya ke hɛ, te va nya temeha ghwə 'ya te hɛ», wa'a ke Mahwətə.

¹³ «Ma wəsə nya nakɛ 'ya va ka mɛ ŋkwa ta ka Samari ne, kwele kwele ɗema ghəa ɗa. Te sləa Ba'al geze ghena kelɛŋə hɛ, Nahe hɛ keghwetete ka Israyɛl, mbelia ɗa.

¹⁴ Ama wəsə nya ndiremi kashasha yanakɛ 'ya va ka mɛ ŋkwa nyi mbe Zhɛrəzalɛm: vale tahe yandeke nda ghə hɛ, tseŋwə yaviɗi te hwə va hɛ, berete yamtsehe nda hɛ ke ka mefətekwə. Ma tsagha, wəndə shɛ kafɛa yitea mene wəsə kwa ndiremi we. Yipə yipə newe hɛ 'ya le ka Sodome ba'a kala ka Gomore ka Zhɛrəzalɛm.»

¹⁵ Wa nya ghena nya geze Mahwətə nde berete te ka mɛ ŋkwa shɛhɛ nya: «Kateve nda cɛana 'ya ke hɛ kampeɗe ba'a yɛmə nya nza wəsəa kwamasa hwe kasa. Kwa nza ŋkɛ ne, va ka mɛ ŋkwa nyi mbe Zhɛrəzalɛm se wəshi nyi wale wale nyi kekese pɛtɛa mbeli nyi te hɛɗi kala zereghwe.»

Ka mɛ ŋkwa nyi kesla tseŋwə

¹⁶ Wa nya ghena nya geze Mahwətə nde berete nya: «Mba yɛ kefa ghena ta ka mɛ ŋkwa shɛhɛ. Gheyɛ yaghwete hɛ. Ghena nyi zəzəte hɛ mbe ghəa nci yageze ŋayɛ hɛ, same kwa mɛa ɗa hɛ we.

¹⁷ Ma ke hɛ sha mbeli nyi keɓelama ɗa: ‹Kwelɛŋe tenza yɛ, ke Mahwətə.› Ma kaŋa mbeli nyi kentsə geva mbe ntɛaŋentɛa ghəa nci ne, ‹Kakwaɗakɛ ŋayɛ ndiremi we›, ke hɛ.

¹⁸ Wa nde ɗepe ghena ta ɗa nyi tewəfərə wa? Wa nde nakɛ ba'a fate ghena nyi geze 'ya, 'ya Mahwətə wa? Wa nde veyite sleme yitea ghena ta ɗa ba'a wa nde fave wa?»

¹⁹ Ma ke Zhɛrɛmi: «Wa nya masefafelea Mahwətə kase, hwepe wənəa ŋkɛ kaghwəghwə, sefə nya wəba kazhɛre geva kənəa ka beze ghena.

²⁰ Kateghereŋe hwepe wənəa Mahwətə keɗema ŋkɛ kekiɗimte wəsə nya tarete ŋkɛ kamene we. Ma te keɗaŋe ta və ne, katefave yɛ megela.»

²¹ Ma ke Mahwətə: «Keghwenakɛ ka mɛ ŋkwa nyi 'ya we, ama nda hwɛ yahwɛ hɛ. Kegezave nda ghena 'ya ke hɛ we, ama nda ghena yageze hɛ te sləa ɗa.

²² Ma ya nahe hɛ keɗepe ghena ta ɗa nyi tewəfərə ne, nza wərə hɛ kagezave nda ke mbelia ɗa, kezha zhɛre geva hɛ same kwa hweŋkwa kwa ndiremia nci ba'a shave mbe wəshi nyi ndiremi ndiremi nyi mene hɛ.»

Pa tema tema Mahwətə te hɛɗi lema

²³ Ma ke Mahwətə: «Deke Shala ta ŋkwa nya dekwe 'ya na? Ashɛ 'ya kaShala ta ŋkwa nya cakeɗa wəka?»

²⁴ Ma ke Mahwətə: «Ma kewəfərənyɛ wəndə, kanakɛma ŋkɛ 'ya na? Ashɛ hərəkə ŋkwa nya pelɛ ghweme le nya te hɛɗi va 'ya wəka?» Nya ya kaghena nya gezete Mahwətə.

Kayipəte geva yɛ cɛkəvə le ha we

²⁵ «Nahe 'ya kefate ghena ta ka mɛ ŋkwa nyi kesla tseŋwə nyi gəmə te sləa ɗa. Ma ke hɛ sha geze: ‹Nahe 'ya keshiwəte shiwə! Nahe 'ya keshiwəte shiwə!›

²⁶ Pa te nyama və tezhigə ka mɛ ŋkwa nyi le sla tseŋwəa nci ba'a geze ghena nyi kese mbe ghəa nci tse wa?

²⁷ Ma mbe shiwəa nci nyi gegeze nyi hɛ kwelɛ ghəa nci ne, sləa ɗa yaɗe hɛ kazamte yitea ghə va mbelia ɗa, kala nya zaghəyite sləa ɗa ka shihɛ nci yitea Ba'al.

²⁸ Ma nde mɛ ŋkwa nya keshiwəte shiwə ne, gezete shiwəa shɛ ŋkɛ! Ama nya kekemave ghena ta ɗa ne, gezete ghena shɛ ŋkɛ le hweŋkwa ta ŋkɛ!» Ma ke Mahwətə: «Wa wəsə nya keyipəte yɛ cɛkəvə le ha wa?

²⁹ Ashɛ kala ghwə ghena ta ɗa wəka? Ashɛ kala ndevele nya kempə keleɓa ŋkɛ wəka?» Mahwətə nde gezete.

³⁰ Ma ke Mahwətə: «Vatse gɛ, 'ya kateɗa ka mɛ ŋkwa nyi kezhɛzhɛre ghena ta ɗa nyi kwelɛ ghəa nci.

³¹ Kaganda teɗa ka mɛ ŋkwa nyi keve ghena ta nci nyi te ŋkwa ŋa ɗa 'ya», wa'a ke Mahwətə.

³² «Kateɗa ka mɛ ŋkwa nyi kegeze shiwə tseŋwə nyi 'ya. Ma kwa gegeze hɛ ne, mbelia ɗa yaza hɛ le tseŋwə ba'a ghena nyi ɗema deme te. Keghwenakɛ hɛ 'ya ba'a kepelave nda hweŋkwa 'ya ke hɛ we. Wəsə shɛ kaketekɛ mbelia ɗa hɛ le we», wa'a ke Mahwətə.

³³ Ma ke Mahwətə sha Zhɛrɛmi: «Ma ke'yɛwe kwete wəndə, keɗema nde mɛ ŋkwa, keɗema nde dzeghe Shala: ‹Wa ke ghena nya gezeke Mahwətə wa? Wa wəsə kwa ɗaŋeɗa nya vaghe ɓəmə ŋkɛ wa?›, ke ne, ma tezhɛne nda na ke hɛ: ‹Gheyɛ ya kawəsə kwa ɗaŋeɗa! Vatse teneghamte ŋayɛ 'ya, wa'a ke Mahwətə.›

³⁴ Ma kegeze nde mɛ ŋkwa, keɗema nde dzeghe Shala, keɗema kwete wəndə gəmə: ‹Wəsə kwa ɗaŋeɗa yaveyi ɗa Mahwətə kwa ghəa› ke ne, kateve ɗa 'ya te wəndəa shɛ ba'a te mbeli nyi ki ghɛa ŋkɛ.

³⁵ Wa nya wəsə nya hi yɛ ka'yɛwe kwelɛ ghəa ŋayɛ nya: ‹Tsema zhɛnete Mahwətə wa? Tsema gezeke ŋkɛ wa?›

³⁶ Ama ghena ta wəsə kwa ɗaŋeɗa ta Mahwətə nya ne, mba yɛ kezhɛne kahekɛme. Ghena ta Mahwətə zhɛrenyɛ kawəsə kwa ɗaŋeɗa na? Ashɛ tsagha we! Ama kenza yɛ kageze tsagha ne, ghena ta Shala teghweme, Mahwətə nde berete nya kaShala ta ɓəmə yabeze yɛ.

³⁷ Wa nya ghena nya hi wəndə ka'yɛwe va nde mɛ ŋkwa nya: ‹Tsema zhɛnete ŋa Mahwətə wa? Tsema gezeke ŋa ŋkɛ wa?›

³⁸ Ama kezhɛne yɛ kageze: ‹Wəsə kwa ɗaŋeɗa ta Mahwətə› pe yɛ ya 'ya fɛake ŋayɛ yite ne, ma tsagha, wa nya ghena nya geze ŋayɛ 'ya Mahwətə nya:

³⁹ katefə ŋayɛ 'ya kwa ghə kala wəsə kwa ɗaŋeɗa, katebete ŋayɛ 'ya cakeɗake le 'ya, tsagha meleme nya ndeke ŋayɛ nya 'ya le ka shihɛ ŋayɛ.

⁴⁰ Katepəli ŋayɛ hawe 'ya kaghala ghala ba'a katekelemte zləvə nya ɗema mbeli katezaghə kahe kahe 'ya te gheyɛ.»