Zhɛrɛmi 21 - Ghena ta Shala

Zhɛrɛmi kazhɛne nda ghena ke Sɛdɛsiyas

¹ Wa nya ghena nya gezete nda Mahwətə nya ke Zhɛrɛmi kaŋa meghe Sɛdɛsiyas. Pa ghweneke nda yɛ Pashehəwr, wəzege ta Malkiya le nde dzeghe Shala Sefaniya, wəzege ta Masɛya ke Zhɛrɛmi, ma ke hɛ 'yɛwete ve:

² «Tehwə tehwə ŋa 'ya, 'yɛwakɛ n'yɛ ghena va Mahwətə, kwa nza Nabəkodonozor, meghea ka Babilone kave n'yɛ mpa. Nda kwete kamenete kwete ŋkɛ hwa wəshi meŋelea ŋkɛ kezha ŋkamte cakeɗake le ghen'yɛ.»

³ Ma ke Zhɛrɛmi sha hɛ: «Wa nya ghena nya tezhɛne nda yɛ ke Sɛdɛsiyas nya:

⁴ Wa nya ghena nya geze Shala Mahwətə ta ka Israyɛl nya: ‹Ma wəshi kempa nyi yitea dzeve nyi va gheyɛ kezha mpa le meghea ka Babilone ba'a ka Kaldɛ nyi kempa nyi le gheyɛ pelɛke te wəmbəa zli ne, katezhɛne hɛ 'ya kadzembe hwəa meleme.

⁵ 'Ya le ghəa ɗa nde teɗa ŋayɛ le berete ta ɗa, va hwepe wənəa ɗa, va ghyana ta ɗa ba'a va beze ta wənəa ɗa.

⁶ Kateɗa wəshi nyi le mpi 'ya mbe meleme nya, mbeli le wəshi keseɗa: pɛtɛ tempə hɛ va ba nya dzawe.

⁷ Ma ke Mahwətə: kwa sebe ta ŋkɛ, 'ya kateve nda Sɛdɛsiyas, meghea ka Zhəwda, ka mene slene ta ŋkɛ ba'a mbeli nyi ketene yitea yɛ ba, mpa le ma mbe melemea shɛ ke meghea ka Babilone. 'Ya kateve hɛ mbe dzeve ta ka jaga ta nci, mbe dzeve ta mbeli nyi keɗe kazamte mpia nci. Katempə hɛ Nabəkodonozor, katezhɛ heli ŋkɛ yitea hɛ we, katetene kwete wəndə ŋkɛ te ghweme we, katehawe ŋkɛ va kwete wəndə we.›»

⁸ Ma ke Mahwətə sha Zhɛrɛmi kezha geze nda ke mbeli zhɛkwa: «Wa nya ghena nya geze Mahwətə nya: Kapele ŋayɛ hweŋkwa 'ya kezha ntave yɛ hwa yɛ nza te ghweme le mte.

⁹ Ma wəndə nya ketenza mbe meleme nya ne, katemte ŋkɛ va kafayɛ, va ma keɗema va ba. Ama wəndəa ŋayɛ nya keteshavenyɛ kezha ve nda ghəa ŋkɛ ke ka Babilone nyi keɗa ŋayɛ ne, pələsə tenza mpia ŋkɛ.

¹⁰ Ma ke Mahwətə: Katezhɛre nda geva 'ya ke meleme nya kezha ve zeɗe nza we, ama kezha ve ndiremi kadzete. Katenza ŋkɛ mbe dzeve ta meghea ka Babilone nya ketendə ghwə yite.»

Ghena ta Mahwətə ke ghɛa meghe

¹¹ Ke mbeli nyi ki ghɛa meghea ka Zhəwda. «Fate mə ghena ta Mahwətə,

¹² gheyɛ hwelefe ta David. Wa nya ghena nya geze ŋkɛ nya: Meha mə ghwə nya kaganda kala kiɗi ta ŋkwa. Zləgwəke mə mbeli nyi kasa yaka gəmə shave mbe dzeve ta mbeli nyi kesa nda yaka ke hɛ. Ma keɗema ŋkɛ tsagha ne, kala ghwə nya ɗema mbeli kapeslekɛ tetse hwepe ta wənəa ɗa va wəshi nyi ndiremi ndiremi nyi mene yɛ.

¹³ Ma ke Mahwətə: Kabəzli ɓəmə tsetsenya gɛ Zhɛrəzalɛm, gha nya kwelɛ zlərə, nya te keleɓa nya ɓerayɛ. Kwa nza ŋkɛ, ‹Wəndə shɛ katesawa kaɗa ɗa keɗema kadzete ghweɓea ɗa we›, a pa sha geze.

¹⁴ Ma ke Mahwətə: 'Ya kateve ɗa te gheyɛ kazhɛme nyi mbe slene ta ŋayɛ. 'Ya katendə ghwə yitea ghɛa meghea ŋayɛ, hɛmɗɛke teterenji wəshi nyi dzeyi yite.»