Zhɛrɛmi 20 - Ghena ta Shala

Pashehəwr hwepeyi Zhɛrɛmi te selə

¹ Pa Pashehəwr, nde dzeghe Shala nya kawəzege ta Imɛr, nya te ghəa ghɛa Mahwətə fate Zhɛrɛmi kazlape ghena ta Mahwətə.

² Pawe ŋkɛ sha balema kwa sleme va nde mɛ ŋkwa Zhɛrɛmi, pa ŋkɛ hwepeyi te selə nya mɛa mɛ degha ta Bɛnjamɛn nya pelɛghə, nya dzembe ghɛa Mahwətə mbeli kwa.

³ Ma te hendɛ ta ŋkwa, pa Pashehəwr pelemte Zhɛrɛmi. Ma ke Zhɛrɛmi shɛ: «Kateheka ŋa Mahwətə kaPashehəwr zhɛkwa we, ama ‹kaGhazlənə ya te yayata ŋkwa.›

⁴ Kwa nza ŋkɛ wa nya ghena nya geze Mahwətə nya: ‹Kateve ŋayɛ bare bare 'ya va ghazlənə, gheyɛ le ka mcɛhɛ ŋa pɛtɛ. Katempə hɛ va kafayɛa ka jaga ta nci kanewe newe ntsə ta ŋa. Kateve nda ka Zhəwda 'ya pɛtɛ ke meghea ka Babilone nya ketefə hɛ kadzete hɛɗia ŋkɛ keɗema nya ketempə hɛ le kafayɛ.

⁵ Pɛtɛa mcɛlə nyi mbe meleme nya, pɛtɛa wəshi nyi kemave hɛ te slene ta nci, wəshi nyi nza zləvə te va hɛ, zlaɓe le wəshi nyi wəfərəakɛ ka meghea kɛfia ka Zhəwda ne, pɛtɛ teve nda hɛ 'ya ke ka jaga ta nci. Katefə wəshi nyi mbe hɛ, katetsene hɛ hɛ ba'a katefə hɛ hɛ kajive Babilone.

⁶ Ma gheyɛ le mbeli nyi nza yɛ gɛ Pashehəwr, pɛtɛ tefəmte ŋayɛ mbeli. Ma ntsehema ta ŋa mbe Babilone ne, katemte na, pelɛagha tela ŋa mbeli, tsagha pɛtɛa ka mcɛhɛ ŋa nyi se na kageze nda ghena kelɛŋə tseŋwə ke hɛ.›»

Zhɛrɛmi kanehwene nda nehwene ke Shala

⁷ Nahe na keghwetete ɗa Mahwətə, nahe 'ya kepelakɛ ghəa ɗa kaghwetete geva. Berete yamenete na te 'ya, berete ma se na ke 'ya. Keveci keveci ŋ'wəshi ɗa mbeli, yayata wəndə kayiɗə ɗa.

⁸ Yayata və nya geze ghena 'ya ne, nda 'ya katsate lewela ba'a kazlapete ghena ta yɛ mene berete le sa yaka. Tewəmbəreke ghena ta Mahwətə ne, keveci keveci ŋele ba'a ŋ'wəshi ɗa mbeli.

⁹ Ma kegeze 'ya: «Mba 'ya katezəzə te Mahwətə we, kazhɛne 'ya kageze ghena ta ŋkɛ we», a 'ya, ma ŋkwa nya kwa wənəa ɗa ne, kala wəsə nya ndə ɗa ghwə. Leɓakwe 'ya va zereghe, ama kapesle 'ya yite we.

¹⁰ Kwele kwele mbeli nyi fa 'ya kageze ghena kwa ndiremi te 'ya. “Ghazlənə ya te yayata ŋkwa”, ke hɛ sha heka ɗa. «Ncɛte mə ghena ta ŋkɛ», ke kweci sha geze. «Kaganda, ncɛte ɓəmə», ke kweci zhɛnete. Pa le ka mcɛhɛ ɗa kaneghe teɗe ta ɗa, ma ke hɛ: «Ya kwete kateteɗe ŋkɛ mbe dewə zəzə ta ŋkɛ, ma tsagha, berete ma tenza mə ke gheŋkɛ, wərə mə kawate dewa ta ɓə te.»

¹¹ Ama Mahwətə ne, kənəa 'ya ŋkɛ kala katsala kempa nya ghazlənə mbeli ve. Ka ghweze mɛ hwa 'ya ka teteɗe, katehərəte ɗa hɛ we. Shewə tenza hɛ va hawe, va nya ɗema hɛ kehərəte ɗa. Kaghala ghala tenza hawe te hɛ, wəndə shɛ katezaghə we.

¹² Mahwətə nde berete, gha nya kenewe wəndə nya tiɗiɗi, nya keɗepe ŋkwa nya kwa wənə ba'a mehele, ke gha pelave ŋa ghena nya te 'ya 'ya, ncɛte ɗa tsema tsema tewa dewa na te ka jaga ta ɗa.

¹³ Gha nda mə cimə ke Mahwətə! Tsahe mə Mahwətə! Nahe ŋkɛ kembelemte nde dewə ŋeli shave mbe dzeve ta ka mefətekwə.

¹⁴ Kebezla bezla nza veci nya yake geva 'ya te! Ya veci nya yake ɗa meyɛ ɗa te kenza kewəpi wəpi!

¹⁵ Kebezla bezla nza wəndə nya kendeke nda zlama ke yiteyɛ ɗa kwa geze nda ŋkɛ: «Wəzege teza yayake na», a ke.

¹⁶ Nza wəndəa shɛ kala meleme nyi ŋzlamte Mahwətə le wənə le wənə! Masheke ne, fate tsa ta lewela ŋkɛ, ma kwa ghə veci, fate gaka ta mpa ŋkɛ!

¹⁷ Va wa ɗema ŋkɛ menete kamte ɗa 'ya kwa hwə va meyɛ ɗa wa? Kanzanyɛ hwəa meyɛ ɗa kakwele ta ɗa, kanza ɗa 'ya kwa hwəa nta kaghala ghala.

¹⁸ Wa raberə yake geva 'ya sawa kwa hwə tse wa? Deke kezha sa yaka, kanza le kema teheɗe ba'a kezha nza mbe hawe keveci keveci na?