Zhɛrɛmi 18 - Ghena ta Shala

Zhɛrɛmi ki ghɛa male kwa ŋa ghene

¹ Wa nya ghena nya kemave Zhɛrɛmi va Mahwətə nya:

² «Sate, kwiɗi tsetsenya kadzawa ghɛa male kwa ŋa ghene, kwagha tegeze ŋa ghena ta ɗa 'ya.»

³ Pa 'ya dzawa sha male kwa ŋa ghene, slene ta nta yamene nde kwa dadeghweme.

⁴ Ma kemenete geva ŋkɛ kabezenyɛ ghene nya ŋa nde ne, pa zhɛne kaŋate kwete le rekɛa shɛnyɛ kala nya ɗe nde.

⁵ Wa nya ghena nya gezete ɗa Mahwətə nya:

⁶ «Ka Israyɛl, ashɛ wərə 'ya kamenete le gheyɛ kala nya mene male kwa ŋa ghene nya wəka? Kala rekɛ nya mbe dzeve ta male kwa ŋa ghene ka Israyɛl mbe dzeve ta ɗa.

⁷ Ma te kwete veci ne, kageze 'ya kezha nteɗemte, kezha tsaslemte ba'a kezha zamte sebe te kwete hwelefe keɗema te kwete hɛɗi.

⁸ Ama kempiyi dzeve hwelefea shɛ te wəsə kwa ndiremi nya kebezemte ɗa wənə ne, katesərə ve ndiremi 'ya kadzete.

⁹ Ma te kwete veci, katare 'ya kezha ŋa ba'a kezha mɓe kwete hwelefe keɗema kwete hɛɗi.

¹⁰ Ama kenza hwelefea shɛ kamene wəsə nya ɗema 'ya, kaɗema kafa ghena nyi geze 'ya ne, ma tsagha pa 'ya sərəakɛ mene ganyɛ nya meɗeyi nda 'ya.

¹¹ Ma tsetsenya gɛ Zhɛrɛmi, geze nda ghena ke ka Zhəwda le mbeli nyi mbe Zhɛrəzalɛm: ‹Wa nya ghena nya geze Mahwətə nya pa sha hɛ: Nahe 'ya kekelete zəzə kave ndiremi te gheyɛ. Pa yayata wəndə kampiyi dzeve va dzeghwa kwa ndiremia ŋkɛ. Hite mə dzeghwa ta ŋayɛ ba'a slene ta ŋayɛ.›»

¹² Ama ma ke hɛ sha tezhɛne: «Wa tsakɛ n'yɛ wa! Wəsə nya tarete n'yɛ yatemene n'yɛ, wəshi nyi ndiremi ndiremia n'yɛ yazele ghen'yɛ.»

Israyɛl zaghəyite Mahwətə

¹³ Vatse gɛ ne, wa nya ghena nya geze Mahwətə nya: «'Yɛwakɛ mə ghena va kweci hwelefefi: kegha mbeli kafate mama ta wəsə nya we! Kendiremi kashasha wəsə nya menete ka Israyɛl.

¹⁴ Ashɛ zhiɓə nza kwacakelɛ nyi ketemə kənəa ghweme nyi hwa gamba ta Liban wəka? Kanzanyɛ yɛmə lɛnɛa nya kese cakeɗake kwa hələ kehwɛ na?

¹⁵ Ama nahe mbelia ɗa kezaghəyite ɗa. 'Wərdə yatere nda hɛ ke wəshia kwadanji, wəshia shɛhɛ ka kelawe hɛ kwa hweŋkwa ta nci, hɛ kafə hɛ same kwa hweŋkwa nyi vəashinji kezha dzeghwa kwa hweŋkwa nyi kentatema geva.

¹⁶ Nahe mbelia ɗa kezhɛrete hɛɗia nci kakwəfi. Keveci keveci nza mbeli keyirə yirə, pɛtɛa mbeli nyi kedzeyi mbe heheɓake, nda ghə yagagəzə hɛ.

¹⁷ Ma vəa ŋkwa nya tese nde jaga ne, kwetɛ kwetɛŋe tetaze mbelia 'ya kala keləwə nya kele sefə same kwa ghweme. Ma te veci nya tese ndiremi ne, katezhɛre nda wəmbə 'ya ke hɛ kamejara kema nya tezhɛre nda 'ya ke hɛ.»

Mbeli tsate ghena yitea Zhɛrɛmi

¹⁸ Ma ke hɛ gezete: «Mbi ɓəmə, zele ɓəmə ntsehwele kepesle Zhɛrɛmi, kandɛare mə va ka dzeghe Shala kezha teke ɓəmə wəsə mahalegə we, ya ka ntsehwele ntsehwele kezha geze ɓəmə ghena ganyɛ we, ya ka mɛ ŋkwa kezha geze ɓəmə ghena ta Shala we. Mbi ɓəmə kageze ghena nya ndiremi te, vema ghə mə te ghena ta ŋkɛ ma.»

¹⁹ Veyite sleme yitea səkwə ta ɗa Mahwətə, fama ghena ta ka jaga ta ɗa gi.

²⁰ Kawa wəsə kwa ndiremi mbeli le kwa ganyɛ na? Ama keleŋa yaŋa ɗa hɛ. Zəzəte tsema tsema se 'ya kaslete kwa kema ta ŋa kampi ŋa dzeve kezha hɛ, kezha zhɛremte hwepe wənəa ŋa na seyi kənəa hɛ.

²¹ Vatse gɛ ne, vate ma te ŋwalea nci, mpəmte hɛ kwamte mpa. Zamte geva sebe te ŋwalea mia nci ba'a zhɛrenji hɛ kaka wedidi, mpənji zhilia nci va ba, mpənji megelɛshi kwamte mpa!

²² Fate lewela mbeli shave ki ghɛa nci kwa ghweneke wəvəsəa ka sewajɛ na kala metɛ ta ntsə kaɗa hɛ! Kwa nza ŋkɛ keleŋa yaŋa hɛ kezha kese ɗa, dagalawe yakelawe hɛ yitea seɗa ta ɗa.

²³ Ma gha Mahwətə ne, wəsə shɛ kaɗepema na mbe wəshi nyi mene nyi hɛ kezha pesle ɗa we. Mba na kekelemte jaɗafa ta nci te wənə, dəpəma wəsə na kənəa beze ghena ta nci ma. Betenji hɛ kadzete hɛɗi kwa kema ta ŋa, te vəa hwepe wənəa ŋa ne, vate ɗa te hɛ!