Zhɛrɛmi 15 - Ghena ta Shala

¹ Ma ke Mahwətə sha 'ya: «Ya yɛ Moyize le Saməyɛl sletenji kwa kema ta ɗa ne, kazhɛreke geva mehele ta ɗa kezha mbeli nyi we. Ŋkamte ɗa hɛ kwa kema ta ɗa, slənji hɛ!

² Ma ‹Tema telə n'yɛ wa›, ke'yɛwe hɛ va gha ne, ma pa na sha zhɛne nda ke hɛ: ‹Wa nya ghena nya geze Mahwətə nya: wəndə nya ketarete geva kamte ne, kamte ŋkɛ, nya ketarete geva kamte kwamte mpa, va mpa mte ŋkɛ, nya ketarete geva kamte va ma, va ma mte ŋkɛ, nya ketarete geva kakele mbeli kadzete kwete hɛɗi, kakele geva ŋkɛ!›»

³ Ma ke Mahwətə: «'Ya kateɗa hɛ le mama ta wəshi wəfaɗe: katempə hɛ va kafayɛ, katentsehe hɛ kelɛa keti kalə cakeɗake, yɛ zleŋa ba'a yɛ kelɛ gamba ka tempeɗe hɛ ba'a ka teza sebe te hɛ.

⁴ Ma tsagha ne, benake tenza ka meghe nyi te hɛɗi kwa nakɛ hɛ hɛ. Nya ya kazhɛme nya mbe wəshi nyi ndiremi ndiremi nyi menete Manasɛ, wəzege ta Ɛzɛkiyas ba'a meghea ka Zhəwda mbe Zhɛrəzalɛm.»

Leɓakwe Mahwətə va zhɛ heli

^5-6 Ma ke Mahwətə: «Wəndə shɛ katezhɛ heli yitea gha we Zhɛrəzalɛm we? Wəndə shɛ kanehwene yitea gha we? Wəndə shɛ kateleɓe ghəa ŋkɛ ka'yɛwe ghena nyi te gha we? Gha nde neghamte ɗa, nahe na kezhɛrave ɗa wəmbə. Vatse vate ɗa 'ya te gha kezha za ŋa, kwa nza ŋkɛ leɓakwe 'ya va zhɛ heli.

⁷ Mbe yayata meleme nya te hɛɗi nya ne, nahe 'ya keveyi 'yɛmbea ɗa hwa ghweme kezha mehe hɛ. Nahe 'ya kezamte sebe te mbelia ɗa kwa fɛake hɛ 'ya keya ŋwale, ama kezhɛrete nza ta nci hɛ we.

⁸ Nahe 'ya kemenete kanza ka wedidi kwele kwele hwa hɛ kala ndaleghe nya kwa hələ. Kwa ghə veci nda vate ndiremi 'ya te meghekɛa megela nya kempa. Taghanyɛ ne, pa 'ya ndeke nda ghazlənə nya wəba.

⁹ Pa zləvə kelemte geva te male nya keyake ŋwale mberefaŋe, pa helia nta slanyɛ. Talala veci kwa ghə nda pəkwənyɛ vecia nta. Bətə nde mbe hawe, telakwe zləvə teɗenyɛ sawa te. Ma mbeli nyi mba te ghweme ne, katempə hɛ ka jaga ta nci pɛtɛ kwamte mpa.» 'Ya Mahwətə nde gezete.

Ŋgaɗe ghə ta Zhɛrɛmi ba'a zhɛne ta Mahwətə

¹⁰ Wa nya yaka te 'ya, kwa yake ɗa na gɛ mawe yawe! Te hɛɗi nya pɛtɛ ne, kaɗe ghena ta ɗa mbeli we, ghena yave hɛ kadzete 'ya. Ndagwara kenzəɓəave nda cɛdɛa 'ya ke wəndə keɗema kanzəɓəave ɗa wəndə we, ama pɛtɛ mbeli kabezla ɗa!

¹¹ Ndagwara nahe Mahwətə kegezete: «Kazeme ŋa fela 'ya kezha ve ŋa zeɗe nza. Kazeme ŋa fela 'ya kezha tekele nde jaga ta ŋa kase kampi dzeve yitea gha te vəa ndiremi ba'a yaka.

¹² Wəndə shɛ kaɓelemte lɛ we, halama lɛ shifri keɗema mze kwa ghwə ghwə na?»

¹³ Ma ke Mahwətə: «Zhəwda, nahe 'ya kepelakɛ ŋkwa kafə mcɛləa ŋa ba'a wəshi nyi wəfərəakɛ na kwa tame, wəsə shɛ katekemave na te ŋkwa nci we. Nya ya kazhɛme ta fete nyi menete na te hɛɗia ŋa pɛtɛ.

¹⁴ Kateve ŋa 'ya kamava ta ka jaga ta ŋa te hɛɗi nya ɗepema na. Tse yatse ghwə ta hwepe wənəa ɗa, katetere ŋayɛ ŋkɛ.»

¹⁵ Ma ke Zhɛrɛmi: «Gha Mahwətə, nahe na keɗepe nza ta ɗa pɛtɛ, zəzəte ɗa ba'a kemanakɛ ɗa, wate ɗa dewa te ka ghweze mɛ hwa 'ya. Sərəakɛ ɗa ma na kasa yaka laka nya zereghe ghena ta nci na ma, Ɗepete tewəmbəreke gha səwə ŋele 'ya.

¹⁶ Ma sema ta ghena ta ŋa sha 'ya ne, pa 'ya veyite yitea ghə. Zlama ba'a farefa yave nda ghena ta ŋa ke wənəa ɗa, kwa nza ŋkɛ nahe 'ya keveyi geva tekeleke kaŋa ŋa Shala Mahwətə nde berete.

¹⁷ Kese 'ya kantishɛ hwa ka ŋ'wəshi ŋkwa kezha raberə we, ama nahe na keŋkeyi ɗa le berete vare bela, kwa ndeke ɗa hwepe wənə na kwele kwele.

¹⁸ Wa raberə ɗema yaka nya te 'ya kakiɗi wa? Va wa ɗema zhia ɗa kampi keɗema kamene mevɛvi wa? Kaganda kaganda ghwetete ɗa na kala ghwa ghele nya ɗema wəndə kavate ghə te yɛmə kwa!»

¹⁹ Wa nya ghena nya geze Mahwətə nya: «Ma kezhɛneke geva na kase sha 'ya ne, katekele ŋa 'ya kande mene slene ta ɗa zhɛkwa. Ma keghereŋe na kageze ghena ganji nyi keɗema kaghena ghweleme ne kande mɛ ŋkwa ta ɗa tenza na zhɛkwa. Ka Zhəwda ka tezhɛne geva kase sha gha, ama gha nde tezhɛne geva kalə sha hɛ we.

²⁰ Kala zli mze kwa ghwə ghwə nya keɗema kaŋzla teve ŋa 'ya kwa kema ta nci. Katempa yɛ le hɛ, ama katepesle hɛ yitea gha we, kwa nza 'ya le gha kezha mbele ŋa ba'a kezha ya ŋa.

²¹ Katembele ŋa 'ya shave mbe dzeve ta ka 'yaghwa mehele ba'a katezləgwə ŋa 'ya shave mbe dzeve ta ka mene berete 'Ya Mahwətə nde gezete.»