Zhɛrɛmi 12 - Ghena ta Shala

¹ Mahwətə, ketiɗiɗi na kezha ghəpə 'ya le gha. Ndagwara kaɗe 'ya kaghəpə le gha te ghena ta nza tiɗiɗi. Wa raberə nda jive ka 'yagha mehele mbe kema mbe kema wa? Wa raberə nda nza ka mbəɗəkwə kwelɛŋe wa?

² Nahe na kemɓete hɛ, nahe hɛ keheyi slərə, kele yakele hɛ ba'a ya yaya hɛ. Sləa ŋa yahekɛme hɛ keveci keveci, ama cakeɗake wənəa nci le gha.

³ Mahwətə, nahe na keɗepe ɗa, kanewe ɗa na ba'a kanewe ŋkwa nya kwa wənəa ɗa nya va gha na. Ŋkeyi ka 'yaghwa mehele te ŋa nci ŋkwa kala timɛti nyi tehene mbeli. Veyi hɛ tekeleke kaneghe vecia mpə ta nci.

⁴ Pa te nyama və tenza mbeli nyi te hɛɗi mbe nehwene ba'a wəshi keghwele ghwele te wəve wa? Za yaza sebe te wəshi keseɗa ba'a yɛ 'yɛ va fete ta mbeli nyi te hɛɗi. «Kanakɛ wəshi ketemene ɓəmə geva Zhɛrɛmi we», ke hɛ sha geze.

⁵ Ma ke Mahwətə sha 'ya: «Ma leɓakwe na va hwɛ kwa sebe ta mbeli nyi kehwɛ le seɗa ne, tsema nza na kadzeghete wampelɛa mpelɛa le yɛ gədəwə wa? Ma nda deke nza te hɛɗi nya kwelɛŋe yagezleŋema ghə na ve ne, tsema temene na dzeyi mbe gamba nyi mɛa Zhəwrdɛŋe wa?

⁶ Kwa nza ŋkɛ nahe ka menəhɛ ŋa le mbeli nyi kwa yita ta ŋa kepamte ŋa. Lewela yatsa hɛ kwa sebe ta ŋa. Vema ghə na te hɛ kenza hɛ kageze ŋa ghena le mehele ma.»

Shala wəfəyite yɛ ghɛa ŋkɛ le mbelia ŋkɛ

⁷ Nahe 'ya kewəfəyite ghɛa ɗa, nahe 'ya kenehemte geva le mbelia ɗa. Nahe 'ya kevame mbeli nyi ɗehwe 'ya mbe dzeve ta ka jaga ta nci.

⁸ Nahe mbeli nyi kese kaŋa ɗa kezhɛrenji kala nivɛrə nyi mbe ghɛa wəfe: ghwəghwə yaghwəghwə hɛ kənəa 'ya. Vatse ɗema 'ya mba kaɗe hɛ.

⁹ Kala 'yɛ kwa verezlɛzlɛ nya dzasle kwa yɛ zele nyi keɗe kahe hɛ mbelia ɗa tsetsenya na? Kwiɗi mə tseneke mə wəshi nyi hwa gamba pɛtɛ! Ŋkake mə hɛ kase yitea gəsəkə!

¹⁰ Nahe wəvəsəa ka ya wəshi kebezemte wəvea rɛzɛŋea ɗa, keŋkeɗemte wəvea ɗa. Nahe hɛ kezhɛremte wəvea ɗa nya ganyɛ nya kaɓerama dɛrɛŋe rɛŋe.

¹¹ Nahe hɛ kezhɛrete kaŋkwa nya kebeze beze, kaŋkwa keheka nehwene, kebeze beze ŋkɛ kwa kema ta ɗa. Pɛtɛ hɛɗi kebeze beze, wəndə shɛ kese ketsakɛ ŋkɛ we.

¹² Sawa yasawa ka ŋwasle ŋkwa pelɛ ghweme nyi te ɓerama, kwa nza kafayɛa Mahwətə kanzere wəshi nyi te hɛɗi pɛtɛ se te kwete bela hwa'a te kwete, wəndə shɛ kazlenekɛ ŋkɛ we.

¹³ Ha yatsawete yɛ, ama tigə kwara yaɗa yɛ se te wəve. Kwele kwele sahwe yaka yɛ, ama meleɓe shɛ kekemave yɛ we. Hawe nya te gheyɛ te və keleke ha, va nya hwepete wənə Mahwətə kwele kwele va gheyɛ.

Ghena ta Mahwətə ke ka ghala ta Israyɛl

¹⁴ Wa nya ghena nya geze Mahwətə te ka 'yaghwa mehele nyi kwa ghala le mbelia ŋkɛ nya: «Nahe hɛ kekwaɗakɛ hɛɗi nya ndeke nda 'ya ke ka Israyɛl, mbelia. 'Ya katenteɗemte hɛ te hɛɗia nci, katenteɗemte ka Zhəwda 'ya shave hwa hɛ perə.

¹⁵ Ama kwa sebe ta nya nteɗemte hɛ 'ya, katezhɛ heli 'ya yitea hɛ, katezhɛne yayata wəndə kadzete wəvea ŋkɛ ba'a kadzete hɛɗia ŋkɛ.

¹⁶ Pa hɛ tekave nda zeme fela le Ba'al ke mbelia ɗa. Ama ketekave dzeghwa tiɗiɗi hɛ kala mbelia ɗa, kenza hɛ kazeme fela le sləa ɗa, 'ya Mahwətə ne, katenza hɛ hwa mbelia ɗa.

¹⁷ Ama keɗema kwete mbe hwelefe nyi kafa ghena ta ɗa ne, katenteɗemte 'ya fəyitekeghə ba'a katewəfə nda ŋkɛ 'ya ke mte», wa'a ke Mahwətə.