Zhɛrɛmi 1 - Ghena ta Shala

¹ Ma palepa nya ne, ghena nyi gezete ba'a wəshi nyi menete Zhɛrɛmi, wəzege ta Hilkiya, kwete wəndəa ka dzeghe Shala nyi mbe Anatot, te hɛɗia Bɛnjamɛn yageze ŋkɛ.

² Pa ghena ta Mahwətə gezeke nda geva ke Zhɛrɛmi te vəa Zhoziyas, wəzege ta Amon, meghea ka Zhəwda te kwa meŋe mahekeneghəmbe ta va ta ŋkɛ mbe meghe.

³ Pa zhɛne kagezete nda geva te vəa Zhowakim, wəzege ta Zhoziyas, meghea ka Zhəwda, pa te kwa keɗaŋe ta va kwa meŋe kwetɛŋeghəmbe ta Sɛdɛsiyas, wəzege ta Zhoziyas, meghea ka Zhəwda, te tere kwa mcɛfe nya fəhwe ka Zhɛrəzalɛm mbeli.

Shala kaheka Zhɛrɛmi kanza kande mɛ ŋkwa ta ŋkɛ

⁴ Ma ke Mahwətə sha 'ya:

⁵ «Ma nda tepate ŋa 'ya kwa hwə va meyɛ ŋa ne, nahe 'ya keɗepete ŋa. Tewə na kenaka kaya ne, nahe 'ya keveyi ŋa tekeleke. Nahe 'ya kentave ŋa kande mɛ ŋkwa kezha hwelefefi.»

⁶ Ma 'ya zhɛnete nda: «Aya! Shala Mahwətə, keɗepe geze ghena 'ya we, mba 'ya kadɛgwə.»

⁷ Ama ma ke Mahwətə sha 'ya: «Gezema na dɛgwə 'ya, pa ma. Ya tema tema ghwene ŋa 'ya, lə yalə na, yayata ghena nya geze ŋa 'ya ne, pɛtɛ tegeze na.

⁸ Ghazlənəma na va mbeli ma, kwa nza ŋkɛ le gha 'ya kezha tembele ŋa.» Wa'a ke Mahwətə sha 'ya.

⁹ Kwa sebe ta ŋkɛ, pa Mahwətə hake dzeve ta ŋkɛ kakwaɗakɛ mɛa ɗa, ma ke sha 'ya: «Nahe 'ya keveyi ghena ta ɗa kwa mɛa ŋa.

¹⁰ Ɗepete nahe 'ya kendeke ŋa berete ɓeshi, te ghəa yɛ hwelefe le yɛ hɛɗi, kezha nteɗemte ba'a welemte, kezha zamte sebe te ba'a kampəmte, kezha ŋate ba'a kamɓete.»

Dzeve ta amandiyɛ ba'a dəghwə nya kenefe nefe

¹¹ Pa ghena ta Mahwətə gezete ɗa geva: «Wa wəsə nya newe na tse wa Zhɛrɛmi?» Ma 'ya: «Dzeve ta amandiyɛ yanewe 'ya.»

¹² Ma ke Mahwətə sha 'ya: «Megela nakɛ na. Kwa nza ŋkɛ katenewe ghweme 'ya te ghena ta ɗa kezha yipə wəsə nya geze ŋkɛ kadzawa.»

¹³ Pa ghena ta Mahwətə gezeke ɗa geva kakwa bake zhigə: «Wa yanewe na tsetsenya gɛ?» Ma 'ya shɛ: «Dəghwə kenefe nefe te ghwə, mevereŋwe laka bela kwa gwela.»

¹⁴ Ma ke Mahwətə sha 'ya: «Shave laka bela kwa gwela teme ndiremi te mbeli nyi te hɛɗi pɛtɛ.

¹⁵ 'Ya kateheka hwelefefi nyi te hɛɗi nyi laka bela kwa gwela. Katese hɛ kave pasla ta meghea nci mɛa yayata mɛ degha ta Zhɛrəzalɛm. Katedzasle zlia ŋkɛ hɛ, kateha mpa hɛ ke meleme nyi mbe Zhəwda pɛtɛ.

¹⁶ Tsetse temeha ghwə 'ya te hɛ va wəsə kwa ndiremi nya menete hɛ: nahe hɛ kewəfəyite ɗa, melɛ yadzeghe nda hɛ ke kweci shala, gwəɗəŋə yagwəɗəŋə hɛ kwa kema ta wəshi nyi menete hɛ le dzeve ta nci.

¹⁷ Ama gha ne, hwepemte hwəa ŋa, kwiɗi gezete nda wəshi nyi gezave ŋa 'ya ke hɛ. Ghazlənəma na va hɛ ma, ma keɗema tsagha ne, gha yateve ŋa ghazlənə 'ya kwa kema ta nci.

¹⁸ Se va ɓeshi, 'ya kazhɛre ŋa kande berete kala meleme nya nza zli yite, kala selə nya kalɛ, kala zli kwa mze kwa ghwə ghwə kwa kema ta mbeli nyi te hɛɗi pɛtɛ, kwa kema ta ka meghea ka Zhəwda, ka mene slene ta ŋkɛ, ka dzeghe Shala ta ŋkɛ ba'a mbeli nyi te hɛɗia ŋkɛ pɛtɛ.

¹⁹ Katempa hɛ le gha, ama katepesle hɛ yitea gha we, kwa nza ŋkɛ le gha 'ya kezha mbele ŋa. 'Ya Mahwətə nde gezete.»