Zhaŋe 8 - Ghena ta Shala

Male nya keseve mbeli te vale tahe

¹ Ntəŋə Yɛsə kadzeme ghweme ta Bekele.

² Kiɗima ta ŋkwa masheke masheke ne, pa Yɛsə zhɛneke geva kadzembe ghɛa Shala. Kwele kwele mbeli kase shɛ. Ntishɛ ŋkɛ kateke nda wəshi ke hɛ.

³ Tagha gɛ, pɛkwe ka rafe wəsə mahalegə le ka Fariziyɛn, le kwete male nya keseve hɛ te vale tahe. Pa hɛ veyi te tepe ta mbeli pɛtɛ.

⁴ Ma ke hɛ sha Yɛsə: «Nde sleke ɗa, male nya ne, te vale tahe keseve mbeli.

⁵ Nahe wəsə mahalegəa Moyize kegezete n'yɛ kapesle male nya kala nya le pelɛ. Tsema pa sha ŋa ŋa wa?»

⁶ Yitea ŋa nda keleŋa ke Yɛsə ba'a yitea zele hweŋkwa kekese gezete hɛ tsagha. Vəkwə Yɛsə karafe wəshi te hɛɗi le dzeve.

⁷ Ghwə yitea shaga ghwə yitea dəghwə hɛ ka'yɛwe va Yɛsə. Pa Yɛsə kafete kema. Ma ke sha hɛ: «Wəndə nya keghama kamenete jaɗafa hwa gheyɛ ne, ghate beza malea shɛ ŋkɛ le pelɛ ga!»

⁸ Ntiŋə ŋkɛ sha ghə ɓiyitsa karafe wəshi zhɛkwa te hɛɗi.

⁹ Kwa fate ghena ta Yɛsə nyagha hɛ ne, ntake hɛ kaghərə geva kwetɛ kwetɛ, mpelɛa meha mehɛɗi dzeghwanji, zhɛne mempɛhwetɛti. Tene Yɛsə le male nyagha meslete mbe kema ta ŋkɛ.

¹⁰ Kafe Yɛsə sha ghə, ma ke: «Male, tema hɛ gɛ wa? Wəndə shɛ kendeke ŋa fete wəka?»

¹¹ Ma ke malea shɛ zhɛnete: «Wəndə shɛ we, Nde sleke ŋkwa we.» Tagha gɛ, ma ke Yɛsə shɛ: «Ma 'ya perə ne, kave ŋa fete 'ya we. Kwiɗi ŋa, zhɛnema na kamene jaɗafa tɛape ma.»

Yɛsə nde waŋe nda ŋkwa ke mbeli pɛtɛ

¹² Ma ke Yɛsə geze nda ke mbeli zhɛkwa: «'Ya ya kawaŋe ta hɛɗi lema. Ma yayata wəndə nya ketəkwə təkwəte ɗa ne, katedzeghwa ŋkɛ hwa ŋkwesle we, ama katekemave waŋea mpi ŋkɛ.»

¹³ Ma ke ka Fariziyɛn shɛ: «Gha nde negha fete yitea ghəa ŋa ne, ndeɗekə ghena ta ŋa shɛ tsagha tse yi!»

¹⁴ Ma ke Yɛsə: «Ya 'ya nde negha fete te ghəa ɗa ne, kaganda ghena nya geze 'ya. Kwa nza ŋkɛ nahe 'ya keɗepe ŋkwa nya se 'ya te, nahe 'ya keɗepe ŋkwa nya telə 'ya te perə. Ama gheyɛ ne, keɗepe ŋkwa nya se 'ya te le nya telə 'ya te yɛ we.

¹⁵ Kala wəndə ŋelɛ meha ghwə yɛ, 'ya ne, ama wəndə shɛ kameha ghwə 'ya te we.

¹⁶ Ya 'ya nza meha ghwə te mbeli ne, ghwə nya tiɗiɗi yameha 'ya. Kwa nza ŋkɛ deke 'ya kwetɛŋe ɗa nde meha ghwəa shɛ we, ama ghen'yɛ le Yiteyɛ ɗa nya keghweneke ɗa.

¹⁷ Nahe yɛ keɗepe, ma ke mbe wəsə mahalegəa ŋayɛ: Ma keneghate fete mbeli bake yipə yipə ne, kaganda ghena shɛ.

¹⁸ Ya, wa nyagha gɛ. 'Ya ne, fete yanegha 'ya yitea ghəa ɗa, fete yanegha Yiteyɛ ɗa nya keghweneke ɗa ɓiyitsa te 'ya perə.»

¹⁹ Ma ke hɛ shɛ: «Tema Yite ŋa shɛ tse wa?» Ma ke Yɛsə zhɛnete: «Keɗepe ɗa yɛ we, keɗepe Yiteyɛ ɗa yɛ perə we. Ma nda nahe yɛ keɗepe ɗa ne, kateɗepe Yiteyɛ ɗa yɛ perə.»

²⁰ Mbe ghɛa Shala gezete ghena nya Yɛsə kwa teke nda wəshi ŋkɛ ke mbeli vare wəsə nya bete cɛdɛ mbeli kwa. Wəndə shɛ kedapate dzeve te yitea kese va nya nakama vəa ŋkɛ kase we.

Slə ta Yɛsə ba'a meha ghwə

²¹ Ma ke Yɛsə sha hɛ ɓiyitsa: «Katedzeghwa ɗa 'ya, katezele ɗa yɛ, mbe jaɗafa ta ŋayɛ tempə yɛ va nya ɗema yɛ kapesle kalə te ŋkwa nya telə 'ya te.»

²² Ma ke ka Zhəwif kwelɛ ghəa nci: «Yitea wa geze ŋkɛ: Ashɛ yɛ kakekave ŋkwa nya telə 'ya te we, ke wa? Gheŋkɛ nza telə katepesle ghəa ŋkɛ na?»

²³ Ma ke Yɛsə zhɛnete nda ke hɛ: «Ŋa ŋkwa nya teke te hɛɗi yɛ, ama 'ya, sawa pelɛ yitea ghweme sawa 'ya. Ŋa ŋkwa nya kwake te hɛɗi yɛ mbeli, ama 'ya ne, ŋa ŋkwa te hɛɗi 'ya we.

²⁴ Vatse geze ŋayɛ 'ya, katempə yɛ mbe jaɗafa ta ŋayɛ. Kaganda tempə yɛ mbe jaɗafa ta ŋayɛ keɗema yɛ keyɛte: 'Ya ya ka'ya.»

²⁵ Ma ke hɛ shɛ: «Wa sləa ŋa wa?» Ma ke zhɛnete: «Kala nya gezete ŋayɛ 'ya ghalanza, tsagha 'ya.

²⁶ Kwele kwele ghena va 'ya kageze ŋayɛ, kwele kwele ɓiyitsa yitea meha ghwə te gheyɛ perə. Tiɗiɗi ghena ta wəndə nya keghweneke ɗa. Deke wəshi nyi fave 'ya ve yageze nda 'ya ke mbeli nyi te hɛɗi.»

²⁷ Keɗepe mbeli nyighɛ ne, ghena ta Yita yageze Yɛsə we.

²⁸ Ma ke Yɛsə sha hɛ: «Ma vəa ŋkwa nya teslete Wəzege ta za yɛ te sheghwə, vəa ŋkwa shɛ teɗepe yɛ 'ya ya ka'ya. Kateɗepe yɛ, ashɛ 'ya kamene wəsə kwetɛŋe ɗa we, deke wəshi nyi gezete ɗa Yiteyɛ ɗa yateke ŋayɛ 'ya.

²⁹ Ma wəndə nya keghweneke ɗa ne, ghen'yɛ le keveci keveci. Kesərəakɛ ɗa kwetɛŋe ɗa we, va nya nza ŋkɛ keveci keveci mene wəshi nyi ɗe ŋkɛ 'ya.»

³⁰ Ma kwa gezete ghena nya Yɛsə kala nya ne, kwele kwele mbeli nyi keyɛte ŋkɛ.

Ka mamzashi ba'a ka mavashi

³¹ Ma ke Yɛsə sha ka Zhəwif nyi keyɛte: «Ma kenza ŋayɛ dɛŋe dɛŋe te wəshi nyi se 'ya kateke ŋayɛ yɛ ne, kambeli nyi ketəkwə təkwə nyi ɗa tenza yɛ.

³² Kateɗepe ghena nya kaganda yɛ deŋwa. Katezhɛre ŋayɛ ghena nya kaganda shɛ kaka mamza.»

³³ Ma ke hɛ shɛ: «Ka shihɛnyɛa Abraham ghen'yɛ wəka? Kegha ghen'yɛ kanza kamava ta wəndə we. Tsema geze na: Katezhɛre yɛ kaka mamza pa wa?»

³⁴ Ma ke Yɛsə sha hɛ: «Kaganda geze ŋayɛ 'ya, yayata wəndə nya kemene jaɗafa ne, mava ta jaɗafa ŋkɛ.

³⁵ Ma mava ne, kanza ŋkɛ ki ghɛ keveci keveci we, ama wəzege ne, keveci keveci tenza ŋkɛ ki ghɛa yitenyɛ.

³⁶ Ma kembelete ŋayɛ Wəzege ta Shala shave mbe mava ne, kaka mamza tenza yɛ fate fate.

³⁷ Nahe 'ya keɗepe, kaka shihɛnyɛa Abraham yɛ. Ama hweŋkwa kepesle ɗa yazele yɛ, va nya ɗema yɛ kepelakɛ ghena ta ɗa kadzawa wənəa ŋayɛ.

³⁸ Wəshi nyi nakɛ 'ya va Yiteyɛ ɗa yageze 'ya. Ama gheyɛ le ŋa ŋayɛ ne, wəshi nyi fate yɛ va yiteyɛ ŋayɛ yamene yɛ.»

³⁹ Ma ke hɛ zhɛnete nda: «Abraham ya kayite n'yɛ.» Ma ke Yɛsə sha hɛ: «Ma kenza nde kaŋwalea Abraham yɛ kaganda ne, slene nya se Abraham kamene yatemene yɛ.

⁴⁰ Ya tsemanyɛ geze ŋayɛ ghena ganyɛ 'ya nya fave 'ya va Shala, ashɛ yɛ kaɗe we, hweŋkwa kepesle ɗa yazele yɛ. Tsetse se Abraham kamene we.

⁴¹ Wəshi nyi se yiteyɛ ŋayɛ kamene yamene yɛ.» Ma ke hɛ shɛ: «Ŋwalea male wede ghen'yɛ we, Yita ya va ghen'yɛ kwetɛŋe, gheŋkɛ Shala Yita nya pelɛ ghweme.»

⁴² Ma ke Yɛsə sha hɛ: «Ma nda Shala Yite ŋayɛ ne, nza kateɗe ɗa yɛ, va nya nza ŋkɛ sawa pelɛagha 'ya shɛ, gheŋkɛ nde veyi ɗa teke. 'Ya nde ghweneke ghəa ɗa we, gheŋkɛ nde ghweneke ɗa.

⁴³ Yitea wa ɗema yɛ fa ghena nya geze ŋayɛ 'ya wa? Va nya dewə berete va gheyɛ kafa ghena ta ɗa.

⁴⁴ Gətəli yiteyɛ ŋayɛ. Wəshi nyi ɗe yiteyɛ ŋayɛ yaɗe yɛ kamene, se te kwa ghate veyi geva ŋkɛ kezha pesle ŋkwa, kashɛ nza mbe kaganda tɛape we, va nya ɗema kaganda ve. Ma nda sla tseŋwə ŋkɛ ne, va nya nza ŋkɛ kande tseŋwə nda geze ŋkɛ tsagha. Gheŋkɛ yitenyɛa tseŋwə pɛtɛ.

⁴⁵ Ama 'ya ne, ghena nya kaganda yageze 'ya, vatse ɗema yɛ kayɛ ɗa.

⁴⁶ Wa wəndə nya kegha nakɛ ɗa hwa gheyɛ kamene jaɗafa wa? Ma kenza nde ghena nya kaganda yageze 'ya ne, va wa ɗema yɛ kayɛ ɗa wa?

⁴⁷ Ma wəndə nya kawəndəa Shala ne, ghena ta Shala yafa ŋkɛ. Ama gheyɛ ne, mbelia Shala yɛ we, vatse ɗema yɛ fa ɗa ghena.»

Yɛ Yɛsə le Abraham

⁴⁸ Ma ke ka Zhəwif sha Yɛsə: «Kaganda geze n'yɛ kande Samari ba'a 'yi'yɛghwə nde zhɛ ŋa.»

⁴⁹ Ma ke Yɛsə sha hɛ: «Kazhɛ ɗa 'yi'yɛghwə we. Yiteyɛ ɗa yave kwele 'ya te. Gheyɛ ne, kaɗe yɛ kakelemte kwele te 'ya.

⁵⁰ 'Ya ne, kesepa zləvə 'ya kaŋa ghəa ɗa we, le kwete wəndə shɛ nya keve zləvə te 'ya, gheŋkɛ nde tedzeghe nza ta ŋkɛ.

⁵¹ Kaganda ne, ma 'ya sha gheyɛ: katemte wəndə nya keyate ghena ta ɗa kaghala ghala we.»

⁵² Ma ke ka Zhəwif shɛ: «Yawa, nahe n'yɛ keɗepe tsetsenya 'yi'yɛghwə nde zhɛ ŋa fate fate. Nahe Abraham kemte, nahe ka mɛ ŋkwa ta Shala kempənji, ma gha le ŋa ŋa ne, ma pa na: katemte wəndə nya keyate ghena ta ɗa kaghala ghala we.

⁵³ Za ma na ke shia n'yɛ Abraham nya kemtenyɛ na? Nahe ka mɛ ŋkwa ta Shala kempənji. Kande wa zəzə ghəa ŋa na wa?»

⁵⁴ Ma ke Yɛsə sha hɛ: «Kenza nde 'ya le ghəa ɗa nde ve zləvə te ghəa ɗa ne, gəmə tenza zləvəa shɛ. Wəndə nya keveyi zləvə te 'ya ne, Yiteyɛ ɗa nya heka yɛ kaShala ta ŋayɛ.

⁵⁵ Ama keɗepe yɛ we. Ma 'ya, nahe 'ya keɗepe. Ma ya nahe 'ya kegeze: Keɗepe 'ya we, 'ya ne, nde sla tseŋwə 'ya kala gheyɛ. Ama nahe 'ya keɗepe, kaya ghena ta ŋkɛ 'ya.

⁵⁶ Nahe shia ŋayɛ Abraham kese kazlama kwa vate ghə ŋkɛ tenewe vecia ɗa. Nahe ŋkɛ kenakɛ, kwele kwele se ŋkɛ kazlama.»

⁵⁷ Ma ke ka Zhəwif shɛ: «Tsetsenya ne, kenaka na kakekave va mcɛfemsə we, ama nahe na kenakɛ Abraham pa na?»

⁵⁸ Ma ke Yɛsə: «Kaganda ne, ma 'ya sha gheyɛ: ma nda teya Abraham: 'Ya ya ka'ya.»

⁵⁹ Pa hɛ tsehave pelɛ kabeza Yɛsə. Pa Yɛsə wəfərənyɛ, pa yitenyɛ shave mbe ghɛa Shala.