Zhaŋe 5 - Ghena ta Shala

Yɛsə kambe nde mte mtea geva mbe Zhɛrəzalɛm

¹ Kwetere wəmbəa ŋkɛ ne, gəsəkə nya kese te shia nci yamene ka Zhəwif. Pa Yɛsə dzeme Zhɛrəzalɛm.

² Pelɛagha, takwa yitea mɛ degha ta Timɛti ne, kwete ŋkwa kepɛ nya heka ka Zhəwif kaBɛtesayida le ghena ta nci ya tagha. Gelɛŋka ya mcɛfe mɛa yɛməa shɛ.

³ Kwele kwele ka zereghwe meɓelahe dzeyi mbe gelɛŋka shɛhɛ, ka ghwələa kɛfi, ka gwadarea kɛfi, ka mpə mpəa geva. Gaŋkəɗə ta yɛməa shɛ yaneghe hɛ.

⁴ Kwa nza ŋkɛ kasawa nde ghwene ta Nde sleke ŋkwa pelɛ ghweme mbe kweci və kadzawa ŋkwa shɛ kezha gaŋkəɗə yɛmə. Ma wəndə nya keghate kadzawa yɛməa shɛ te və nya gaŋkəɗəte geva ŋkɛ ne, kambe ŋkɛ, ya tsemanyɛ zereghwe ta ŋkɛ.

⁵ Kwete wəndə nya kemenete va mahekenemsə degheseghəmbe te zereghwe ya tagha.

⁶ Kwa nakɛ wəndəa shɛ Yɛsə meɓelahe ba'a kwa gezete nda mbeli kwele kwele temə zereghwea shɛ te ne, ma ke shɛ: «Kaɗe na kambe na?»

⁷ Ma ke nde zereghwea shɛ shɛ: «Nde sleke ŋkwa, wəndə shɛ te 'ya kezha ve ɗa hwa yɛmə te vəa nya gaŋkəɗə ŋkɛ we. Ma nda tedzawa 'ya ne, nahe kwete wəndə kekelehwe kema va 'ya.»

⁸ Ma ke Yɛsə shɛ: «Sate, kelete gezle ta ŋa ba'a dzeghwa.»

⁹ Te ŋkwa shɛnyɛ, pələsə wəndəa shɛ. Pa kelete gezle ta ŋkɛ, ntake ŋkɛ kadzeghwa. Te veci kezhɛne mpi menete geva ŋkɛ.

¹⁰ Ma ke ka Zhəwif sha wəndə nya mbete Yɛsə: «Nahe ŋkwa kenza hwa veci kezhɛne mpi, hweŋkwa va gha kakele gezle ta ŋa we.»

¹¹ Ma ke sha hɛ: «Ma ke wəndə nya kembete ɗa sha 'ya: Kelete gezle ta ŋa ba'a dzeghwa.»

¹² Ma ke hɛ 'yɛwete ve: «Wa sləa nyagha wəndə nya kegeze: Kelete gezle ta ŋa ba'a dzeghwa ke wa?»

¹³ Ama keɗepe wəndə nya kembete ŋkɛ wəndəa shɛ, va nya shavenyɛ Yɛsə hwa mbeli nyi tagha tipə tipə we.

¹⁴ Kwetere wəmbəa ŋkɛ, begeme Yɛsə le wəndəa shɛ mbe ghɛa Shala. Ma ke shɛ: «Nahe na kembe tsetsenya. Zhɛnema na kemene jaɗafa yagha kwete wəsə nya ndiremi ma kamenete ŋa geva ma.»

¹⁵ Ntəŋə wəndəa shɛ kalə sha ka Zhəwif, ma ke sha hɛ: «Yɛsə nde mbete ɗa.»

¹⁶ Tagha gɛ, pa ka Zhəwif ghate ghweze mɛ hwa Yɛsə, va nya mbete ŋkwa ŋkɛ te veci kezhɛne mpi.

¹⁷ Ma ke Yɛsə sha hɛ: «Keveci keveci mene slene Yiteyɛ ɗa, tsagha mene slene 'ya perə.»

¹⁸ Va ghena nya gezete ŋkɛ kala nya, ntəŋə ka Zhəwif kasepa ntsehwele kepesle Yɛsə. Kenza deke va nya dzawanyɛ wəmbəa wəsə mahalegə te veci kezhɛne mpi we, ama va nya gezete ŋkɛ nahe Shala kenza kaYitenyɛ ba'a va nya yipəte ghəa ŋkɛ le Shala.

Berete ta Wəzege ta Shala

¹⁹ Ma ke Yɛsə sha hɛ: «Kaganda ne ma 'ya sha gheyɛ: kamenete kwete wəsə Wəzege le ghəa ŋkɛ we, nda nya nakɛ ŋkɛ kamene Yitenyɛ yamene ŋkɛ. Ma pɛtɛa wəshi nyi mene Yita ne, kamene hɛ Wəzege perə.

²⁰ Kwa nza ŋkɛ kaɗe Wəzege Yita ba'a kancɛ nda pɛtɛ wəshi nyi mene ŋkɛ ŋkɛ. Katencɛ nda kweci ŋkɛ slene za ma ke nyi kamene, hehake tenza yɛ te wəshia shɛhɛ.

²¹ Kala nya kelakame mbeli Yita same kwa kwele ba'a nya ve nda mpi ke hɛ ne, tsagha temene Wəzege perə, kave nda mpi ŋkɛ ke wəndə nya ɗe ŋkɛ.

²² Kameha ghwə Yita te wəndə we, nahe ŋkɛ kendeke nda berete kemeha ghwə ke Wəzege,

²³ yitea hawe mbeli pɛtɛ va Wəzege kala nya hawe hɛ va Yita. Yayata wəndə nya keɗema kahawe va Wəzege ta Shala ne, kahawe ŋkɛ va Yita nya keghweneke ŋkɛ perə we.

²⁴ Kaganda ne, ma 'ya sha gheyɛ: yayata wəndə nya kefa ghena ta ɗa, nya keyɛ wəndə nya keghweneke ɗa ne, mpi nya kaghala ghala ya ve. Kateve nda geva fete we, ama nahe ŋkɛ keshave mbe mte kadzembe mpi.

²⁵ Kaganda ne, ma 'ya sha gheyɛ: katese veci, nahe vəa shɛ kese tsetsenya, nya tefa heka ta Wəzege ta Shala mbeli nyi kempə mpə. Ma mbeli nyi keveyite sleme yitea heka ta ŋkɛ ne, teghweme tenza hɛ.

²⁶ Kala nya nza mpi mbe Yita le ghəa ŋkɛ, tsagha ndeke nda ŋkɛ ke Wəzege kanza mbe perə.

²⁷ Nahe ŋkɛ kendeke nda berete kemeha ghwə ke Wəzege, va nya nza ŋkɛ kaWəzege ta za.

²⁸ Nzama yɛ hehake te wəshi nyi ma, tewəmbəreke katese və nya tefa heka ta ŋkɛ mbelia kwahɛɗi.

²⁹ Katesame mbeli nyi kemenete wəshi ganji kwa kwele kezha mpi nya kaghala ghala, ama katesame mbeli nyi kemenete wəsə kwa ndiremi kezha meha ghwə.

Ghena nyi kenegha fete yitea Yɛsə

³⁰ Kashɛ 'ya mene kwete wəsə le ghəa ɗa we. Kala nya gezete ɗa Shala meha ghwə 'ya. Tiɗiɗi ghwə nya meha 'ya te mbeli, kwa nza ŋkɛ wəshi nyi ɗe 'ya yamene 'ya we, ama wəshi nyi ɗe wəndə nya keghweneke ɗa.

³¹ Ma nda 'ya nde neghate fete yitea ghəa ɗa ne, nza kanewe yɛ kakaganda we.

³² Kwete wəndə nya kenegha fete yitea 'ya ya shɛ. Nahe 'ya keɗepe kaganda ghena nya gezete ŋkɛ te 'ya.

³³ Nahe yɛ keghweneghe nda mbeli ke Zhaŋe. Nahe ŋkɛ keneghate fete yitea kaganda.

³⁴ Ma 'ya ne, katsakɛ ɗa negha fete ta wəndə ŋelɛ we. Ama yitea mbele ŋayɛ yɛ nda gezete 'ya tsagha.

³⁵ Kala paterela nya kewaŋe ŋkwa se Zhaŋe. Nahe yɛ keɗehwe zlama yitea waŋe ta ŋkɛ kavə ɓɛhwɛ.

³⁶ Ama kwete wəsə kenegha ɗa fete ya shɛ za ma ke ŋa Zhaŋe, slene nya mene 'ya, nya ndeke ɗa Shala kamene, nde geze ghena te 'ya ba'a nde ncɛ nda ke mbeli Yita nde ghweneke ɗa.

³⁷ Kanegha fete Yita nya keghweneke ɗa yitea 'ya perə. Kegha yɛ kafa mɛa ŋkɛ we, kegha yɛ kanakɛ kema ta ŋkɛ we.

³⁸ Kave ghena ta ŋkɛ yɛ kwa wənəa ŋayɛ, va nya ɗema yɛ keyɛte wəndə nya ghweneke ŋkɛ we.

³⁹ Kazele zeweve ta ghena nyi mbe Ghena ta Shala va nya zəzə yɛ katekemave mpi nya kaghala ghala yɛ mbe hɛ. Ama ghena ta ɗa yancɛ ŋayɛ Ghena ta Shala nya jaŋga yɛ.

⁴⁰ Ama gheyɛ, kaɗe yɛ kase sha 'ya kezha kemave mpi nya kaganda we.

⁴¹ Kaɗe zləvə nya ve mbeli te 'ya 'ya we.

⁴² Ama nahe 'ya keɗepe ŋayɛ: ɗe kezha Shala shɛ kwa wənəa ŋayɛ we.

⁴³ Te sləa Yiteyɛ ɗa se 'ya, ama kekemaneve ɗa yɛ we. Ama kese kwete wəndə le ɗe ta ŋkɛ ne, kakemane ŋkɛ yɛ.

⁴⁴ Kaɗe yɛ kave zləvə te ghəa ŋkɛ kwelɛ ghəa ŋayɛ, ama kazele zləvə nya kese va Shala kwetɛŋenyɛ yɛ we. Tsema nza yɛ kayɛte ɗa wa?

⁴⁵ Zəzəma yɛ 'ya nde teve ŋayɛ fete kwa kema ta Yita ma. Ma wəndə nya keteve ŋayɛ fete ne, Moyize nya veyi zəzə ta ŋayɛ yɛ te.

⁴⁶ Ma nda nahe yɛ keyɛte Moyize, nza kateyɛ ɗa yɛ perə, va nya nza ŋkɛ te 'ya rafete ghena Moyize.

⁴⁷ Ma kala nya sema yɛ kayɛ ghena ta ŋkɛ ne, tsema nza yɛ kayɛte ŋa ɗa wa?»