Zhaŋe 11 - Ghena ta Shala

Mte ta Lazare

¹ Kwete wəndə nya nza sləa ŋkɛ kaLazare ya shɛ shewə. Nde Bɛtani ŋkɛ, meleme ta yɛ Mari le wəzha ta meghekɛ Marte.

² Maria shɛ nde fikɛ seɗa ta Nde sleke ŋkwa le 'wərdə, pa sehwemte le shintia ghəa nta. Wəza meghekɛ Lazare yashewə.

³ Pa ŋwalea kwɛa meghekɛ nyi ghwenakɛ nda mɛ ke Yɛsə, ma hɛ: «Nde sleke ŋkwa, shewə mcɛ ŋa nya ɗe na kala mpi tsetsenya.»

⁴ Ma kwa fate ghena shɛ Yɛsə kala nya ne, ma ke: «Zereghwe ta ŋkɛa shɛ ne, zereghwe kemte ŋkɛ we, ama nahe ŋkɛ kemenete geva yitea newe zləvəa Shala mbeli te, laka gheŋkɛ tekemave zləvə Wəzege ta Shala perə.»

⁵ Kwele kwele ɗe yɛ Marte le Mari Yɛsə, tsagha wəza megheyɛa nci Lazare.

⁶ Ma kwa fate zereghwe ta Lazare Yɛsə ne, mba ŋkɛ te ŋkwa nya nza shɛ ŋkɛ kahɛ bake.

⁷ Kwetere wəmbəa ŋa ŋkɛ, ma ke sha mbeli nyi ketəkwə təkwə: «Ngara ɓəmə kadzawa Zhəwdɛ zhɛkwa.»

⁸ Ma ke hɛ shɛ: «Rabi, kwa te nantse se ka Zhəwif kazele ŋa yitea beza ŋa le pelɛ, gheɓəmə kadzeme te sebe zhɛkwa pa na?»

⁹ Ma ke Yɛsə: «Ashɛ lerə meŋe bakeghəmbe mbe vəghwə wəka? Wəndə nya kedzeghwa heveci ne, katsa tehene we, va nya newe waŋea ŋkwa nya te hɛɗi nya ŋkɛ.

¹⁰ Ma wəndə nya kedzeghwa heviɗi ne, katsa ŋkɛ tehene va nya ɗema waŋe shɛ kwa ntsə ta ŋkɛ.»

¹¹ Kwetere wəmbəa ghena nya, ma ke Yɛsə: «Yitea hɛ mcɛ ɓə Lazare, lə 'ya kafeɗeghete.»

¹² Ma ke mbeli nyi ketəkwə təkwə shɛ: «Ma nda tehɛ ŋkɛ ne, pələsə tenza ŋkɛ tsagha wəka?»

¹³ Mte ta Lazare yaɗe Yɛsə kageze nda ke hɛ, ama ma ke mbeli nyi ketəkwə təkwə le ŋa nci: «Hɛa shɛ yahɛ Lazare fate.»

¹⁴ Ma ke Yɛsə gezete nda dazhɛ dazhɛ ke hɛ: «Nahe Lazare kemte.

¹⁵ Zlama ya va 'ya te ghəa ŋayɛ kwa ɗema 'ya tagha nda mtenyɛ ŋkɛ. Tsagha ne, kateyɛ ɗa yɛ. Ama mbi mə kalə shɛ.»

¹⁶ Tagha gɛ, ma ke Tomas, nya nza sləa ŋkɛ kaKwalegha sha kweci mbeli nyi ketəkwə təkwə Yɛsə: «Ngara ɓəmə perə kamte le.»

Yɛsə ya kasame kwa kwele ba'a mpi

¹⁷ Nda kekave ŋkwa shɛ Yɛsə, nahe Lazare kehɛ wəfaɗe kwa kwele.

¹⁸ Takwa takwa Bɛtani yitea Zhɛrəzalɛm, gare kilemɛtre mahekene ya kwelɛ hɛ.

¹⁹ Kwele kwele ka Zhəwif nyi kesawa pelɛ Zhɛrəzalɛm yitea njiŋwe yɛ Marte le Mari va mte ta wəza megheyɛa nci.

²⁰ Ma kwa fa se ta Yɛsə Marte ne, cape nde kalə yitea begeme hɛ le kwa hweŋkwa. Ama ki ghɛ ntishɛ nda Mari kwa ŋa nta.

²¹ Ma ke Marte sha Yɛsə: «Nde sleke ŋkwa, ma nda teke na ne, nza katemte wəza meyɛ ɗa we.

²² Ama nahe 'ya keɗepe, ya tsetsenyanyɛ ŋkɛ, yayata wəsə nya 'yɛwe na va Shala ne, kateve ŋa ŋkɛ.»

²³ Ma ke Yɛsə shɛ: «Katesame wəza meyɛ ŋa kwa kwele le mpi.»

²⁴ Ma ke Marte: «Nahe 'ya keɗepe, katesame ŋkɛ kwa kwele le mpi vəa ŋkwa nya tesame mbelia kwahɛɗi kwa kwele.»

²⁵ Ma ke Yɛsə: «'Ya ya kasame kwa kwele ba'a kampi. Ma wəndə nya keyɛte ɗa ya tsemanyɛ mtenyɛ ŋkɛ ne, katenza ŋkɛ teghweme.

²⁶ Yayata wəndə nya teghweme nya keyɛte ɗa, katemte ŋkɛ kaghala ghala we. Nahe na keyɛte na?»

²⁷ Ma ke Marte shɛ: «Kaganda ŋa Nde sleke ŋkwa, gha ya kaMɛsi, Wəzege ta Shala nya geze se ta ŋkɛ mbeli ghalanza te hɛɗi.»

Yɛsə kanehwene

²⁸ Ma kwa gezemte ghena Marte kala nyagha, cape nde kalə kaheka wəzha ta meghekɛ Mari, ma ke shɛ ɓɛhwɛ ɓɛhwɛ: «Teke Nde sleke ɓəmə, kaheka ŋa ŋkɛ.»

²⁹ Ma kwa fate ghena shɛ Mari, pelɛhetɛme nde, ntəŋə nde kahe kahe kalə sha Yɛsə.

³⁰ Kenaka Yɛsə kadzembe meleme we, mbanyɛ ŋkɛ te ŋkwa nya begeme hɛ le Marte.

³¹ Ma kwa nakɛ shave ta Mari hɛ kahe kahe, ntəŋə ka Zhəwif nyi kese katsa nda ɗese va mte ta wəza meghekɛ hwe sebe ta nta. Ma ke hɛ mbe ghəa nci: «Gheŋkɛ dzeme kwele kanehwene pelɛagha.»

³² Pɛkwe ma ta Mari sha Yɛsə, gwəɗəŋə nde mbe kema ta ŋkɛ: «Nde sleke ŋkwa, ma nda teke na veci ŋkwa shɛ ne, nza katemte wəza meyɛ ɗa we.»

³³ Kwa nakɛ Mari Yɛsə kanehwene ba'a kweci ka Zhəwif nyi kese le kanehwene ne, kazhɛ nda wənəa ŋkɛ kwele kwele, kwetɛ kwetɛŋe mehele ta ŋkɛ.

³⁴ Ma ke sha hɛ: «Tema lamte ŋkɛ yɛ wa?» Ma ke hɛ: «Nde sleke ŋkwa, nde nakɛma gi!»

³⁵ Ntake Yɛsə kanehwene.

³⁶ Ma ke ka Zhəwif: «Newe ma mə ɗe nya ɗe wəndəa shɛ ŋkɛ gi!»

³⁷ Ma ke kweci: «Ashɛ gheŋkɛ nde pelemte nda ntsə ke kwete ghwələ vecagha wəka? Va wa ɗema ŋkɛ fɛake Lazare kemte tsagha wa?»

Lazare kelakame geva same kwa kwele le mpi

³⁸ Kwetɛ kwetɛŋe mehele ta Yɛsə zhɛkwa, ntəŋə ŋkɛ kalə kadzemɛa kwele. Mbe zlera kwelea shɛ, pa kwete pelɛ kewəbanyɛ mɛ.

³⁹ Ma ke Yɛsə: «Pəŋəmte mə pelɛa shɛ.» Ma ke Marte, wəzha ta meghekɛa wəndə nya kemte: «Nde sleke ŋkwa kedaɗə daɗə tenza ŋkɛ, kwa nza ŋkɛ hɛ wəfaɗe menete ŋkɛ kwa kwele.»

⁴⁰ Ma ke Yɛsə zhɛnete nda: «Ma 'ya gezete ŋa: Ma keyɛte na ne, katenewe zləvəa Shala na.»

⁴¹ Pa mbeli tsəkwəmte pelɛa shɛ. Slete Yɛsə sletete kema yitea ghweme, ma ke: «Yita, hana 'ya sha gha, va nya fate səkwə ta ɗa na.

⁴² Nahe 'ya keɗepe kafa səkwə ta ɗa na keveci keveci. Ama deke yitea mbeli nyi teke yitea 'ya geze 'ya, yitea ɗepe hɛ kaganda gha nde ghweneke ɗa kase.»

⁴³ Kwa sebe ta ŋkɛ, ma ke Yɛsə zlapete: «Lazare, same kwagha.»

⁴⁴ Pa wəndə kemte mte same kwa kwele. Kepeɗe peɗe yɛ dzeve ta ŋkɛ le seɗa ta ŋkɛ mbe zlave nyi lamte mbeli le. Dəmbəli mbəli kema ta ŋkɛ tepeɗe. Tagha gɛ, ma ke Yɛsə: «Pelemte mə ŋkɛ ba'a sərəakɛ mə ŋkɛ kaslə.»

Ka Zhəwif nyi jama jama katsa ghena kapesle Yɛsə

⁴⁵ Kwele kwele kweci ka Zhəwif nyi kese katsa nda ɗese ke Mari, nyi keyɛte Yɛsə kwa nakɛ wəshi nyi menete ŋkɛ hɛ.

⁴⁶ Cape kweci ka Zhəwif kalə kageze nda wəshi nyi menete Yɛsə ke ka Fariziyɛn.

⁴⁷ Pa ka Fariziyɛn le mbeli nyi te ghəa ka dzeghe Shala tsenete mbelia jama nyi te ghə, ma ke hɛ: «Tsema temene gheɓəmə le wəndə nya wa? Kwele kwele wəshi meŋele nyi mene ŋkɛ.

⁴⁸ Ma kesərəakɛ gheɓəmə kamene kala nya ne, kateyɛ ŋkɛ mbeli pɛtɛ, kwetere wəmbəa ŋkɛ, katese ka Rome kabeze ghɛa Shala ta ɓəmə ba'a hɛɗia ɓəmə.»

⁴⁹ Pa kwete wəndə sate hwa hɛ, Kayife sləa ŋkɛ. Gheŋkɛ wəndə kwelea ka dzeghe Shala te va shɛ. Ma ke sha hɛ: «Kafa wəsə yɛ tɛape we,

⁵⁰ keɗepe yɛ, jara ma mtenyɛ wəndə kwetɛŋe te ŋkwa mbeli kwele kwele ba'a te ŋkwa pɛtɛa hwelefe wəka?»

⁵¹ Shave mbe ghəa ŋkɛ ghena nya gezete ŋkɛ we, ama va nya nza ŋkɛ kawəndə kwelea ka dzeghe Shala te va shɛ ne, nahe ŋkɛ kegezete ghena kelɛŋə tsema tsema hi Yɛsə kamte kezha mbele hwelefe ta ka Zhəwif,

⁵² kenza deke kezha hwelefe ta ka Zhəwif we, ama kezha jikə ŋwalea Shala nyi ketazemte geva kanya kwetɛŋe.

⁵³ Se te vecia shɛ tarete mte ta Yɛsə mbelia jama ta ka Zhəwif.

⁵⁴ Vatse ɗema Yɛsə kezhɛne se kadzeghwa hwa mbeli darahwe rahwe hwa ka Zhəwif. Cape ŋkɛ slə te ŋkwa shɛ kadzembe meleme nya takwa takwa yitea gamba, nya heka mbeli kaƐfrayim. Ntishɛ ŋkɛ pelɛagha le mbeli nyi ketəkwə təkwə.

⁵⁵ Takwa takwa gəsəkəa Pake ta ka Zhəwif. Kwele kwele mbeli shave mbe kweci meleme kadzeme Zhɛrəzalɛm kezha yaɓe ghəa nci wɛŋe nda tegha geva gəsəkə.

⁵⁶ Ntake hɛ kazele Yɛsə. Ma ke hɛ kwelɛ ghəa nci kwa nza hɛ mbe ghɛa Shala: «Tsema pe yɛ wa? Katese ŋkɛ fate yitea gəsəkə nya na, na, kaɗema ŋkɛ se na?»

⁵⁷ Ma ke mbeli nyi te ghəa ka dzeghe Shala le ka Fariziyɛn: «Yayata wəndə nya kenakɛ Yɛsə ne, ncɛ yancɛ ŋkɛ yitea kese mbeli.»