Zhaŋe 10 - Ghena ta Shala

Ghena keyipə pa ta nde ya wəshi

¹ Ma ke Yɛsə: «Kaganda ne, ma 'ya sha gheyɛ: keɗema wəndə kedzawa zlema dzawa kwa mɛa ŋkɛ, pa dzawanyɛ laka kwete ŋkwa ne, ghərə ŋkɛ, mefətekwə ŋkɛ.

² Ama wəndə nya kedzawa kwa mɛa zlema, gheŋkɛ ya kawəndə nya keya timɛti.

³ Katepele nda ŋkwa wəndə nya keya zlema heviɗi. Katefa mɛa ŋkɛ timɛtia ŋkɛ kwa heka hɛ ŋkɛ keslə keslə kashave te ŋwela.

⁴ Ma kwa ŋkaghe hɛ ŋkɛ kajive te ŋwela ne, ntəŋə ŋkɛ te kema ta nci. Cape hɛ hwe sebe ta ŋkɛ, kwa ɗepe mɛa ŋkɛ hɛ.

⁵ Katəkwə təkwə wəndə nya ɗepema hɛ hɛ we, hwɛ yahwɛ hɛ ve kwa ɗepema mɛa ŋkɛ hɛ.»

⁶ Yɛsə gezete nda ghena keyipə pa nya ke hɛ, ama kefa wəshi nyi gezete Yɛsə mbe hɛ we.

Yɛsə ya kande ya wəshi ganyɛ

⁷ Ma ke Yɛsə sha hɛ: «Kaganda ne, ma 'ya sha gheyɛ: 'ya ya kamɛa zlema ta timɛti.

⁸ Ma mbeli nyi kese mpelɛa ke 'ya pɛtɛ, ka ghərəa kɛfi ba'a ka mefətekwə hɛ. Kese timɛti fa ghena ta nci we.

⁹ 'Ya ya kamɛa zlema, yayata wəndə nya kedzeki ghɛ laka 'ya ne, katembele ŋkɛ. Wərə ŋkɛ kadzeki ba'a kashave, katekemave wəshi kezeme ta ŋkɛ ŋkɛ.

¹⁰ Ma ghərə ne, deke yitea ghərə, pesle ŋkwa ba'a kezha za sebe se ŋkɛ. 'Ya le ghəa ɗa ne, nahe 'ya kese yitea kemave mpi mbeli, yitea kemave hɛ kwele kwele.

¹¹ 'Ya kande ya wəshi ganyɛ. Nde ya wəshi ganyɛ nya keza mpia ŋkɛ kezha timɛtia ŋkɛ.

¹² Ma wəndə nya səkwəve mbeli kaya wəshi, ma kenakɛ deghwava ŋkɛ kase ne, pa hwɛnyɛ mba timɛti. Ntake deghwava kakese kweci dzate hwa hɛ, kwetɛ kwetɛŋe tazemte hɛ.

¹³ Hwɛ yahwɛ wəndəa shɛ va nya nza ŋkɛ yitea cɛdɛ mene slene ŋkɛ. Ketsakɛ ghena ta timɛti we.

¹⁴ 'Ya ya kande ya wəshi ganyɛ. Nahe 'ya keɗepe timɛtia ɗa, nahe hɛ keɗepe ɗa,

¹⁵ kala nya ɗepe ɗa Yiteyɛ ɗa ne, tsagha ɗepe Yiteyɛ ɗa 'ya. Kaza mpia ɗa 'ya tewəmbəreke timɛtia ɗa.

¹⁶ Le kweci timɛti va 'ya nyi kenakama dzawa zlema ta ɗa kaba. Ama kateŋka hɛ 'ya kadzawa. Katefa mɛa ɗa hɛ, kwetɛŋe tenza zlema ta nci, kwetɛŋe nde ya hɛ.

¹⁷ Kaɗe ɗa Yita va nya yɛhwe mte 'ya, katekemave mpia ɗa 'ya zhɛkwa.

¹⁸ Wəndə shɛ kakelehwe mpia ɗa le berete we, le ɗe ta ghəa ɗa nda mte 'ya. Berete keza mpia ɗa va ya shɛ va 'ya, berete kezhɛneke mpia ɗa ya shɛ va 'ya. Shala Yita nde gezete ɗa kamene kala nya.»

¹⁹ Pa ka Zhəwif neheve geva mbe te ghena nya gezete Yɛsə.

²⁰ Ma ke kweci kwele kwele hwa hɛ: «'Yi'yɛghwə nde zhɛ nda yitea ghə, gezhi ŋkɛ. Wa raberə fa ghena ta ŋkɛ yɛ wa?»

²¹ Ma ke kweci: «Kageze ghena nde 'yi'yɛghwə kala nya na? Kaghwenemte ntsə ta wəndə nya kaghwələ nde 'yi'yɛghwə na?»

Ka Zhəwif kaɗema ghena ta Yɛsə

²² Te kwete veci, pa kwete gəsəkə menete geva mbe Zhɛrəzalɛm hefeghwe, gəsəkə nya zəzə ŋa ta ghɛa Shala mbeli te.

²³ Kadzeghwa Yɛsə dzeyi mbe kwete ŋkwa nya heka mbeli kagelɛŋka ta Salomon.

²⁴ Dzasle ka Zhəwif dzaslete, ma ke hɛ shɛ: «Hweŋkwa tencɛ n'yɛ ghəa ŋa na, mba ghen'yɛ kezəzə bake bake wa? Kenza nde gha Mɛsi, wəndə nya ghweneke Shala, gezete n'yɛ fəyitekeghə gi!»

²⁵ Ma ke Yɛsə sha hɛ: «Nahe 'ya kegezete ŋayɛ, kese yɛ kayɛ we. Slene nyi mene 'ya kala nya gezete ɗa Yiteyɛ ɗa ne, ghenci ka negha fete yitea 'ya.

²⁶ Ama gheyɛ ne, ashɛ yɛ kayɛ we, va nya ɗema yɛ katimɛtia ɗa.

²⁷ Kafa mɛa ɗa timɛtia ɗa, nahe 'ya keɗepe hɛ, katəkwə təkwə ɗa hɛ.

²⁸ Kave nda mpi nya kaghala ghala 'ya ke hɛ. Kaza hɛ tɛape we. Wəndə shɛ kazləgwəhwe hɛ shave mbe dzeve ta ɗa we.

²⁹ Kwele ma Yiteyɛ ɗa nya kendeke ɗa hɛ ke wəshi pɛtɛ. Wəndə shɛ kezləgwəhwe kwete wəsə mbe dzeve ta Yita we.

³⁰ Kanya kwetɛŋe n'yɛ le Yita.»

³¹ Pa ka Zhəwif hwepete wənə zhɛkwa, pa hɛ tsehake pelɛ kabeza Yɛsə le.

³² Ma ke Yɛsə sha hɛ: «Kwele kwele wəshi ganji nyi menete 'ya kwa ntsə ta ŋayɛ le berete ta Yita. Yitea nyama hwa hɛ ɗe yɛ kabeza ɗa wa?»

³³ Ma ke ka Zhəwif shɛ: «Va nya menete wəshi ganji na nda ɗe n'yɛ kabeza ŋa we, ama va nya ŋ'wəshi Shala na, kwa yipə ghəa ŋa na le Shala, gha wəndə ŋelɛ gəmə.»

³⁴ Ma ke Yɛsə sha hɛ: «Nahe ŋkɛ kerafete geva mbe palepa ta wəshi mahalegəa ŋayɛ vəashi, ma ke Shala gezete: Gheyɛ ya kakweci shala.

³⁵ Nahe mə keɗepe ɓiyitsa, wəsə nya gezete Shala ne, kakelemte geva ŋkɛ we, kashala yɛ ke Shala sha mbeli nyi geze nda geva ghena ta ŋkɛ.

³⁶ Ama 'ya ne, nahe Shala keveyi ɗa tekeleke ba'a keghweneke ɗa kasawa te hɛɗi. Tsema geze yɛ ŋele yaŋele Shala 'ya pe yɛ va nya gezete 'ya kaWəzege ta Shala 'ya wa?

³⁷ Ma keɗema 'ya kamene slene ta Yiteyɛ ɗa ne, yɛma ghena ta ɗa yɛ ma.

³⁸ Ama kwa nza ŋkɛ slenea shɛ yamene 'ya, ya kwela ɗema yɛ kayɛ ɗa ne, yɛ mə wəshi meŋele nyi mene 'ya ɓetəkə gi. Tagha gɛ, kateɗepe yɛ megela mbe 'ya Yita ba'a mbe Yita 'ya.»

³⁹ Ntake hɛ kaɗe kakese zhɛkwa, pələsə Yɛsə mbelenyɛ shave mbe dzeve ta nci.

⁴⁰ Pa Yɛsə zhɛneghe geva kajive te kema ta hələa Zhəwrdɛŋe, te ŋkwa nya ghate Zhaŋe kamene nda batɛme ke mbeli. Pa ntishɛnyɛ pelɛagha.

⁴¹ Tipə tipə mbeli tseneke nda geva te ŋkwa shɛ, ma ke hɛ: «Kegha Zhaŋe menete wəsə meŋele ya kwetɛŋe we, ama kaganda yayata ghena nya gezete ŋkɛ te wəndə nya.»

⁴² Kwele kwele mbeli nyi keyɛ Yɛsə te ŋkwa shɛ.