Zhake 2 - Ghena ta Shala

Ntama ghala kwelɛ mbeli

¹ Ka kesaka ma, ma gheyɛ mbeli nyi mbe yɛ ta Nde sleke ɓəmə Yɛsə Kriste, nya nza zləvə te ne, kehi kanta ghala yɛ kwelɛ mbeli we.

² Banda ta ŋkɛ, pa nde mcɛlə nya nza lekwesa ganyɛ kənə le ŋgwedɛba mze kwa tɛawetɛa te dzeve ve se kadzembe cɛ hwa tsene ta ŋayɛ, pa nde titikwə le lekwesa nya kameha kənə se kadzembe perə.

³ Pa yɛ hawete nda hawe ke nde mcɛlə nya nza lekwesa ganyɛ kənə, ma pe yɛ shɛ: «Ntishɛ ŋa te tsəkwələ nya», ama ma pe yɛ sha nde titikwə: «Meslete nza 'ya pa, sha gha nde, keɗe na ne, pa na ntishɛ ŋa te hɛɗi nya yitea seɗa ta ɗa»,

⁴ ashɛ ghala yanta yɛ kwelɛ mbeli tsagha wəka? Nahe yɛ kezhɛre kaka negha fete nyi kaka ghemea ghemea ntsə tsagha wəka?

⁵ Fate mə ghena ta ɗa ka kesaka ma, nahe Shala ketsehave ka titikwəa kɛfi nyi teke te hɛɗi nya kezha nza hɛ kaka mcɛlə laka yɛ ba'a kezha kemave meghe nya pelɛ ghweme hɛ, nya meɗeyi nda Shala ke mbeli nyi keɗe ŋkɛ.

⁶ Ama gheyɛ ne, kaɓelama ka titikwəa kɛfi yɛ. Ashɛ ka mcɛləa kɛfi kasa ŋayɛ yaka ba'a kantsehe ŋayɛ kalə kadzete ghwə wəka?

⁷ Ashɛ ghenci ka yiɗə slə ganyɛ nya ndeke ŋayɛ nya Shala wəka?

⁸ Megela shɛ menete yɛ kenza nde kala wəsə nya gezete wəsə mahalegəa meghea Shala mene yɛ, ma ke mbe Ghena ta Shala: «Kateɗe nde ghedəkwəa ŋa na kala nya ɗe ghəa ŋa na.»

⁹ Ama kenza nde ghala yanta yɛ kwelɛ mbeli ne, kave ŋayɛ fete wəsə mahalegə va nya ɗema yɛ kese kahawe ve.

¹⁰ Kwa nza ŋkɛ, ma keɗema wəndə keyɛte nda fete ke wəsə mahalegəa Shala kwetɛŋe ne, nahe wəndəa shɛ keɗema yɛ nda fete ke kweci nyi ketene.

¹¹ Kwa nza ŋkɛ ne, ma ke Shala: «Valema na tahe ma.» Ama ma ke ɓiyitsa: «Peslema wəndə na ma.» Ya gha ɗema kemenete vale tahe, nda peslekɛ wəndə na ne, nahe na kedzawa ŋa wəmbəa wəsə mahalegə.

¹² Nza mə kambeli nyi kegeze ghena ganyɛ ba'a kambeli nyi kemene slene ganji laka wəsə mahalegə nya keve nda nza waɗe ke mbeli.

¹³ Kwa nza ŋkɛ ne, katezhɛ heli Shala vəa ŋkwa nya meha ghwə ŋkɛ te wəndə nya kesema kazhɛ heli yitea kweci mbeli we, ama wəsə shɛ kazhɛne wəndə nya kezhɛ heli kaghazlənə ve mbe meha ghwə we.

Yɛ ba'a mene slene

¹⁴ Ka kesaka ma, ma kegeze wəndə kayɛ Shala ŋkɛ, kaɗema ŋkɛ kamene slene le yɛa shɛ ne, kawəsə ŋkɛ tsagha na? Kaganda nza yɛa shɛ kambelete na?

¹⁵ Banda ta ŋkɛ, kaɗema lekwesa va kwete wəza meyɛ ŋa keɗema wəzha ta meyɛ ŋa, wəsə kezeme va hɛ keveci keveci we.

¹⁶ Ma ghena nya geze nda na ke hɛ ne, wa yaketekɛ hɛ ŋkɛ le wa? Ma pa na: «Kwiɗi mə kwelɛŋe, sepa mə wəshi kezeme ta ŋayɛ le ghəa ŋayɛ le wəshi keseɗe ta ŋayɛ», ashɛ na kendeke nda wəshia shɛhɛ ke hɛ, gare nza hɛ le we.

¹⁷ Tsagha shɛ ŋkɛ le wəndə nya nza yɛ ve. Ma keyɛte Shala wəndə kaɗema ŋkɛ kemenete slene le yɛa shɛ ne, kemte mte yɛ ta ŋkɛ tsagha.

¹⁸ Ama ma tegeze kwete wəndə: «Yɛ ya va gha, ama 'ya le ŋa ɗa, slene ya va 'ya.» Tagha ma 'ya sha tezhɛne nda: «Ncɛte ɗa tsema tsema nza yɛ ta ŋa kaɗema le slene, ma 'ya le ŋa ɗa ne, katencɛ ŋa yɛ ta ɗa laka slene nyi mene 'ya.»

¹⁹ Nahe na keyɛte deke kwetɛŋe Shala na? Megela tsagha, tsagha yɛ 'yi'yɛghwə, nahe hɛ keyɛte ŋkɛ perə, kabare bare hɛ va ghazlənə kwa kema ta ŋkɛ.

²⁰ Gezhi na, keɗepe na gəmə yɛ kaghəa ŋkɛ keɗema ŋkɛ jikə le slene wəka?

²¹ Tsema menete Abraham shia ɓəmə nda se Shala kaɗepe kawəndə nya tiɗiɗi kwa kema ta ŋkɛ wa? Ashɛ laka slene ta ŋkɛ kwa veyi wəzege ta ŋkɛ Izak ŋkɛ te reghwetɛ wəka?

²² Nahe na kenakɛ tsema tsema menete slene yɛ ta ŋkɛ laka slene nyi mene ŋkɛ, nahe slenea shɛhɛ kebeghakɛ yɛ.

²³ Kala nya yipəte geva ghena nya gezete Ghena ta Shala, ma ke: «Nahe Abraham keyɛte Shala, pa Shala veyi ŋkɛ kawəndə nya tiɗiɗi kwa kema ta ŋkɛ se te yɛ ta ŋkɛ.» Pa Shala ndeke nda slə kamcɛnyɛ.

²⁴ Nahe yɛ kenakɛ tsema tsema nza wəndə kawəndə nya tiɗiɗi kwa kema ta Shala laka slene ta ŋkɛ nya mene ŋkɛ, kaɗema deke te yɛ nya ve.

²⁵ Tsagha shɛ menete geva ŋkɛ le Rahab, male mefətekwə. Nahe Shala keɗepete kawəndə nya tiɗiɗi nde kwa kema ta ŋkɛ laka slene nya menete nde, kwa kemaneve mbeli nyi ghwenakɛ ka Zhəwif nde ki ghɛa nta ba'a kwa kemanakɛ hɛ nde kezha shave mbe meleme laka kwete hweŋkwa.

²⁶ Kwa nza ŋkɛ kala nya nza geva kemte mte kwa ɗema sefəa mpi mbe ne, tsagha nza yɛ kemte mte kwa ɗema slene yite.