Zakari 6 - Ghena ta Shala

Kwa deghese ta wəsə nya nakɛ ŋkɛ: yɛ wəmata gədəwə wəfaɗe

¹ Kafe 'ya sha ghə zhɛkwa ne, dəkwə 'ya te yɛ wəmata gədəwə wəfaɗe. Dzeghwa yadzeghwa hɛ kwelɛ yɛ ghweme mze kwa ghwə ghwə bake.

² Gədəwə nyi gheme gheme ka ntsehe kwa ghate ta wəmata gədəwə, gədəwə nyi ɗɛkeɗɛa ɗɛkeɗɛa ka ntsehe kwa bake,

³ gədəwə nyi ghwaba ghwaba ka ntsehe kwa mahekene ba'a gədəwə nyi jiɓe jiɓe le kwa gheme ka ntsehe kwa wəfaɗe.

⁴ Ma 'ya 'yɛwete va nde ghwene nya kegeze ɗa ghena: «Wa yaɗe hɛ kancɛ tse wa nde sleke ɗa yawe?»

⁵ Ma ke zhɛnete ɗa: «Ghenci ya kasefə nyi wəfaɗe pelɛ ghweme. Vare Nde sleke hɛɗi pɛtɛ se hɛ. Ma tsetsenya ne, ghenci kaslə.»

⁶ Ntəŋə wəmata gədəwə nya ntsehe gədəwə nyi ɗɛkeɗɛa ɗɛkeɗɛa dzeme laka bela kwa gwela. Ntəŋə gədəwə nyi ghwaba ghwaba jive laka ŋkwa kepəkwə ta veci. Ntəŋə nyi jiɓe jiɓe dzawa laka bela kwa zeme.

⁷ Ntəŋə gədəwə nyi gheme gheme kashave kezha 'yɛwe lə kadzedzeghwamte hɛɗi lema. Ma ke Mahwətə sha hɛ: «Kwiɗi mə kalə kadzedzeghwamte hɛɗi lema.» Tsagha shɛ menete hɛ.

⁸ Pa Mahwətə hekakɛ ɗa, ma ke sha 'ya: «Newema, ma gədəwə nyi kelə nyi laka bela kwa gwela ne, Sefəa ɗa yateve hɛ kənəa hɛɗi nya laka bela kwa gwela.»

Ve ta Zhozəwɛ kameghe

⁹ Ma ke Mahwətə sha 'ya:

¹⁰ «Yɛte wəshi gəmə nyi fəke Hɛlday, Tobiya ba'a Yedaya se va mbeli nyi fəhwe mbeli kaka mavashi. Shave pelɛ Babilone shave hɛ. Katedzeki ghɛa Yosiya, wəzege ta Sefaniya nya nza hɛ ki na ɓeshi nya.

¹¹ Katekele mze kwa ghwə ghwə ba'a mze kwa tere tere na kezha vɛsə derə meghe nya teve nda na mbe ghə ke wəndə kwelea ka dzeghe Shala Zhozəwɛ, wəzege ta Yosadak.

¹² Ma pa na sha tegeze nda: Wa nya ghena nya geze Mahwətə nde berete nya: Wəndə nya nza sləa ŋkɛ kaPese ya shɛ teke, katepese mpi te ŋkwa nya ŋkeɗeyi geva seɗa ta ŋkɛ ba'a gheŋkɛ nde teŋa ghɛa ɗa.

¹³ Kaganda ne, gheŋkɛ nde tezhɛne kaŋa ŋkɛ. Kateseɗe wəshi meghe ŋkɛ, katenza ŋkɛ pelɛ pasla ta ŋkɛ kezha sleke mbeli. Katenza nde dzeghe Shala dzeme vare bela ta ŋkɛ, katefa nda ghena hɛ bake nci ke ghəa nci.

¹⁴ Katenza derə meghea shɛ mbe ghɛa Mahwətə kezha zəzə Hɛlday, Tobiya ba'a Yedaya, ba'a ne, kezha zəzə ganyɛa mehele ta Yosiya, wəzege ta Sefaniya.»

¹⁵ Katese mbeli nyi cakeɗa cakeɗa kakemane ŋkwa va ŋa ta ghɛa Mahwətə. Ma tsagha, kateɗepete yɛ Mahwətə nde berete nde ghweneke ɗa sha gheyɛ. Pɛtɛ temene geva wəshi nyi kenza yɛ kayɛ nda fete kaganda ke Shala Mahwətə ta ŋayɛ.