Zakari 3 - Ghena ta Shala

Kwa wəfaɗe ta wəsə nya nakɛ ŋkɛ: Zhozəwɛ, wəndə kwelea ka dzeghe Shala

¹ Pa Mahwətə ncɛte ɗa Zhozəwɛ, wəndə kwelea ka dzeghe Shala meslete kwa kema ta nde ghwene ta Mahwətə. Meghereŋe Gətəli te kwa zeme kezha ve nda fete.

² Ma ke nde ghwene ta Mahwətə sha Gətəli: «Pa Mahwətə ŋzlete ŋa mɛ Gətəli, kaganda ne, ŋzlete ŋa mɛ ŋkɛ, gheŋkɛ nya kentave Zhɛrəzalɛm! Ashɛ kala metəlikeghwə Zhozəwɛ wəka?»

³ Meslete Zhozəwɛ kwa kema ta nde ghwene mbe lekwesa nya kareɗa.

⁴ Pa nde ghwenea shɛ gezete nda ke mbeli nyi yite kezha seɗemte lekwesa shɛ kənə. Kwa sebe ta ŋkɛ, ma ke sha Zhozəwɛ: «Newema, nahe 'ya keseɗemte ŋa jaɗafa ta ŋa kezha seɗe ŋa karalame.»

⁵ Pa ŋkɛ gezete kapeɗe nda ghə mbeli ke Zhozəwɛ le zlave nya wɛŋe. Pa mbeli peɗekɛ nda ghə le zlave nya wɛŋe ba'a seɗete nda lekwesa kwa ntsə ta nde ghwene ta Mahwətə.

⁶ Ma ke nde ghwene ta Mahwətə sha Zhozəwɛ ɓiyitsa:

⁷ Wa nya ghena nya geze Mahwətə nde berete nya: «Ma keyate wəshi mahalegəa ɗa na ba'a kemenete wəshi nyi gezete 'ya na ne, gha nde tenza te ghəa ghɛa ɗa ba'a ŋwela nyi dzeyi yite, kateve ŋa 'ya hwa mbeli nyi kemene ɗa slene nyi teke.

Katekele nde mene slene ta ŋkɛ Shala kase

⁸ Fa gɛ Zhozəwɛ, gha nya kawəndə kwelea ka dzeghe Shala, fa mə perə, gheyɛ ka dzeghe Shala nyi yite, kwa nza ŋkɛ gheyɛ ya kawəsə kencɛ mbele nya ketese. Katekele nde mene slene ta ɗa 'ya kase, gheŋkɛ yanza sləa ŋkɛ kaPese.

⁹ 'Ya kave pelɛ kwa kema ta Zhozəwɛ, ntsə mberefaŋe ya te pelɛ nya kwetɛŋea shɛ. 'Ya le ghəa ɗa nde terafe wəsə te. Te veci nya kwetɛŋe ne, katekelemte jaɗafa 'ya seyi te hɛɗi nya. 'Ya Mahwətə nde berete nde gezete.

¹⁰ Ma te vecia shɛ ne, kateheheka ghəa ŋayɛ yɛ kadzeyitea yɛ rɛzɛŋe ba'a yɛ dasekwa ta ŋayɛ.» 'Ya Mahwətə nde gezete.