Sofoni 3 - Ghena ta Shala

Kese Zhɛrəzalɛm kafa heka ta Shala we

¹ Wa nya ndiremi te meleme nya kefama ghena nya, nya wale wale nya ba'a nya kesa nda yaka nya ke mbeli gɛ!

² Kese nde kafa heka ta Shala we, kese nde kayɛ wəshi nyi teke nda ŋkɛ we, kese nda kave nda ghə ke Mahwətə we, kese nde kahende nda geva ke Shala ta ŋkɛ we.

³ Nahe mbelia ŋkɛ nyi te ghə kenza kala nivɛrə nyi keghwəghwə, nahe ka meha ghwə ta ŋkɛ kenza kala makwagwele nyi kepəli hetɛhwɛɗi ba'a nyi kewəmbəma wəsə kezeme kamasheke.

⁴ Nahe ka mɛ ŋkwa ta ŋkɛ kenza kaka fege ba'a kaka mbəɗəkwə. Nahe ka dzeghe Shala ta ŋkɛ kekelemte zləvə te wəsə nya keveyi geva tekeleke, nahe hɛ kedzawanji wəmbəa wəsə mahalegə.

⁵ Ma mbe melemea shɛ ne, nahe Mahwətə kenza tiɗiɗi, kamene wəsə kwa ndiremi ŋkɛ we. Kala kiɗi ta ŋkwa ne, kameha ghwə ta ŋkɛ ŋkɛ. Ama kazhɛ nda hawe ke ka 'yaghwa mehele we.

⁶ Ma ke Shala gezete: «Nahe 'ya kezamte sebe te hwelefefia shɛhɛ, nahe 'ya keŋzlamte yɛ ŋkwa ka ya ŋkwa ta nci, nahe 'ya kezhɛrete yɛ hweŋkwa ta nci shaka shaka, nahe 'ya kebezemte yɛ meleme ta nci: wəndə shɛ kazhɛne kadzeghwa keɗema kanza mbe hɛ we.

⁷ Zhɛne ne, ma 'ya sha ghəa ɗa: ‹Katehawe melemea shɛ va 'ya tsetsenya, kateyɛ wəsə nya teke nda 'ya nde gɛ! Tagha gɛ, kateyipə ɗa nyi gezete 'ya te ghəa ŋkɛ 'ya kadzawa we, katebeze ŋkɛ 'ya we.› Ama pa mbeli nyi mbe ntsəte geva kamene wəshi nyi ndiremi ndiremi.»

⁸ Ma ke Mahwətə gezete: «Yawa, neghe mə veci nya tese 'ya kezha ve ŋayɛ fete te gɛ ga! Nahe 'ya ketarete kezha tsene hwelefefi, kezha rəkwə yɛ hɛɗia ka meghe, kezha bete ghwə ta hwepe wənəa ɗa kənəa hɛ. Kaganda ne, kateteremte hɛɗi lema ghwə ta hwepe wənəa ɗa.

Katezhɛre nza ta mbeli Shala

⁹ Kaganda ne, kateyaɓe bəzhia mɛa kweci hwelefefi 'ya. Tagha gɛ, katesəkwə ɗa hɛ pɛtɛ, 'ya Mahwətə ba'a katemene ɗa slene hɛ le wənə kwetɛŋe.

¹⁰ Shave pelɛ kema ta yɛ hələa Ɛtiyopi ne, katefə ɗa wəshi mbeli nyi kehawe va 'ya, mbeli nyi tazemte 'ya.

Zhɛre nza ta Israyɛl

¹¹ Ma te vecia shɛ ne, katezhɛne hawe kazhɛ ŋa va slene nyi ndiremi ndiremia ŋa, va fama ghena ta ŋa laka 'ya we. Kwa nza ŋkɛ ma vəa ŋkwa shɛ ne, katefə ka fege nyi kekele ghə 'ya seyi te hɛɗia ŋa, katefɛa na kemene ŋkele ntsə pelɛ ghweme ta ɗa nya keveyi geva tekeleke.

¹² Katesərə ka dewə ŋeli ba'a ka titikwəa kɛfi 'ya te hɛɗia ŋa. Katesləyi ŋkwa kewəfərə hɛ mbe 'ya, 'ya Mahwətə.

¹³ Ma ka Israyɛl nyi ketene teghweme ne, katezhɛne hɛ kamene wəsə kwa ndiremi we, katezhɛne hɛ kasla tseŋwə we, katezhɛne hɛ kaghwete ŋkwa we. Ama katezeme wəsə kezeme hɛ ba'a katehɛ hɛ kaɗema wəndə shɛ kezha dake hɛ.»

Katezhɛne Zhɛrəzalɛm kanza keŋa ŋa

¹⁴ Meleme ta Siyon, gha cimə ba'a wetse gɛ! Ka Israyɛl, tsa mə gaghwe gɛ! Meleme ta Zhɛrəzalɛm, zlama le wənə kwetɛŋe gɛ!

¹⁵ Nahe Mahwətə kekelemte ghena nyi ɗaŋeɗa ɗaŋeɗa te gha, nahe ŋkɛ keŋkamte ka jaga ta ŋa. Nahe Mahwətə, meghe nya mbe Israyɛl kenza le gha katezhɛne na kaghazlənə va ndiremi we.

¹⁶ Ma te vecia shɛ ne, ma ke mbeli sha tegeze nda ke Zhɛrəzalɛm: «Meleme ta Siyon, ghazlənəma na ma, nzama na keyirə yirə ma.

¹⁷ Nahe Shala Mahwətə ta ŋa kenza le gha, gheŋkɛ ya kakatsala nya kehərə ŋkwa. Viɗi ŋkɛ va zlama tewəmbəreke gha, ɗe ta ŋkɛ nde ve ŋa mpi mɛnɛfɛ, gaghwe yatsa ŋkɛ tewəmbəreke gha,

¹⁸ kala nya te vecia gəsəkə.» Ma ke Shala gezete: «Zhɛrəzalɛm, Katekele ndiremi 'ya seyi te gha, yitea zhɛnema na kanza shewə va hawe.

¹⁹ Ma te vəa shɛ ne, katempə pɛtɛa mbeli nyi kese kasa ŋa yaka 'ya. Katembele ka gwadarea kɛfi 'ya, katetsene mbeli nyi ketaze taze 'ya, kateve zləvə 'ya te gha ba'a kateɗepe sləa ŋa mbeli te pɛtɛa hɛɗi nyi se nyi se hawe te gha.

²⁰ Ma te vəa shɛ ne, katezhɛne ŋayɛ 'ya kase ba'a katetsene ŋayɛ 'ya. Kanewe newe yɛ ne, katezhɛre nza ta ŋayɛ 'ya. Tagha gɛ, katedzemte sləa ŋayɛ ba'a kateve zləvə 'ya te gheyɛ hwa hwelefefi nyi te hɛɗi lema.» Mahwətə nde gezete.