Slene 8 - Ghena ta Shala

¹ Ma Sol le ŋa ŋkɛ ne, nahe ŋkɛ keyɛhwe pesle ta Ɛtiyɛne. Te vecia shɛ ghate mbeli kaghweze mɛ kwele kwele hwa Jikə ta ka Kriste nya mbe Zhɛrəzalɛm. Nahe pɛtɛa mbelia Yɛsə Kriste ketazemte geva dzeyi mbe Zhəwdɛ ba'a Samari, deke ka ghwene ta Yɛsə Kriste ka tene tagha.

Sol kaghweze mɛ hwa Jikə ta ka Kriste

² Pa kweci mbeli nyi kehawe va Shala lamte Ɛtiyɛne, kwele kwele hɛ nehwenekɛ ŋkɛ.

³ Ma Sol le ŋa ŋkɛ ne, kwele kwele hwepe ghə ŋkɛ kezha mpə Jikə ta ka Kriste vəa ŋkwa shɛ, keghɛ keghɛ dzeki ŋkɛ kakese zhili ba'a mi kadzawa daŋgayɛ.

Filipe kazlape Ghena kwatenca nya ganyɛ mbe Samari

⁴ Ntəŋə mbeli nyi kezele Yɛsə nyi ketazenji yitea dzasle hɛɗi le geze nda Ghena kwatenca nya ganyɛ ke mbeli.

⁵ Ntəŋə Filipe kadzembe Samari, ntake ŋkɛ kageze nda ghena ta Kriste ke mbeli nyi mbe melemea shɛ.

⁶ Tikə tikə mbeli pɛtɛ kafa ghena nya geze nda Filipe ke hɛ va nya fave zləvəa wəshi meŋele nyi mene ŋkɛ hɛ. Nahe hɛ kenakɛ hɛ le ntsə ta nci perə.

⁷ Kwa nza ŋkɛ kashave yɛ 'yi'yɛghwə mbe kweci mbeli le lewela kwele kwele, kwele kwele ka gwadare ba'a ka gweleba nyi mbete Filipe.

⁸ Kwele kwele zlama mbeli nyi mbe melemea shɛ.

⁹ Kwete nde mene ghwɛ nya nza sləa kaSimon ya mbe melemea shɛ. Kamene ghwɛ ŋkɛ ba'a kave nda nza heheɓake ŋkɛ ke mbeli nyi mbe Samari. Nahe ŋkɛ keveyi ghəa ŋkɛ kawəndə kwele.

¹⁰ Pɛtɛa mbeli, se te ŋwale hwa'a te mbelia jama kevate ghə te ghena ta ŋkɛ. Ma ke hɛ sha geze: «Berete ta Shala nde zhɛrenyɛ kala wəndə, nya heka mbeli kaberete nya wəba.»

¹¹ Kwele kwele veyite sleme hɛ yitea ghena ta ŋkɛ, ghalanza ve nda nza heheɓake ŋkɛ ke mbeli le wəshi nyi mene ŋkɛ.

¹² Ma kwa yɛhwe Ghena kwatenca nya ganyɛ nya gezete nda Filipe ke hɛ hɛ te Meghea Shala ba'a te sləa Yɛsə Kriste ne, pa mbeli menete nda batɛme ke hɛ, zhili ba'a mi.

¹³ Pa Simon le ghəa ŋkɛ yɛhwe ghena ta Yɛsə, pa mbeli menete nda batɛme. Ntishɛ ŋkɛ yitea Filipe, heɓake ŋkɛ va wəshi meŋele nyi jama jama ba'a wəshi kencɛ wəshi nyi meŋele nyi kemene geva.

¹⁴ Ma kwa fave ka ghwene ta Yɛsə Kriste nyi mbe Zhɛrəzalɛm nahe ka Samari keyɛhwe ghena ta Shala ne, pa hɛ ghwenakɛ yɛ Piyɛre le Zhaŋe kalə sha hɛ.

¹⁵ Hwa'a hɛ mbe Samari, ntake hɛ kasəkwə ghə kezha kemave Sefəa Shala ka Samari.

¹⁶ Va nya nakama Sefəa Shala kase sha hɛ, deke te sləa Nde sleke ŋkwa Yɛsə menete nda batɛme mbeli ke hɛ.

¹⁷ Tagha gɛ, pa yɛ Piyɛre le Zhaŋe dapaghe dzeve kənəa hɛ, pa hɛ kemave Sefəa Shala.

¹⁸ Ma kwa nakɛ ke Simon nahe mbelia Yɛsə Kriste kekemave Sefəa Shala kwa dapaghe dzeve ka ghwene ta Yɛsə Kriste kənəa hɛ, pa ŋkɛ keleke nda cɛdɛ ke yɛ Piyɛre le Zhaŋe,

¹⁹ ma ke sha hɛ: Ndeke ɗa mə berete nya kala nya yitea kemave Sefəa Shala wəndə nya vaghe dzeve 'ya kənə.

²⁰ Ma ke Piyɛre shɛ: «Mte ŋa tagha le cɛdɛa ŋa. Kawəsə kepa berete nya ndeke nda Shala ke mbeli gəmə na?

²¹ Ma gha, zhigə ŋa ŋa wəsə shɛ hwa slene nya ya ɓɛhwɛ we, kwa nza ŋkɛ kenza wənəa ŋa tiɗiɗi kwa kema ta Shala we.

²² Mpi dzeve te zəzə kwa ndiremi ta ŋa nya, səkwə Nde sleke ŋkwa. Ma kezhɛ heli ŋkɛ ne, katekelemte ghena nya zəzəte na ŋkɛ te wənə.

²³ Tewəmbəreke nahe 'ya kenakɛ 'yaghwake mehele ta ŋa, mava ta jaɗafa na.»

²⁴ Ma ke Simon sha yɛ Piyɛre le Zhaŋe: «Mpi ɗa nda mə dzeve ke Nde sleke ŋkwa le ghəa ŋayɛ kezha ɗema pɛtɛa wəshi nyi geze nyi yɛ kamene ɗa geva.»

²⁵ Ma kwa neghamte fete hɛ yitea Yɛsə ba'a kwa gezemte ghena ta ŋkɛ hɛ ne, pa yɛ Piyɛre le Zhaŋe zhɛneghe geva kadzeme Zhɛrəzalɛm. Ghena kwatenca nya ganyɛ yageze nda hɛ kwa hweŋkwa ke mbeli nyi mbe kweci meleme nyi ɓɛhwɛ ɓɛhwɛ ta ka Samari kwele kwele.

Yɛ Filipe le nde Ɛtiyopi

²⁶ Ma ke nde ghwene ta Nde sleke ŋkwa sha Filipe: «Sate, kwiɗi laka bela kwa zeme, kwa hweŋkwa nya kesawa pelɛ Zhɛrəzalɛm kadzawa Gaza hweŋkwa. Wəndə shɛ kwa hweŋkwa shɛ we.»

²⁷ Pelɛhetɛme Filipe, ntəŋə ŋkɛ. Pɛkwe kwete wəndə kwa hweŋkwa shɛ, nde Ɛtiyopi ŋkɛ nya ketsewe tsewe, wəndə nya te ghəa wəshia Kandase, male nya kameghe mbe Ɛtiyopi. Sawa pelɛ Zhɛrəzalɛm ŋkɛ kahawe va Shala.

²⁸ Kalə sha ghɛa ŋkɛ zhɛne geva ŋkɛ. Mentishɛ ŋkɛ kwa wəmata nya ntsehe gədəwə kajaŋga palepa ta Ɛzayi nde mɛ ŋkwa ta Shala.

²⁹ Ma ke Sefəa Shala sha Filipe: «Hendeyite geva terasle yitea wəmata shɛ gi.»

³⁰ Pa Filipe hendave nda geva le hwɛ, fa ŋkɛ ne, kajaŋga nde Ɛtiyopi te palepa ta Ɛzayi. Ma ke 'yɛwete ve: «Kafa wəsə nya jaŋga nya na na tse na?»

³¹ Ma ke wəndəa shɛ: «Tsema nza 'ya kafate keɗema wəndə nya kencɛ ɗa ŋkɛ shɛ wa?» Pa ŋkɛ gezete nda ke Filipe kadzeme wəmata ba'a kantishɛ vare gheŋkɛ.

³² Wa nya ghena nya jaŋga ŋkɛ te palepa shɛ nya: «Nahe ŋkɛ kenza kala təmə nya kele mbeli kadzete ŋkwa kehene wəshi, kala zhɛgwəa təmə nya divə kwa kema ta nde tsehe shinti seyi te, kese ŋkɛ kaghwene mɛ we.

³³ Nahe zləvə kekelemte geva te ba'a nahe mbeli kendeke nda fete. Wa nde tegeze ghena ta hwelefefia ŋkɛ wa? Kwa nza ŋkɛ nahe mbeli kekelehwe mpi shave hwe.»

³⁴ Ma ke nde Ɛtiyopi sha Filipe: «Təhwə təhwə gezete, te ghəa wa geze ghena nya nde mɛ ŋkwa teke wa? Te ghəa ŋkɛ na, na te kwete wəndə na?»

³⁵ Tagha gɛ, ntəŋə Filipe yitea geze ghena. Pa ŋkɛ ncɛte nda Ghena kwatenca nya ganyɛ ta Yɛsə se te ghena nya jaŋgate ŋkɛ.

³⁶ Ma dzeghwa hɛ ne, hwa'a hɛ te ŋkwa nya nza yɛmə. Ma ke wəndəa shɛ shɛ: «Wa nya yɛmə nya. Wa wəsə nya kefɛa ɗa kekele batɛme wa?»

³⁷ Ma ke Filipe shɛ: «Ma keyɛte ghena shɛ na le wənəa ŋa fəyitekeghə ne, kamene ŋa batɛme mbeli.» Ma ke wəndəa shɛ: «Nahe 'ya keyɛhwe Yɛsə Kriste ya kaWəzege ta Shala.»

³⁸ Pa hɛ ghereŋeyi gədəwə, ɓeɓərəkwə hɛ sawa pelɛ wəmata kadzawa yɛmə. Pa Filipe menete nda batɛme.

³⁹ Ma kwa same hɛ kwa yɛmə ne, pa Sefəa Nde sleke ŋkwa kelemte Filipe. Kezhɛne wəndəa shɛ nakɛ ŋkɛ we, cape ŋkɛ yitea dzeghwa ta ŋkɛ le zlama.

⁴⁰ Pa Filipe sləyi geva mbe Azot. Cape ŋkɛ kadzembe Sɛzarɛ. Ma kwa hweŋkwa ne, kageze nda Ghena kwatenca nya ganyɛ ŋkɛ dzeyi mbe pɛtɛa yɛ meleme.