Slene 5 - Ghena ta Shala

Yɛ Ananiyas le Safira

¹ Ama pa kwete wəndə nya nza sləa ŋkɛ kaAnaniyas, nya nza male ta ŋkɛ kaSafira pamte kwete wəvea nci.

² Pa hɛ veyi kwete kema ta cɛdɛ nya kese te kaŋa nci ba'a keleghe nda nya ketene ke ka ghwene ta Yɛsə Kriste.

³ Ma ke Piyɛre shɛ: «Ananiyas, va wa dzembenyɛ Satan mbe wənəa ŋa ŋa wa? Wa raberə slate nda tseŋwə na ke Sefəa Shala wa? Va wa ntamte kwete na cɛdɛ nya kese te wəvea ŋa wa?

⁴ Ma kwa nakama na kapamte wəvea shɛ ne, ashɛ ŋa ŋa ŋkɛ wəka? Ma kwa pamte ŋkɛ na ne, ashɛ ŋa ŋa cɛdɛa ŋkɛ wəka? Tsema tarete na kamene wəsə nya kala nya kwa wənəa ŋa wa? Keslate nda tseŋwə na ke mbeli we, ama ke Shala.»

⁵ Ma kwa fate ghena shɛ Ananiyas, terərəmə ŋkɛ te ŋkwa, mtiwə ŋkɛ. Kwele kwele zhɛ nda ghazlənə ke mbeli nyi kefave ghena shɛ.

⁶ Pa kweci mempɛhwetɛti se ba'a vehame ŋkɛ mbe ghamca, ntəŋə hɛ le kalə kezha la ŋkɛ.

⁷ Temə kwetere wəmbəa ŋkɛ kalerə mahekene, pɛkwe male ta Ananiyas, shilimə mbe cɛ kaɗema keɗepe wəsə nya kemenete nda geva ke za nta.

⁸ Ma ke Piyɛre 'yɛwete ve: «Gezete ɗa gɛ! Tsetse cɛdɛ nya pake yɛ te wəvea ŋayɛ kaganda na?» Ma ke shɛ: «E'e.»

⁹ Ma ke Piyɛre shɛ: «Tsema tsahwe yɛ kanya kwetɛŋe kezha dzeghe Sefəa Shala wa? Fave ndeɗekə, wa nyi mbeli nyi kelamte za ŋa nyi pelɛ mɛa cɛ, katekele ŋa hɛ kalə kala ŋa perə.»

¹⁰ Te ŋkwa shɛnyɛ, terərəmə nde yitea seɗa ta Piyɛre, mtiwə nde. Dzembe mempɛhwetɛti ne, kemte mte nde. Pa hɛ kelete ŋkɛ kalə ba'a lamte ŋkɛ vare za nta.

¹¹ Nahe pɛtɛ Jikə ta ka Kriste ba'a mbeli nyi kefave ghena shɛ keghazlənənji kwele kwele vəa ŋkwa shɛ.

Wəshi meŋele kwele kwele

¹² Kwele kwele wəshi kencɛ wəshi ba'a wəshi meŋele nyi menete ka ghwene ta Yɛsə Kriste hwa mbeli. Keveci keveci beke mbelia Yɛsə Kriste mbe gelɛŋka ta Salomon.

¹³ Kwele kwele tsahe hɛ mbeli, ama wəndə shɛ kaɗe kajikə geva le hɛ.

¹⁴ Kwele kwele zhili ba'a mi nyi kembakete geva vare wəvəsəa nci va nya yɛte Nde sleke ŋkwa hɛ.

¹⁵ Ntake mbeli kafə ka zereghwe kase kadzemɛa hweŋkwa. Kabete hɛ mbeli te ŋgezle ta nci ba'a te keshia nci, kezha kwaɗe kweci mbelia nci shenaŋkwe ta Piyɛre vəa ŋkwa nya dzeghwa ŋkɛ hweŋkwa.

¹⁶ Kwele kwele kweci mbeli nyi kehwɛke hwɛ se mbe kweci meleme nyi terasle yitea Zhɛrəzalɛm. Pa hɛ kefəke ka zereghwe ba'a ka 'yi'yɛghwə, pɛtɛ hɛ kembenji.

Mbeli kaghweze mɛ hwa ka ghwene ta Yɛsə Kriste

¹⁷ Pa wəndə kwelea ka dzeghe Shala ba'a pɛtɛa mbeli nyi yite, geze ta ŋkɛ, wəvəsəa ka Sadəsɛyɛn, hwepete wənə kwele kwele va zlɛ.

¹⁸ Pa hɛ keseve ka ghwene ta Yɛsə ba'a beteyi hɛ kwa daŋgayɛ.

¹⁹ Ama heviɗi, pa nde ghwene ta Nde sleke ŋkwa pelemte cɛ daŋgayɛ ba'a fəakave hɛ te ŋwela. Ma ke sha hɛ:

²⁰ «Kwiɗi mə kalə kadzembe ghɛa Shala kazlape nda ghena ta mpi mɛnɛfɛ ke mbeli.»

²¹ Pa ka ghwene ta Yɛsə yɛte nda ghena ke nde ghwene ta Nde sleke ŋkwa, cape hɛ masheke masheke kalə kadzembe ghɛa Shala kateke nda wəshi ke mbeli. Pa wəndə kwelea ka dzeghe Shala ba'a mbelia ŋkɛ tsenete mbeli nyi te ghəa meleme ta ka Zhəwif. Pa hɛ ghwenakɛ ŋkwa kazele ka ghwene ta Yɛsə kwa daŋgayɛ.

²² Ama kwa lə ka sewajɛ ne, kesləyi hɛ hɛ kwa daŋgayɛ we. Pa hɛ zhɛneke geva kase, ma ke hɛ sha hɛ:

²³ «Ma kwa lə ghen'yɛ ne, jɛraslɛ cɛ daŋgayɛ, tagha mbeli nyi keya ŋkwa gheghereŋe te ŋkwa nci. Ma kwa pelemte cɛ ghen'yɛ ne, wəndə kesləyi ghen'yɛ mbe we.»

²⁴ Ma kwa fate ghena shɛ wəndə nya te ghəa ka ya ghɛa Shala ba'a mbeli nyi te ghəa ka dzeghe Shala, kwetɛ kwetɛŋe mehele ta nci te ghəa ka ghwene ta Yɛsə Kriste, pa hɛ 'yɛwete wəsə nya kemenete nda ke ka ghwene ta Yɛsə va ghəa nci.

²⁵ Pɛkwe kwete wəndə. Ma ke hɛ: «Fa mə, ma mbeli nyi fəyi nyi yɛ kwa daŋgayɛ ne, wa nyi hɛ nyi kateke nda wəshi ke mbeli mbe ghɛa Shala.»

²⁶ Cape wəndə nya te ghəa ka ya ghɛa Shala le mbelia ŋkɛ. Pa hɛ zhɛneke ka ghwene ta Yɛsə, kaɗema le mene berete. Kwa nza ŋkɛ ne, kazhɛ nda ghazlənə va nya tebeza hɛ mbeli le pelɛ.

²⁷ Ma kwa keleke hɛ mbeli ba'a kwa veyi hɛ mbeli kwa kema ta mbeli nyi te ghəa meleme ta ka Zhəwif ne, ntake wəndə kwelea ka dzeghe Shala ka'yɛwe ghena va hɛ.

²⁸ Ma ke sha hɛ: «Nahe n'yɛ kefɛake ŋayɛ keteke wəshi ke mbeli te sləa wəndəa shɛ. Pɛtɛ ŋkwa nya mbe Zhɛrəzalɛm va wəshi nyi tekete nda yɛ ke mbeli tsetsenya, gheyɛ ɗe kave kelɛhe ta wəndəa shɛ kwa ghəa n'yɛ na?»

²⁹ Ma ke yɛ Piyɛre le ka ghwene ta Yɛsə Kriste zhɛnete nda ke hɛ: «Nahe ŋkɛ kehi kahawe wəndə va Shala, kenya hawe ŋkɛ wəndə ŋelɛ.

³⁰ Shala ta ka shihɛ ɓəmə nde zhɛnave nda mpi ke Yɛsə nya peslekɛ yɛ laka baŋe ŋkɛ te sheghwə.

³¹ Pa Shala keleghe ŋkɛ kadzeme ghweme ba'a veyi te kwa zeme ta ŋkɛ kawəndə nya te ghə ba'a kaNde mbele ŋkwa, yitea zhɛre wənəa nci ka Israyɛl ba'a yitea kelemte geva jaɗafa ta nci te wənə.

³² Kaka negha fete ta wəshi nyi kemenete geva, ghen'yɛ le Sefəa ŋkɛ nya ndeke nda Shala ke mbeli nyi kefa ghena ta ŋkɛ.»

³³ Pepetefe wənəa mbeli nyi te ghəa meleme ta ka Zhəwif va ghena shɛhɛ. Kaɗe hɛ kampəmte ka ghwene ta Yɛsə Kriste.

³⁴ Ama kwete nde Fariziyɛn nya nza sləa ŋkɛ kaGamaliyɛl ya shɛ, nde rafe wəshi mahalegə nya hawe pɛtɛa mbeli ŋkɛ ve. Pelɛhetɛme ŋkɛ sate hwa mbeli nyi te ghəa meleme ta ka Zhəwif, pa ŋkɛ gezete kezha ŋka ka ghwene ta Yɛsə mbeli kajive kaba.

³⁵ Ma ke sha hɛ mbe tsenea shɛ: «Ka Israyɛl, ntsehwele mə yitea wəsə nya ɗe yɛ kamene nda ke mbeli nyi.

³⁶ Ma vecagha ne, pɛkwe Tədas nya keveyi ghəa ŋkɛ kawəndə kwele. Gare gwəmsə wəfaɗe mbeli nyi kezelete ŋkɛ. Ama kwa peslekɛ ŋkɛ mbeli ne, nahe pɛtɛa mbelia ŋkɛ ketazemte geva. Ketene sebe te ghena ta ŋkɛ ya ci'a we.

³⁷ Kwetere wəmbəa ŋkɛ, pɛkwe Zhəwdas, nde Galilɛ, te veci nya rafe ŋkwa mbeli. Pa ŋkɛ ghweteve mbeli kwele kwele kwa sebe ta ŋkɛ. Ama kwa peslekɛ ŋkɛ mbeli ne, nahe pɛtɛa mbeli nyi kezelete ŋkɛ ketazemte geva.

³⁸ Ma 'ya sha gheyɛ tsetsenya: Zhɛnema yɛ kaleɓe ghəa ŋayɛ le mbeli nyi ma. Pelakɛ mə hɛ kaslə. Ma kenza nde va mbeli se zəzə ta nci ba'a slene ta nci ne, kateza sebe te hɛ.

³⁹ Ama kenza nde va Shala se ŋkɛ ne, kapesle yɛ yitea za sebe te hɛ we. Ntsehwele mə kezha ɗema yɛ kampa le Shala.» Pa mbeli nyi te ghəa hɛɗi ka Zhəwif yɛte ghena ta Gamaliyɛl.

⁴⁰ Pa hɛ hekakɛ ka ghwene ta Yɛsə ɓiyitsa, mpəave hɛ le ghweɗa ba'a gezete nda ke hɛ kezha zhɛnema hɛ kageze ghena te sləa Yɛsə. Pa hɛ pelakɛ hɛ.

⁴¹ Cape ka ghwene ta Yɛsə Kriste slənji yitea mbeli nyi te ghəa hɛɗi ka Zhəwif. Kwele kwele zlama hɛ va nya veyi hɛ Shala kambeli nyi kesəwə yaka tewəmbəreke sləa Yɛsə.

⁴² Keveci keveci teke nda Ghena kwatenca nya ganyɛ ta Yɛsə Mɛsi hɛ ke mbeli mbe ghɛa Shala ba'a ki ghɛ. Kesərəakɛ geze hɛ we.