Slene 22 - Ghena ta Shala

¹ «Ka kesaka meyɛ ɗa ba'a ka yitehɛ ɗa, fa mə ghena nya ɗe 'ya kageze ŋayɛ 'ya kezha mbele ghəa ɗa.

² Ma kwa fa Pol hɛ le ghena ta ka Ɛbrə geze nda ghena ŋkɛ ke hɛ ne, tikə tikə hɛ za ma ke nya mshena. Tagha gɛ, ma ke Pol:

³ Nde Zhəwif 'ya, mbe Tarse te hɛɗia Silisi ya 'ya, ama teke jaŋgave jaŋga 'ya mbe Zhɛrəzalɛm, Gamaliyɛl nde se kande teke ɗa wəshi, gheŋkɛ nde tekete ɗa nza ta wəshi mahalegəa ka shihɛ ɓəmə tiɗiɗi. Nahe 'ya kese dɛŋe dɛŋe te Shala, kala nya nza nya yɛ ɓeshi.

⁴ Kwele kwele se 'ya kaghweze mɛ hwa mbeli nyi kezele hweŋkwa ta Nde sleke ŋkwa kezha mpə hɛ. Nahe 'ya kegezete nda ke mbeli kakese zhili ba'a mi kezha bete hɛ kwa daŋgayɛ.

⁵ Teke wəndə kwelea ka dzeghe Shala ba'a tsene ta mbelia jama, nahe hɛ keɗepe kaganda nya geze 'ya. Ghenci ka ndeke ɗa hweŋkwa ba'a palepa ke ka kesaka meyɛ ɓəmə nyi kwa Damas, te veci nya ghwenakɛ ɗa mbeli kezha kese mbelia Yɛsə Kriste kwagha kezha hwepete hɛ le zewe lɛ ba'a kezha fə kadzeme mbe Zhɛrəzalɛm yitea 'yɛ hɛ mbeli.

Pol kaɓela ghena ta zhɛre nza ta ŋkɛ

⁶ Ma kwa hweŋkwa 'ya kalə ba'a takwa takwa 'ya yitea Damas, kala wəsə kwa ghə veci, te ŋkwa shɛnyɛ ne, vəkə waŋe nya wəba sawa pelɛ ghweme kezha ɓele kənəa 'ya.

⁷ 'Yape 'ya te ŋkwa, pa 'ya fate kwete ŋwələ nya kegeze ɗa geva, ma ke: Sol, Sol, yitea wa ghweze mɛ na hwa 'ya wa?

⁸ Ma 'ya 'yɛwete: Wa sləa ŋa wa Nde sleke ŋkwa? Ma ke sha 'ya: 'Ya ya kaYɛsə, nde Nazarɛt, nya ghweze mɛ na hwe.

⁹ Ma mbeli nyi nza 'ya le hɛ ne, nahe hɛ kenakɛ waŋea shɛ, ama kefa ghena nya kegezeke ɗa geva hɛ we.

¹⁰ Ma 'ya 'yɛwete: Wa yaɗe na kamene ŋa 'ya wa Nde sleke ŋkwa? Ma ke sha 'ya: Sate, kwiɗi kadzembe Damas, mbagha ne, kategeze ŋa wəsə nya temene na mbeli.

¹¹ Ma kwa nza ŋkɛ nahe 'ya keghwələpə ɗa va waŋe nya wəba shɛ ne, pa mbeli nyi kebeghe ɗa keseve ɗa te dzeve kadzembe Damas.

¹² Kwete wəndə nya nza sləa ŋkɛ kaAnaniyas ya tagha. Wəndə ganyɛ ba'a dɛŋe dɛŋe te wəsə mahalegəa ɓəmə ba'a nya hawe pɛtɛa ka Zhəwif nyi mbe Damas ve ŋkɛ.

¹³ Pɛkwe ŋkɛ sha 'ya. Tagha gɛ, ma ke: Sol wəza meyɛ ɗa, newe ŋkwa zhɛkwa. Te ŋkwa shɛnyɛ ghwɛaɗɛaɗɛa ntsə ta ɗa, pa 'ya nakɛ ŋkɛ le ntsə ta ɗa.

¹⁴ Ma ke Ananiyas zhɛkwa: Nahe Shala ta ka shihɛ ɓəmə kentave ŋa vəashi yitea ɗepete wəshi nyi ɗe ŋkɛ na, yitea newe Yɛsə, wəndə nya tiɗiɗi na ba'a yitea fa ŋwələa ŋkɛ na.

¹⁵ Kwa nza ŋkɛ gha nde tenza kande negha fete ta ŋkɛ kwa kema ta pɛtɛa mbeli te wəshi nyi nakɛ na ba'a nyi fate na.

¹⁶ Wa yaneghe na tsetsenya wa? Sate, menete ŋa batɛme mbeli kezha kelemte geva jaɗafa ta ŋa te wənə laka hekɛme sləa Yɛsə.

Ghwene ta Pol kalə sha kweci hwelefefi

¹⁷ Pa 'ya zhɛneke geva kadzembe Zhɛrəzalɛm. Ma vəa ŋkwa nya səkwə ghə 'ya mbe ghɛa Shala ne, pa 'ya nakɛ kwete wəsə laka kelɛŋə.

¹⁸ Pa 'ya nakɛ Nde sleke ŋkwa, ma ke sha 'ya: Ntsə geva kashave kahe kahe mbe Zhɛrəzalɛm, kwa nza ŋkɛ kateyɛ ghena nya tegeze na te ghəa ɗa hɛ we.

¹⁹ Ma 'ya shɛ: Nde sleke ŋkwa, nahe hɛ keɗepe 'ya nde lə kadzembe cɛ kesəkwə ghə ta ka Zhəwif kezha kese mbeli nyi keyɛ ŋa yitea fə hɛ kadzawa daŋgayɛ ba'a yitea ɗa hɛ.

²⁰ Ma kwa peslekɛ nde negha fete ta ŋa Ɛtiyɛne mbeli, tagha 'ya perə. Nahe 'ya kenza jikə le mbeli nyi kepeslekɛ ŋkɛ, 'ya nde se kakese lekwesa ta nci.

²¹ Tagha gɛ, ma ke sha 'ya: Kwiɗi, 'ya kaghwene ŋa cakeɗake sha kweci hwelefefi.»

Yɛ Pol le wəndə kwelea ka sewajɛa ka Rome

²² Fa yafa ghena ta Pol mbeli shanda nda gezemte ghena shɛ ŋkɛ, ama tsetsenya ne, ma ke hɛ sha lewela: «Zamte mə sebe te wəndə nya. Peslekɛ mə ŋkɛ! Kehi ŋkɛ kanza teghweme we.»

²³ Katsa lewela hɛ, kanegha lekwesa ta nci hɛ ba'a kakərə keləwə hɛ dzeme yitea ghweme.

²⁴ Pa wəndə kwelea ka sewajɛ gezete nda ke ka sewajɛ kezha kele Pol kadzembe ŋkwa nya berete ba'a kezha ɗa ŋkɛ mbeli le ghweɗa yitea ŋka ŋkɛ kageze wəsə nya tsa nda lewela mbeli te va ɗa.

²⁵ Ma kwa hwepete ŋkɛ mbeli kezha ɗa ŋkɛ le ghweɗa ne, ma ke Pol sha kwete wəndə nya te ghəa ka sewajɛ nya tagha: «Hweŋkwa ya va gheyɛ kaɗa nde hɛɗia Rome tewə mbeli kemehate ghwə te na?»

²⁶ Ma kwa fate ghena shɛ ŋkɛ ne, ntəŋə wəndəa shɛ kalə sha wəndə kwelea ka sewajɛ, ma ke: «Wa yatemene na wa? Nde hɛɗia ka Rome wəndəa shɛ.»

²⁷ Pa wəndə kwelea ka sewajɛ se sha Pol, ma ke 'yɛwete ve: «Nde hɛɗia ka Rome na kaganda ke ta ŋa na?» Ma ke Pol shɛ: «E'e.»

²⁸ Ma ke wəndə kwelea ka sewajɛ: «Cɛdɛ kwele kwele pave nza kande hɛɗia Rome 'ya le ŋa ɗa.» Ma ke Pol: «Kande hɛɗia Rome yake ɗa mbeli.»

²⁹ Te ŋkwa shɛnyɛ ne, pa mbeli nyi keteɗa ŋkɛ hendemte geva. Nahe wəndə kwelea ka sewajɛ keghazlənənyɛ va ghena shɛ, kwa ɗepe hɛ kande hɛɗia ka Rome Pol nda hwepete ŋkɛ hɛ le zewe lɛ.

Pol kwa kema ta mbeli nyi te ghəa hɛɗia ka Zhəwif

³⁰ Kaɗe wəndə kwelea ka sewajɛ kaɗepete ghena nya ndeke nda fete ka Zhəwif te ke Pol tiɗiɗi. Vatse nda se hɛ kapelemte te hendɛ ta ŋkwa, pa ŋkɛ geze nda ke mbeli nyi te ghəa ka dzeghe Shala ba'a mbeli nyi te ghəa hɛɗia ka Zhəwif kezha tsene hɛ. Pa keleke Pol kadzehwa hɛ.