Shave 33 - Ghena ta Shala

Shala kave nda hweŋkwa keslə ke Moyize

¹ Ma ke Mahwətə sha Moyize: «Kwiɗi mə, slə mə teke, gha le mbeli nyi fəakave na shave mbe Ɛzhipte. Kwiɗi mə kadzeme hɛɗi nya meɗeyi nda 'ya kafela ke Abraham, Izak ba'a Zhakob kave nda ke hwelefefia nci.

² Kateghwene nde ghwene ta ɗa 'ya te kema ta ŋayɛ. Kateŋka ka Kanan, ka Amor, ka Hɛt, ka Pɛrɛs, ka Hava ba'a ka Zhɛbəs 'ya.

³ Dzeme mə hɛɗi nya hwɛ yɛ ŋ'wa le yɛməa mze te. Kadzeme ɗa 'ya hwa gheyɛ, yagha 'ya kazamte sebe te gheyɛ kwa hweŋkwa we, kwa nza ŋkɛ ne, ka ntɛaŋentɛa ghə yɛ.»

⁴ Ma kwa fate ghena nya ndiremi nya mbeli ne, ntake hɛ kanehwene. Wəndə shɛ kese kapesa geva we.

⁵ Ma ke Mahwətə sha Moyize: «Ma pa na sha ka Israyɛl: ‹Pɛtɛa ŋayɛ kaka ntɛaŋentɛa ghə! Ma nda nahe 'ya kebeghakɛ ŋayɛ baɗe kadzeme ne, nza kateza sebe 'ya te gheyɛ. Ma tsetsenya ne, seɗemte mə wəshi kepesa geva ta ŋayɛ, nda tenewe 'ya tsema tsema temene ŋayɛ 'ya.›»

⁶ Ma sləma ta nci yitea ghweme ta Horɛb ne, pa ka Israyɛl nzanji keseɗe wəshi kepesa geva ta nci.

Cɛ lekwesa kebegeme geva

⁷ Ma kwa menete ghedəkwəa nci ka Israyɛl ne, pa Moyize kelete cɛ lekwesa kamɓeyi cakeɗake le ghedəkwə. Pa mbeli hekate nda slə ke cɛ lekwesa shɛ “kacɛ lekwesa kebegeme geva”. Ma yayata wəndə nya keɗe ka'yɛwe ghena va Mahwətə ne, kaslə ŋkɛ mbe ghedəkwə kalə kadzembe cɛ lekwesa shɛ.

⁸ Ma kenza nde Moyize nde dzembe ne, yayata wəndə kasate te ŋkwa kanza meslete mɛa cɛ lekwesa ta ŋkɛ ba'a kanewe Moyize nda dzembe ŋkɛ hwa'a mbe cɛ lekwesa nya keveyi geva tekeleke.

⁹ Ma kwa dzembe cɛ lekwesa shɛ Moyize ne, kasawa geɗeɗe ta meləkwə ləkwə kanza mɛa ŋkwa kedzembe cɛ lekwesa shɛ. Tagha gɛ, ntake yɛ Mahwətə le Moyize kageze ghena.

¹⁰ Mbe yayata və nya nakɛ geɗeɗe ta meləkwə ləkwəa shɛ ka Israyɛl ne, yayata wəndəa nci kagwəɗəŋə ntiŋə ghə mbe hɛɗi mɛa cɛ lekwesa ta ŋkɛ.

¹¹ Ntake yɛ Mahwətə le Moyize kageze ghena kwa kema kwa kema, kala nya geze nda ghena wəndə ke mcɛnyɛ. Kwa sebe ta ŋkɛ, tewətelɛwe Moyize zhɛneghe geva kadzembe ghedəkwə, vəa ŋkwa nya nza nde mene slene ta ŋkɛ nya kamempɛhweta Zhozəwɛ, wəzege ta Nəwn mbe cɛ lekwesa.

Mahwətə kageze ghena le Moyize

¹² Ma ke Moyize sha Mahwətə: «Fama Mahwətə! Gha nde gezave ɗa kabeghe mbeli nyi, ama kencɛte ɗa wəndə nya teghwene na kezha kemane ɗa na we. Ndagwara nahe na kentave ɗa tekeleke ba'a nahe na kendeke ɗa zlaɓa ta ŋa, gha le ghəa ŋa nde gezete.

¹³ Ma tsetsenya, kwa nza ŋkɛ nahe 'ya kekemave zlaɓa ta ŋa ne, ncɛte ɗa zəzə ta ŋa. Ma tsagha ne, kateɗepete ŋa 'ya megela ba'a katekemave zlaɓa ta ŋa 'ya tsape. Zaghəyitema na kaŋa ŋa mbeli nyi ma.»

¹⁴ Ma ke Mahwətə zhɛnete nda: «Katebeghe ŋayɛ 'ya le ghəa ɗa! Hehama na ma.»

¹⁵ Ma ke Moyize zhɛkwa: «Ma keɗema na kabeghe n'yɛ le ghəa ŋa ne, geze n'yɛ ma na kaslə teke ma.

¹⁶ Kwa nza ŋkɛ ma keɗema na kabeghe n'yɛ ne, tsema nza mbeli kaɗepete nahe ghen'yɛ le mbelia ŋa kekemave zlaɓa ta ŋa wa? Deke nza ta ŋa hwa ghen'yɛ nde nza kaneheve n'yɛ le kweci hwelefefi nyi te hɛɗi lema.»

¹⁷ Ma ke Mahwətə zhɛnete nda ke Moyize: «Katemene 'ya kala nya geze nya na. Kateve ŋa zlaɓa ta ɗa 'ya, kwa nza ŋkɛ, nahe 'ya keɗepe sləa ŋa megela.»

¹⁸ Ma ke Moyize shɛ: «Ncɛte ɗa zləvəa ŋa təhwə təhwə ŋa 'ya.»

¹⁹ Ma ke Mahwətə zhɛnete nda: «Katedzeyi 'ya kwa kema ta ŋa, katencɛ ŋa ndeɗea mehele ta ɗa 'ya ba'a katencɛ ŋa 'ya ‹kaMahwətə› sləa ɗa kaganda. Katezhɛ heli 'ya yitea wəndə nya ɗe 'ya kazhɛ heli yite ba'a katencɛ nda ganyɛa mehele ta ɗa 'ya ke wəndə nya ɗe 'ya kancɛ nda.»

²⁰ Ma ke ɓiyitsa: «Katenakɛ kema ta ɗa na we, kwa nza ŋkɛ ne, wəndə ŋelɛ shɛ kanakɛ kema ta ɗa pa ŋkɛ nzate nza teghweme we.

²¹ Wa nya kwete nya gela teke terasle yitea 'ya, nza ŋa te gela shɛ.

²² Ma vəa ŋkwa nya tedzeyi 'ya vare gha kezha ncɛ zləvəa ɗa ne, katewəfərə ŋa 'ya dzawa kwelɛ keleɓa shɛ. Katedəpə dzeve ta ɗa 'ya kənəa gha vəa ŋkwa nya tedzeyi 'ya.

²³ Kwa sebe ta ŋkɛ ne, katekelemte dzeve ta ɗa 'ya, ma tsagha ne, katenewe wəmbəa ɗa na. Ama kema ta ɗa ne, kanakɛ mbeli we.»