Shave 31 - Ghena ta Shala

Ka mene slene mbe ŋkwa nya keveyi geva tekeleke

¹ Ma ke Mahwətə sha Moyize zhɛkwa:

² «Fama, nahe 'ya kentave Bɛsalɛl, wəzege ta Əwr ba'a shia Həwr, kwa yita ta Zhəwda.

³ Nahe 'ya keviɗikɛ ŋkɛ le sefəa ɗa kezha ve ŋkɛ kande caŋa caŋa ba'a kande ɗepe wəshi. Nahe ŋkɛ keɗepe mene mama ta slene:

⁴ nahe ŋkɛ keɗepe nca wəshi ganji, vɛsə mze kwa tere tere, mze kwa tɛawetɛa ba'a mze kwa ghwə ghwə.

⁵ Nahe ŋkɛ keɗepe tsehe pelɛ nyi nza zləvə te hɛ ba'a ŋa ŋkwa le hɛ, nahe ŋkɛ keɗepe feɗe sheghwə. Geze ta ŋkɛ ne, nahe ŋkɛ keɗepe mene wəshi pɛtɛ.

⁶ Kave nda Oholiyab, wəzege ta Ahisamak nya kwa yita ta Dan 'ya kasləwəfəa ŋkɛ. Kave nda caŋa 'ya ke kweci ka ɗepe mene wəshi ɓiyitsa. Ma tsagha ne, katemene wəshi nyi gezave nda 'ya ke hɛ hɛ:

⁷ cɛ lekwesa kebegeme geva, səndəkwəa jikə geva nya nza pelɛ nyi slapesla slapesla kwa, wəsə keŋzle səndəkwə, pɛtɛa wəshi nyi mbe cɛ lekwesa,

⁸ tabele kebete ɗafa ba'a wəsə kentare yɛ paterela nya le mze kwa tere tere nya wɛŋe le wəshi kemene slene nyi te hɛ pɛtɛ, reghwetɛ ketere 'wərdə,

⁹ reghwetɛ kedzeghe melɛ le wəshi kemene slene te pɛtɛ, yɛ kwenə le wəsə nya ntare mbeli te,

¹⁰ yɛ lekwesa slene, lekwesa nyi keveyi geva tekeleke kaŋa nde dzeghe Shala Aron, lekwesa nyi tese ŋwalea ŋkɛ kezha mene slene ta nci,

¹¹ n'yi keve ŋkwa tekeleke ba'a 'wərdə ketere mbe ŋkwa nya keveyi geva tekeleke. Ma kezha mene pɛtɛa wəshia shɛhɛ ne, katemene ka ɗepe mene wəshi tserame kala nya gezave ŋa 'ya.»

Hawe va veci kezhɛne mpi

¹² Ma ke Mahwətə sha Moyize:

¹³ «Wa nyi ghena nyi tegeze nda na ke ka Israyɛl nyi: ‹Katehawe yɛ va veci kezhɛne mpi megela, kwa nza ŋkɛ gheŋkɛ ya kawəsə kencɛ wəsə nya kwelɛ gheyɛ le 'ya kaghala ghala. Gheŋkɛ nde tezəzə ŋayɛ 'ya ya kaMahwətə ba'a nde teve ŋayɛ kambeli nyi tekeleke.

¹⁴ Katehawe yɛ va veci kezhɛne mpi, kwa nza ŋkɛ kaveci nya keveyi geva tekeleke kaŋa ŋayɛ. Ma wəndə nya keɗema kehawete nda hawe ba'a nya kemenete slene te vecia shɛ ne, kateŋkamte geva ŋkɛ shave ka Israyɛl ba'a katepesle ŋkɛ mbeli.

¹⁵ Hɛ ŋkwaŋe ya shɛ mbe shikwə kezha mene slene. Ma kwa mberefaŋe ta hɛ ne, veci kezhɛne mpi ŋkɛ, veci nya keveyi ɗa geva tekeleke. Ma yayata wəndə nya ketemene slene te veci kezhɛne mpi ne, katepesle ŋkɛ mbeli.

¹⁶ Nda ka Israyɛl kahawe va veci kezhɛne mpi tsape keshi keshi, kwa nza ŋkɛ ne, kajikə geva nya kaghala ghala tenza ŋkɛ.

¹⁷ Ma vecia shɛ ne, gheŋkɛ nde tenza kawəsə kencɛ wəsə nya kwelɛ ka Israyɛl le 'ya kaghala ghala. Kwa nza ŋkɛ ne, nahe 'ya kepate yɛ ghweme le hɛɗi mbe hɛ ŋkwaŋe, ama te kwa mberefaŋe ta hɛ ne, nahe 'ya kesərəakɛ slene kezha zhɛne mpi.›»

¹⁸ Ma kwa kiɗimte geze nda ghena Shala ke Moyize pelɛ ghweme ta Sinay ne, pa fəave nda pelɛ nyi slapesla slapesla nyi rafate wəshi mahalegə ŋkɛ te le ghəa ŋkɛ bake.