Shave 3 - Ghena ta Shala

¹ Ntake Moyize kaya timɛti ba'a kwia mekwea ŋkɛ Zhɛtro, nde dzeghe Shala ta ka Madiyan. Ma te kwete hɛ, kwa ŋkaghe hɛ ŋkɛ zlake ke ɓerama ne, pa ntsehe pelɛ Horɛb, ghweme ta Shala.

² Tagha ncɛte nda geva nde ghwene ta Mahwətə hwa tse ta ghwə, te tepe ta tigə. Newe ke Moyize ne, katse ghwə hwa tigə, ama katere tigəa shɛ we.

³ Ma ke Moyize mbe ghəa ŋkɛ: «'Ya kahende geva kezha newe wəsə meŋele nya: va wa ɗema tigə nya katere wa?»

⁴ Ma kwa nakɛ Mahwətə kahende geva ŋkɛ kase kanewe, ma ke Shala hekakɛ shave mbe tepe ta tigə: «Moyize, Moyize!» -- «We», ke Moyize zhɛnete nda.

⁵ Ma ke Mahwətə: «Hende nda ma geva na ke tigə nya ma. Seɗemte tsahwa ta ŋa, va nya nza ŋkwa nya kaŋkwa nya keveyi geva tekeleke.

⁶ 'Ya ya kaShala ta ka shihɛ ŋa, Shala ta Abraham, Shala ta Izak ba'a Shala ta Zhakob.» Pa Moyize dəpəte kema ta ŋkɛ, kwa zhɛ nda ghazlənə kenewe Shala.

⁷ Ma ke Mahwətə sha Moyize zhɛkwa: «Nahe 'ya kenakɛ yaka nya te mbelia ɗa kwa Ɛzhipte, nahe 'ya kefate lewela ta ka Israyɛl va ɗa ta mbeli nyi te ghəa slene. Kaganda ne, nahe 'ya keɗepe yaka ta nci.

⁸ Nahe 'ya kesawa kezha mbele hɛ shave mbe dzeve ta ka Ɛzhipte ba'a kezha fə hɛ shave mbe Ɛzhipte kadzete hɛɗi nya ganyɛ ba'a nya bezle, kadzete hɛɗi nya hwɛ yɛ ŋ'wa le yɛməa mze te, kadzete hɛɗia ka Kanan, ka Hɛt, ka Amor, ka Pɛrɛs, ka Hava ba'a ka Zhɛbəs.

⁹ Ma kwa nza ŋkɛ nahe lewela ta ka Israyɛl kesame hwa'a sha 'ya ba'a nahe 'ya le ghəa ɗa kenakɛ tsema tsema sa nda yaka ka Ɛzhipte ke hɛ ne,

¹⁰ 'ya kaghwene ŋa tsetsenya kalə sha Farawon. Kwiɗi fəakave ka Israyɛl, mbelia ɗa shave mbe Ɛzhipte.»

Shala kancɛ nda sləa ŋkɛ ke Moyize

¹¹ Ma ke Moyize zhɛnete nda ke Shala: «Nyama 'ya wa? Kashɛ 'ya lə sha Farawon kezha fə ka Israyɛl shave mbe Ɛzhipte we!»

¹² Ma ke Shala shɛ: «Le gha tenza 'ya. Ma kezha ncɛ ŋa 'ya nde ghwene ŋa ne, 'ya kave ŋa wəsə kencɛ wəsə nya: Ma kefəakave ka Israyɛl na shave mbe Ɛzhipte ne, kanya kwetɛŋe tehawe yɛ va 'ya pelɛ ghweme nya.»

¹³ Ma ke Moyize sha Shala: «Megela! 'Ya katelə sha ka Israyɛl, ma tegeze nda 'ya ke hɛ: ‹Shala ta ka shihɛ ŋayɛ nde ghweneke ɗa sha gheyɛ.› Ama ma ke'yɛwe sləa ŋa hɛ va 'ya ne, tsema tezhɛne nda 'ya ke hɛ wa?»

¹⁴ Ma ke Shala sha Moyize: «‹'Ya ya ka'ya.› Wa nya wəsə nya tegeze nda na ke ka Israyɛl nya: ‹'Ya ya ka'ya nde ghweneke ɗa sha gheyɛ.›

¹⁵ Kwa sebe ta ŋkɛ, ma pa na sha hɛ ɓiyitsa: ‹Mahwətə nya kaShala ta ka shihɛ ŋayɛ, Shala ta Abraham, Shala ta Izak ba'a Shala ta Zhakob nde ghweneke ɗa sha gheyɛ.› Nya ya kasləa ɗa kaghala ghala, slə nya nza mbeli kaheka ɗa le keshi keshi.

¹⁶ Tsetsenya ne, kwiɗi tsenete mbelia jama ta ka Israyɛl, ma pa na sha hɛ: Nahe Mahwətə, Shala ta ka shihɛ ŋayɛ, Shala ta Abraham, Shala ta Izak ba'a Shala ta Zhakob kencɛte ɗa geva. Ma ke sha 'ya: ‹Nahe 'ya kekelete zəzə te nza ta ŋayɛ mbe Ɛzhipte ba'a nahe 'ya keɗepe tsema tsema sa ŋayɛ yaka mbeli.

¹⁷ Nahe 'ya kezəzəte kafə ŋayɛ seyi te hɛɗi nya sa ŋayɛ yaka mbeli kezha beghe ŋayɛ kadzete hɛɗia ka Kanan, ka Hɛt, ka Amor, ka Pɛrɛs, ka Hava ba'a ka Zhɛbəs, hɛɗi nya hwɛ yɛ ŋ'wa le yɛməa mze te.›

¹⁸ Katefa ghena ta ŋa ka Israyɛl. Katelə na le mbelia jama ta ka Israyɛl sha meghea ka Ɛzhipte, ma tegeze nda yɛ: ‹Nahe Shala Mahwətə ta ka Ɛbrə nya kaShala ta n'yɛ kencɛte n'yɛ ghəa ŋkɛ. Pelave n'yɛ hweŋkwa kadzeghwa kahɛ mahekene te ɓerama kezha dzeghe nda melɛ ke Mahwətə, Shala ta n'yɛ.›

¹⁹ Ama nahe 'ya keɗepe megela kaɗema ŋkɛ katesərə ŋayɛ kaslə, nda mbeli kaŋkeyite yite le berete.

²⁰ Vatse teme 'ya le berete te hɛɗia ŋkɛ laka mama ta wəshi meŋele. Ma kwa sebe ta ŋkɛ ne, katesərə ŋayɛ ŋkɛ kaslə.

²¹ Katezhɛre ka Ɛzhipte 'ya kaka ganjia mehele sha mbelia shɛhɛ, tsagha ne, katesərə ŋayɛ hɛ kaslə le dzeve pala pala, vəa ŋkwa nya teslə yɛ we.

²² Yayata male Israyɛl kate'yɛwe wəshi nyi le mze kwa tɛawetɛa ba'a nyi le mze kwa tere tere, tsagha yɛ lekwesa, va yayata wəzha ta ka Ɛzhipte nya ki ghɛa nta keɗema va kwa ghedəkwəa nta. Kateseɗe nda hɛ yɛ ke ŋwale tezhili le ŋwalea kwɛa ŋayɛ. Tsetse tefəmte wəshi yɛ shave mbe Ɛzhipte.»