Shave 1 - Ghena ta Shala

SHALA KAFƏ KA ISRAYƐL SHAVE MBE ƐZHIPTE 1–15 : 21 Ka Israyɛl kaka mavashi mbe Ɛzhipte

¹ Wa nyi sləa ŋwale tezhilia Israyɛl nyi kedzembe Ɛzhipte zlaɓe le Zhakob, yayata wəndə le mbeli nyi ki ghɛa ŋkɛ nyi:

² Rəbɛn, Simɛyon, Lɛvi ba'a Zhəwda,

³ Isakar, Zabəlon ba'a Bɛnjamɛn,

⁴ Dan ba'a Nɛftali, Gad ba'a Asɛr.

⁵ Pɛtɛa hwelefefia Zhakob ne, mbeli mberefaŋemsə: kwa Ɛzhipte wəzege ta ŋkɛ Zhozɛf le ŋa ŋkɛ.

⁶ Kwa sebe ta ŋkɛ, pa Zhozɛf mtenyɛ, tsagha ka kesaka yitenyɛ ba'a mbeli nyi mbe vəa shɛ.

⁷ Ama pa ka Israyɛl yate ya kwele kwele ba'a zhɛrenji kaka berete. Viɗi ŋkwa nya te hɛɗi va hɛ.

⁸ Pa kwete meghe nya keɗepema Zhozɛf dzembe meghe mbe Ɛzhipte.

⁹ Ma ke sha mbelia ŋkɛ: «Newe mə ka Israyɛl keyate ya kwele kwele ba'a kezhɛrenji berete ma ke gheɓəmə.

¹⁰ Megela ma zelete ntsehwele kefɛa hɛ keya mə. Ma kemenete geva mpa ne, katejikə geva hɛ le ka ghema ta ɓəmə yitea gheɓəmə ba'a kateslənji hɛ te hɛɗi nya.»

¹¹ Tagha gɛ, pa ka Ɛzhipte tsehave mbeli nyi te ghə kezha sa nda yaka ke ka Israyɛl le slene berete. Tsetse menete geva ŋkɛ nda ŋate yɛ meleme ta Pitom le Ramsɛs hɛ kezha bete wəshi kezeme ta Farawon.

¹² Ama kamtsehe sa nda yaka mbeli ke hɛ ne, kamtsehe ya hɛ kwele kwele ba'a kakele ŋkwa hɛ va mbeli. Tsekwe tseɗekwe nza helia ka Ɛzhipte va ka Israyɛl.

¹³ Ntake ka Ɛzhipte kasa nda yaka ke ka Israyɛl kala ka mavashi.

¹⁴ Pa hɛ zhɛrete nda nza dzawe ke hɛ le slene berete: ŋkeɗe rekɛ, mpa brəki, mene slene dzeyi mbe yɛ wəve. Geze ta ŋkɛ ne, mama ta slene berete yasa nda yaka hɛ le ke hɛ.

Farawon kaghweze mɛ hwa ka Israyɛl

¹⁵ Ma ke meghea ka Ɛzhipte sha mia ka Ɛbrə nyi keya ŋkwa, yɛ Shifra le Pəwa:

¹⁶ «Ma kenza yɛ katawe wəzege yitea mia ka Ɛbrə ne, neweve mə wəzegea shɛ megela: ma kenza ŋkɛ kawəzege teza ne, peslekɛ mə, ma kenza nde kawəzha makwa ne, sərəakɛ mə teghweme.»

¹⁷ Ama mi nyi keya ŋkwa nyighɛ ne, kahawe hɛ va Shala. Kese hɛ kamene kala nya gezave nda meghea ka Ɛzhipte ke hɛ we, pa hɛ sərəakɛ ŋwale tezhili teghweme.

¹⁸ Pa meghe hekake hɛ, ma ke sha hɛ: «Wa raberə menete yɛ kala nya wa? Wa raberə sərəakɛ ŋwale tezhili yɛ teghweme wa?»

¹⁹ Ma ke hɛ zhɛnete nda ke Farawon: «Kenza mia ka Ɛbrə kala mia ka Ɛzhipte we. Kwele kwele berete mbe hɛ ba'a nahe hɛ keyake ŋwalea nci nda tese male keya ŋkwa.»

²⁰ Tsetse yate ya ka Israyɛl kwele kwele ba'a zhɛrenji hɛ kaka berete berete. Pa Shala wəpikɛ mi nyi keya ŋkwa nyi

²¹ laka ve nda ya ŋwale ke hɛ, va nya yɛte nda fete hɛ.

²² Tagha gɛ, ma ke Farawon gezave nda ke mbelia ŋkɛ pɛtɛ: «Negheyi mə yayata wəzege teza nya yake ka Ɛbrə kwa hələa Nil! Deke ŋwalea kwɛ yasərə yɛ teghweme!»