Nɛhɛmi 4 - Ghena ta Shala

¹ Ama kwa fate Sanebalat, Tobiya, ka Arab, ka Amon ba'a ka Asdod mbe jive ŋa ta zlia Zhɛrəzalɛm mbe kema, mbe kiɗi geva ŋzla nyi te ne, kwele kwele zhɛte nda wənəa nci ke hɛ,

² pa hɛ tsate kanya kwetɛŋe kezha se kaɗa Zhɛrəzalɛm ba'a kabeze ŋkɛ.

³ Pa ghen'yɛ səkwəte Shala ta n'yɛ, kantave ka ya ŋkwa heveci ba'a heviɗi kanewe ŋkwa yitea mpa nya ketese va hɛ.

⁴ Ama ma ke ka Zhəwda: «Berete va ka mene slene ta n'yɛ we, kewəba kəsə kənəa pelɛ nyi. Kaŋate zli nya mə tɛape we!»

⁵ Ma ke ka jaga ta n'yɛ gezete: «Kateɗepete hɛ ba'a katenakɛ hɛ nda tedzeghəa hɛ gheɓəmə kezha mpə hɛ ba'a kezha fɛa hɛ yitea slene we.»

Nɛhɛmi ndeke nda wəshi kempa ke ka mene slene

⁶ Ma ka Zhəwif nyi kwa ghala le ka jaga ta n'yɛ ne, kase hɛ gare meŋe zhigə kancɛ n'yɛ ndiremi nya ketese. Ma ke hɛ: «Zhɛneke mə geva sha ghen'yɛ!»

⁷ Pa 'ya hite ŋkwa kwake kwake kwetere wəmbəa zli, kaveyi ka sewajɛ le wəvəsə keyita keyita le yɛ kafayɛ, yɛ megha ba'a yɛ gwecɛ.

⁸ Ma kwa newemte ŋkwa shɛhɛ 'ya ne, ma 'ya sha mbelia jama, ka meha ghwə ba'a mbeli nyi tagha: «Ghazlənəma yɛ va ka jaga ta ŋayɛ ma! Zəzəte mə kewəbanyɛ Mahwətə ba'a kaghazlənə mbeli ve. Mpa mə yitea ka menəhɛ ŋayɛ, ŋwalea tezhilia ŋayɛ, ŋwalea kwɛa ŋayɛ, mia ŋayɛ ba'a ghɛa ŋayɛ.»

⁹ Pa ka ghema ta n'yɛ fate nahe n'yɛ fahwe ghena ta nci ba'a tsema tsema fɛamte wəsə nya tarete hɛ Shala. Pɛtɛ ghen'yɛ zhɛnete geva yitea zli kezha zhɛne kamene slene ta n'yɛ.

¹⁰ Ama se te vecia shɛ ne, kwete bela ta ka mene ɗa slene ka tene yitea 'ya. Ma kweci mbeli ne, yɛ megha, yɛ gelə, yɛ gwecɛ ya va hɛ ba'a yɛ rəbəci ya kənəa geva. Ka Zhəwda yaya mbelia jama.

¹¹ Ma mbeli nyi keŋa zli le nyi kefə wəshi kemene slene kase ne, le dzeve kwetɛŋe mene slene hɛ, kwa nza wəsə kempa mbe kwete dzeve.

¹² Ma ka ŋa ŋkwa ne, yayata wəndəa nci kasekawe zli le kafayɛ hwa hwə. Ma nde vɛ veke ne, yitea 'ya ŋkɛ.

¹³ Ma 'ya sha mbelia jama, ka meha ghwə ba'a mbeli nyi tagha pɛtɛ: «Mba slene kamene kwele kwele yitea zli nya kala biya ta ŋkɛ dzasle. Ama kwetɛ kwetɛŋe mə dzeyi te zli, cakeɗa cakeɗa ŋkwa kwelɛ gheɓə.

¹⁴ Ya tema tema ŋkwa nya nza yɛ te nda fate vɛ ta tereme yɛ ne, tsene mə geva kase yitea 'ya. Katempa Shala ta ɓəmə yitea gheɓəmə!»

¹⁵ Se te kiɗi ta ŋkwa pa va nca ta yɛ saseregwa te ghweme mene slene ghen'yɛ, kwete bela ta n'yɛ ne, le megha le megha hɛ yitea dzeve.

¹⁶ Ma mbe vəa shɛ ne, pa 'ya gezave nda ke yayata wəndə nya te ghəa mbeli kahɛ le mbelia ŋkɛ mbe Zhɛrəzalɛm, kezha ya ɓəmə hɛ heviɗi ba'a kamene slene heveci.

¹⁷ 'Ya le ghəa ɗa, ka menəhɛ ɗa, ka mene slene ta ɗa le ka ya ŋkwa nyi kwa sebe ta ɗa ne, kaseɗemte lekwesa ta n'yɛ ghen'yɛ tɛape we, yayata wəndə le wəsə kempa ta ŋkɛ ba'a yɛmə.