Nde zlape ghena 2 - Ghena ta Shala

¹ Ma 'ya mbe ghəa ɗa: «Yawa, zlama yitea wəshi nyi ɗe geva, ndɛamakɛ zeɗe nza!» Ma wəsə nya kala nya perə ne, gəmə ŋkɛ.

² Ma 'ya gezete: «Ma ŋ'wəshi ne, dewə mehele ŋkɛ. Ma zlama ne, wəsə shɛ kandeke nda ŋkɛ ke wəndə we.»

³ Nahe 'ya ketarete kave nda ghəa ɗa ke wəshi kesa ba'a kateke nza ta ka dewə ntsehwele le ɗe ta ghəa ɗa. Nahe 'ya keɗe kafave wəshi nyi mene wəndə ŋelɛ za ma teke te hɛɗi vəa ŋkwa nya nza hɛ teghweme.

⁴ Nahe 'ya kemenete slene nyi jama jama. Nahe 'ya keŋate yɛ ghɛ ba'a nahe 'ya kemɓete yɛ rɛzɛŋe.

⁵ Nahe 'ya kemenete yɛ ntsa ba'a yɛ ŋkwa kemɓe yɛ wəfe. Nahe 'ya kemɓete pɛtɛa mama ta wəfe nyi keya dzeyi kwa hɛ.

⁶ Nahe 'ya kelate yɛ ŋkwa ketsene yɛmə kezha gə yɛmə mbeli same kwa hɛ kadzeyitea wəfe nyi ɓɛhwɛ ɓɛhwɛ.

⁷ Nahe 'ya kepave ka mavashi ba'a ka kwaterashi, kwele kwele se ka mene slene va 'ya. Kwele kwele se wəshi keseɗa nyi jama jama ba'a ɓɛhwɛ ɓɛhwɛ va 'ya za ma ke pɛtɛa mbeli nyi kese mpelɛa ma ke 'ya mbe Zhɛrəzalɛm.

⁸ Nahe 'ya ketsenete mze kwa tɛawetɛa ba'a mze kwa tere tere, mcɛlə nyi kese va ka meghe ba'a mbe hɛɗi nyi mbe dzeve ta ɗa. Nahe 'ya kekemave zhili ba'a mi nyi kegha cimə. Nahe 'ya kekemave wəsə nya mawe zhili za ma: mi kwele kwele.

⁹ Pa 'ya zhɛre ɗa kawəndə nya nza zləvə te, za ma ke mbeli nyi kese mpelɛa ma ke 'ya mbe Zhɛrəzalɛm. Ama vəa ŋkwa shɛ ne, le ntsehwelea ɗa nza ɗa 'ya.

¹⁰ Nahe 'ya kekemave pɛtɛa wəshi nyi mawe ntsə ta ɗa, kenza ɗa 'ya kemene wəsə nya ɗe wənəa ɗa we. Kaganda ne, nahe 'ya kese kazlama 'ya te pɛtɛa wəshi nyi menete 'ya. Gheŋkɛ nde se kaŋa ɗa zhɛme mbe pɛtɛa wəshi nyi menete 'ya.

¹¹ Ama pa 'ya neweve pɛtɛa wəshi nyi menete 'ya ba'a yaka nya sahwe 'ya kezha mene hɛ. Newe 'ya ne, gəmə ba'a kese sefə wəshi pɛtɛ. Meleɓe shɛ kaŋ'wete wəndə ŋelɛ mbe slene nyi mene ŋkɛ kwake te hɛɗi lema we.

¹² Nahe 'ya keɗe kazəzə te ghəa ntsehwele, dewə ntsehwele ba'a dewə mehele. Ma 'ya 'yɛwete va ghəa ɗa: «Ma wəndə nya ketenza kameghe kwa sebe ta ɗa ne, katemene ŋkɛ kala kweci ka meghe nyi mpelɛa ma ke gheŋkɛ tse na?»

¹³ Kaganda ne, wa nya wəsə nya nakɛ 'ya nya: ganyɛ ma ntsehwele ke dewə ntsehwele, kala nya nza waŋe ganyɛ ma ke ŋkwesle.

¹⁴ Kwa nza ŋkɛ ne, ntsə ya kwa ghə va nde ntsehwele ntsehwele kezha newe ŋkwa. Ama nde dewə ntsehwele ne, mbe ŋkwesle dzeghwa ŋkɛ. Ndagwara nahe 'ya keɗepe, wəsə nya kwetɛŋe nde neghe hɛ bake nci.

¹⁵ Tagha gɛ, ma 'ya mbe ghəa ɗa: Wəsə nya ketemene nda geva ke nde dewə ntsehwele nde temene ɗa geva, 'ya perə. Kezha wa se 'ya ntsehwele ma ke gheŋkɛ tsagha wa? Wəsə gəmə ŋkɛ perə, a 'ya sha ŋa ɗa.

¹⁶ Ma pɛtɛa wəshi nyi kemenete nda geva ke nde ntsehwele ntsehwele keɗema ke nde dewə ntsehwele ne, katezaghə hɛ mbeli mbe hɛ nyi kedzeyite. Kamte nde ntsehwele ntsehwele kala nde dewə ntsehwele, kazhɛne mbeli kazəzə kwete hwa hɛ we. Yitea wa nza ŋkɛ kala nya wa?

¹⁷ Ma tagha gɛ, pa 'ya ɗema nza teghweme, kwa nza ŋkɛ ne, kawəshi nyi ndiremi ndiremi newe wəshi nyi kemene geva kwake te hɛɗi lema 'ya, va nya nza ŋkɛ gəmə ba'a kese sefə wəshi pɛtɛ.

¹⁸ Nahe 'ya keɗema pɛtɛa slene nya menete 'ya kwake te hɛɗi lema. Kwa nza ŋkɛ ne, ke wəndə ketenza te ŋkwa ɗa tesərə nda wəshia ɗa 'ya.

¹⁹ Wa nde ɗepe katenza ŋkɛ kande kentsehwele ntsehwele keɗema kande dewə ntsehwele wa? Gheŋkɛ nde tenza te ghəa pɛtɛa slene nya menete 'ya laka ntsehwelea ɗa kwake te hɛɗi lema. Gəmə nyagha wəsə perə.

²⁰ Nahe mehele ta ɗa ketazenyɛ va pɛtɛa slene nyi menete 'ya kwake te hɛɗi lema.

²¹ Kwa nza ŋkɛ ne, wa nya wəndə kemenete slene ta ŋkɛ le ntsehwele, ɗepe wəsə ba'a jive mbe kema nya: Ke wəndə nya keɗema kemenete kwete wəsə teve zhigə ŋa ŋkɛ ŋkɛ bela. Gəmə nyagha wəsə ba'a wəsə kwa ndiremi nya wəba ŋkɛ perə.

²² Kaganda ne, wa wəsə nya ketene va wəndə ŋelɛ mbe pɛtɛa slene ta ŋkɛ ba'a pɛtɛa berete ta ŋkɛ nya menete ŋkɛ kwake te hɛɗi wa?

²³ Keveci keveci ne, kave nda gəli ŋkɛ ke ghəa ŋkɛ ba'a kasa yaka ŋkɛ kezha mene wəsə nya ɗe ŋkɛ kamene. Ya heviɗi ne, kazhɛne mpi mehele ta ŋkɛ we. Nyagha wəsə perə ne, gəmə ŋkɛ.

²⁴ Ma zeɗe nza nya shɛ kaŋa wəndə ŋelɛ ne, deke zeme wəsə kezeme, sa wəsə kesa ba'a zlama te wəshi nyi kemave ŋkɛ mbe slene ta ŋkɛ. Ma kwa neweve 'ya ne, Shala nde kele zeɗe nza shɛ kase.

²⁵ Kwa nza ŋkɛ ne, wəndə shɛ kakemave wəshi kezeme ba'a kazlama keɗema Shala kendeke nda we.

²⁶ Kaganda ne, kave nda ntsehwele, ɗepe wəsə ba'a zlama ŋkɛ ke wəndə nya zeɗehwe nda. Ama ma ke nde jaɗafa ne, kave nda tsene wəshi ba'a wəfərə hɛ Shala kezha fə nda hɛ ke wəndə nya zeɗehwe nda. Gəmə ba'a kese sefə ŋkɛ perə.