Nahəwm 3 - Ghena ta Shala

Nahe Ninive kenza rayɛ va ka mpə mpə

¹ Wa nya ndiremi te Ninive, meleme nya kempə ŋkwa, nya kemene mbəɗəkwə, nya kemene ghəa ŋkɛ laka mene berete ba'a nya kefɛama yitea ŋwasle ŋkwa gɛ!

² Ma mbe melemea shɛ ne, kakwaɗe yɛ ghweɗa, kagaka yɛ seɗa ta wəmata gədəwə, kampereke gədəwəa lɛmə ba'a kahwɛ yɛ wəmata kempa.

³ Kagwəgwə ka zleɗe gədəwəa lɛmə, kaslesla yɛ kafayɛ, katsa ghwə yɛ megha. Ka mpə mpə ya te yayata ŋkwa, nahe ka mpə mpə kenza təɗəmə təɗəmə, kaɓelate hɛ mbeli we, katsetsa ŋkwa ka mpə mpə kala tehene.

Hawe ya te Ninive

⁴ Kwele kwele zhigə menete mefətekwə Ninive. Kendeɗe nda ba'a keganyɛ nda se nde. Nahe mefətekwəa nta ba'a mene ghwɛa nta kezhɛrete mbeli ba'a hwelefefi kaka mavashi.

⁵ Ma ke Mahwətə nde berete gezete: «'Ya katesate te ŋkwa yitea gha. 'Ya katekwefaŋe rewebea ŋa kasame pa kwa kema ta ŋa, kezha ncɛ nda zeweve ta ŋa ke hwelefefi. Tagha gɛ, katenewe hawe nya te gha hɛ.

⁶ 'Ya katebete kəsə kənəa gha kezha pəli ŋa hawe. 'Ya kateve ŋa kawəsə keyipə pa.

⁷ Tagha gɛ, katehwɛ mbeli pɛtɛ nyi ketenewe ŋa, ma ke hɛ sha tetsa lewela: Ŋgwəpə Ninive keŋzla nda gɛ wa! Wa nde tezhɛ heli yite tse wa? Tema teŋ'we ka gweɗakwe ŋa mbeli tse wa?»

Kateme ɗa nya kala ŋa Tɛbɛs te Ninive

⁸ Ninive, gha nza za ma ke Tɛbɛs, meleme nya kwelɛ yɛ dzeve ta hələa Nil, nya ntəslə kwa yɛmə, nya nza zli nya yite kandərə, nya nza ndərə kazli nya yite na?

⁹ Ɛtiyopi ba'a Ɛzhipte ka se kafə nda wəshi nyi keɗema kakiɗi. Ka Pəwt ba'a ka Libi ka se kambeli nyi yite.

¹⁰ Ndagwara nahe mbeli kegha kafəhwe mbeli nyi mbe Tɛbɛs perə. Nahe ka ghema ta ŋkɛ keŋkeɗemte ŋwalea fəshia ŋkɛ dzeyi kwa yɛ baŋwa ta hweŋkwa. Nahe mbeli kenehehwe mbeli nyi te ghə nyi mbe le kwasheghediɗi, nahe mbeli ketseyi mbelia jama nyi mbe dzeyi kwa yɛ zewe lɛ.

¹¹ Ma gha le ŋa ŋa gɛ Ninive, katenza na keghwəyi ghwəyi va yaka ba'a katewəfərə na va hawe. Ma gha le ŋa ŋa gɛ ne, katezele ŋkwa kewəfərə na va ka jaga ta ŋa.

Kateŋzla Ninive

¹² Nahe zli nyi yitea gha kenza kala ya ta dasekwa nyi kenehe nehe. Gegəzətema ta mbeli ke yɛ dasekwa ne, kabete hɛ kadzawa mɛa wəndə nya keɗe kazeme hɛ.

¹³ Nahe ka sewajɛa ŋa kenza kala mi. Nahe gelembe nyi mɛa hɛɗia ŋa keghwenemte nda geva fate fate ke ka ghema ta ŋa, nahe ghwə keteremte wəshi keŋzle ta nci.

¹⁴ Ka Ninive, gə mə yɛmə, hi mə zli nya yitea gheyɛ, ŋkeɗe mə rekɛ ba'a kele mə wəsə kempa brəki.

¹⁵ Ama katempə yɛ va ghwə keɗema kwamte mpa. Kateza sebe ka jaga ta ŋayɛ te gheyɛ kala nya zeme wəshi yɛ dzale. Ninive, nahe mbeli nyi mbe gha kese kwele kwele kala yɛ dzale.

Kateza sebe te ka Ninive

¹⁶ Kwele kwele ma se ka zhɛre dzeve ta ŋa ke saseregwa nyi te ghweme. Tsetsenya ne, nahe hɛ kezanji kala zhamaya nyi kezlənji.

¹⁷ Nahe ka ya ŋa kese kala yɛ dzale, ka mene slene ta ŋa kala ləmbəa zhamaya nyi kemenji hwa wəfe te vəa ntasle. Ɓelama ta veci ne, kazlənji hɛ kalə te ŋkwa nya ɗepema mbeli. Tema lənji hɛ wa?

Ndiremi nya ɗema ghwɛ yite

¹⁸ Meghe nya mbe Asiri, nahe mbelia ŋa nyi te ghə kenza yitea hɛ, nahe mbeli nyi te ghəa ka sewajɛa ŋa kempə. Nahe mbelia ŋa ketazemte geva dzeme hwa yɛ ghweme. Wəndə shɛ kezha tsene hɛ we.

¹⁹ Ndiremi nya ɗema ghwɛ yitea ya te gha, katempi yɛ zhia ŋa we. Ma yayata wəndə nya kefate nza ta ŋa ne, kampi dzeve ŋkɛ yitea ndiremi nya te gha, kwa nza ŋkɛ wa nde sakɛma yaka va 'yaghwa mehele ta ŋa nya memene na wa?