Mishɛ 4 - Ghena ta Shala

Zhɛrəzalɛm, wədəa kwelɛŋe

¹ Ma te kwete hɛ ne, kaganda tenza ghweme ta ghɛa Mahwətə biya ma ke kweci ghweme, biya ma tenza ŋkɛ ke yɛ wəmbə. Tagha gɛ, katese mbeli kwele kwele kanza pelɛ.

² Kwele kwele hwelefe nyi ketese, ma ke hɛ sha tegeze: Nde mə, dzeme ɓəmə ghweme ta Mahwətə, pelɛ ghɛa Shala ta Zhakob. Katencɛ ɓəmə wəsə nya ɗe ŋkɛ va gheɓəmə ŋkɛ, katedzeghwa mə kwa hweŋkwa nya ncɛ ɓəmə ŋkɛ. Kwa nza ŋkɛ ne, se mbe Siyon tese teke wəsə, se mbe Zhɛrəzalɛm tese ghena ta Mahwətə sha gheɓəmə.

³ Katenegha fete ŋkɛ kwelɛ mbeli kwele kwele, katemeha ghwə ŋkɛ te hɛɗi nyi berete berete, ya nyi cakeɗa cakeɗa. Kategezla sakwə hɛ le yɛ kafayɛa nci ba'a yɛ hwətə le yɛ megha ta nci. Mba kwete hɛɗi katempa le kwete we, mba mbeli kateteke ntsehwelea mpa we.

⁴ Yayata wəndə katewəza yɛ rɛzɛŋe keɗema yɛ dasekwa ta ŋkɛ le kwelɛŋe, wəndə shɛ kategha ŋkɛ we. Mahwətə nde berete le ghəa ŋkɛ nde gezete.

⁵ Yayata hwelefe kamene wəsə nya ndeɗehwe nda ke shala ta ŋkɛ. Ama gheɓəmə ne, wəsə nya ndeɗehwe nda ke Shala Mahwətə ta ɓəmə yamene mə kaghala ghala.

Mahwətə nde tenza kameghe mbe Zhɛrəzalɛm

⁶ Ma ke Mahwətə: «Ma te vecia shɛ ne, katetsene mbeli nyi ketseheɗe 'ya, katerəkwə nyi kefəhwe geva ba'a nyi sahwe nda yaka 'ya ke hɛ 'ya.

⁷ Ma nyi ketseheɗe ne, katezhɛre hɛ 'ya kanyi ketetene teghweme. Ma nyi kefəhwe geva ne, katezhɛre hɛ 'ya kahwelefe nya berete. Ma pelɛ ghweme ta Siyon ne, 'ya Mahwətə nde tenza kameghea nci, se tsetsenya pa kaghala ghala.

⁸ Ma gha gɛ wəmbəa Zhɛrəzalɛm nya kenewe ghweme te mbeli kala nde ya wəshi pelɛ ghəa ŋkwa nya biya, katekemave berete ta ŋa nya vəashi na. Katezhɛne Zhɛrəzalɛm kanza kawədəa meleme.»

Zəzə nyi va Mahwətə kezha Zhɛrəzalɛm

⁹ Ka Zhɛrəzalɛm, va wa tsa lewela nyi yɛ tsetsenya wa? Va wa heha yɛ kala male nya keteya wa? Mba meghe va gheyɛ wəka? Nahe ka ncɛ ŋayɛ ntsehwele kempənji na?

¹⁰ Heha mə ba'a ŋələvə mə kala male nya keteya! Kwa nza ŋkɛ ne, kateshave yɛ mbe meleme kalə kanza hwa gamba tsetsenya, katejive yɛ hwa'a pelɛ Babilone. Waɗe tenza yɛ pelɛagha, katezləgwə ŋayɛ Mahwətə shave mbe dzeve ta ka ghema ta ŋayɛ pelɛagha.

¹¹ Ma tsetsenya ne, kwele kwele hwelefe nyi ketseneyite geva yitea gheyɛ. Ma ke hɛ sha geze: «Kelemte ɓəmə zləvə te meleme ta nci, mare ɓəmə Zhɛrəzalɛm nya kakwəfi.»

¹² Keɗepe zəzə nyi va Mahwətə mbelia shɛhɛ we. Kefave ghena nyi mbe ghəa ŋkɛ hɛ we. Tsene yaɗe ŋkɛ katsene hɛ kala ghəa ha kwa lane.

¹³ Ma ke Mahwətə: «Sate mə kaleke ha ka Zhɛrəzalɛm! Kateve ŋayɛ berete 'ya kala mca nya nza tereme lɛ kwa ghə ve ba'a nya nza cɛpea mze kwa ghwə ghwə te. Katempə mbeli kwele kwele yɛ. Ma wəshia nci nyi tefə yɛ ne, kateve ɗa geva hɛ tekeleke, 'ya Mahwətə nya kesleke hɛɗi pɛtɛ.»

¹⁴ Ma tsetsenya ne, peperawe mə geva ta ŋayɛ kawəsə kencɛ nehwene ka Zhɛrəzalɛm, gheyɛ nyi ketsene ka sewajɛa ŋayɛ. Ka ghema ta ŋayɛ kantəslə ŋayɛ kezha ɗa ŋayɛ. Le geta tempa wəndə nya te ghəa ka Israyɛl hɛ yitea ghereslɛ.