Mark 3 - Ghena ta Shala

Wəndə nya kemte mtea dzeve

¹ Pa Yɛsə dzembe cɛ kesəkwə ghə zhɛkwa. Mbe kwete wəndə kemte mte dzeve te.

² Ma mbeli nyi tagha ne, ntake hɛ kanewe Yɛsə le ntsehwele nda kwete kambele wəndəa shɛ ŋkɛ te veci kezhɛne mpi, nda ɗepe ve nda fete hɛ.

³ Ma ke Yɛsə sha wəndə nya kemte mtea dzevea shɛ: «Sate ŋa, slete kwa kema ta mbeli pɛtɛ.»

⁴ Ma ke 'yɛwete va mbeli: «Wa yandeke ɓəmə hweŋkwa kemene wəsə mahalegəa ɓəmə wa? Mene wəsə ganyɛ te veci kezhɛne mpi, na, mene wəsə kwa ndiremi na? Mbele mpia wəndə na, na sərə ŋkɛ kamte na?» Ama kaɗe hɛ kazhɛne we.

⁵ Mba Yɛsə kanewe hɛ le wənə tehwepe, kazhɛ nda wənəa ŋkɛ va ntɛaŋentɛa ta ghəa nci. Ma ke sha wəndə nyagha: «Nteɗete dzeve ta ŋa.» Pa ŋkɛ nteɗete dzevea shɛ ba'a pa nde zhɛrenyɛ megela.

⁶ Shavema ta ka Fariziyɛn ne, pa hɛ tsenete tsene le mbelia Hɛrode kezha sepa ntsehwele kepesle Yɛsə.

Mbeli katsene nda geva ke Yɛsə

⁷ Pa Yɛsə slənyɛ kadzeyi mɛa ndərəa Galilɛ le mbeli nyi ketəkwə təkwə, kwele kwele mbeli təkwə təkwəte ŋkɛ, se mbe Galilɛ ba'a se mbe Zhəwdɛ,

⁸ se mbe Zhɛrəzalɛm ba'a se mbe Idəmɛ, se te hɛɗia mbeli nyi pelɛ kema ta hələa Zhəwrdɛŋe, te hɛɗi nyi kwa ghala le Tir ba'a Sidon. Mbelia shɛhɛ se sha Yɛsə va nya fate zləvəa wəsə nya mene ŋkɛ hɛ.

⁹ Pa Yɛsə geze nda ke mbeli nyi ketəkwə təkwə kezha keleke nda kwambelə nya ɓɛhwɛ hɛ yagha mbeli kaŋkeɗemte ŋkɛ.

¹⁰ Ma kwa nza ŋkɛ kambe ka zereghwe kwele kwele ne, kawədə geva mbeli nyi shewə va zereghwe kezha kwaɗe ŋkɛ.

¹¹ Ma kwa nakɛ ŋkɛ ka 'yi'yɛghwə ne, gwəɗəŋə hɛ mbe hwəa ŋkɛ, ma ke hɛ sha lewela: «Gha ya kaWəzege ta Shala.»

¹² Pa fɛake hɛ le berete kezha ɗema hɛ kencɛ ŋkɛ.

Tseha ta ka təkwə təkwə meŋe bakeghəmbe

¹³ Pa Yɛsə dzeme pelɛ ghweme, pa hekakɛ mbeli nyi ɗe ŋkɛ. Pa hɛ se shɛ.

¹⁴ Pa tsehave mbeli meŋe bakeghəmbe ba'a ndeke nda slə ke hɛ kaka ghwene ta ŋkɛ, kezha nza hɛ le ba'a kezha ghwene hɛ kazlape ghena,

¹⁵ pa ŋkɛ ndeke nda berete ke hɛ kezha ŋka 'yi'yɛghwə shave mbe mbeli.

¹⁶ Wa nyi mbeli nyi tsehave ŋkɛ meŋe bakeghəmbe nyi: Simon nya hekate nda slə Yɛsə kaPiyɛre,

¹⁷ Zhake ba'a wəza meghekɛ Zhaŋe, ŋwalea Zɛbɛdɛ: pa Yɛsə hekate nda slə ke hɛ kaBowanɛrzhɛs, geze ta ŋkɛ: ŋwalea berazlɛ ta va,

¹⁸ Andrɛ, Filipe, Bartɛlemi, Matiye, Tomas, Zhake, wəzege ta Alfɛ, Tadɛ, Simon, nde mpa yitea hɛɗia ŋkɛ

¹⁹ ba'a Zhəwdas Iskariyote nya ketepamte Yɛsə.

Yɛ Yɛsə le Bɛlzɛbəl

²⁰ Pa ŋkɛ zhɛneke geva kase sha ghɛ. Kwele kwele mbeli tseneke geva zhɛkwa, keslave zeme wəsə kezeme yɛ Yɛsə le mbeli nyi ketəkwə təkwə we.

²¹ Ma kwa fate mbeli nyi keyake ŋkɛ, pa hɛ se kezha kese, ma ke hɛ: «Nahe ŋkɛ kenza kedaghwele daghwele.»

²² Ma ke ka rafe wəsə mahalegə nyi kesawa pelɛ Zhɛrəzalɛm: «Bɛlzɛbəl, gətəli ya mbe, meghea 'yi'yɛghwə nde ve nda berete keŋka 'yi'yɛghwə shave mbe mbeli.»

²³ Pa Yɛsə hekakɛ hɛ ba'a gezete nda ghena ke hɛ le ghena keyipə pa: Tsema nza Satan kaŋkamte ghəa ŋkɛ le ghəa ŋkɛ wa?

²⁴ Ma kenza mbeli nyi te hɛɗi meghe kampa kwelɛ ghəa nci ne, kanzate nza hɛɗi meghea shɛ we,

²⁵ ma kenza mbeli nyi ki ghɛ kampa kwelɛ ghəa nci ne, kanzate nza ghɛa shɛ we.

²⁶ Ma kenza Satan kampa le ghəa ŋkɛ, ma kenza ŋkɛ kenehe nehe mbe ne, kanzate nza berete ta ŋkɛ we, ama kiɗi yakiɗi ŋkɛ.

²⁷ Wəndə shɛ kadzeki ghɛa nde berete kezha fə wəshia ŋkɛ keɗema ŋkɛ kehwepete wəndə nya beretea shɛ kaba we. Ma kwa sebe ta nya hwepete ŋkɛ ne, wərə ŋkɛ kafəhwe pɛtɛa wəshia nyi ki ghɛa ŋkɛ.

²⁸ Kaganda ne, ma 'ya sha gheyɛ: wərə mbeli kakemave kelemte jaɗafa ta nci pɛtɛ ba'a pɛtɛa ŋele nyi ŋelekɛ Shala hɛ te wənə.

²⁹ Ama wəndə nya keŋele Sefəa Shala ne, katekelemte geva ŋa ŋkɛ jaɗafa tɛape te wənə we, kwa nza ŋkɛ jaɗafa nya kaghala ghala yamenete ŋkɛ.

³⁰ Ma nda gezete nda Yɛsə ke hɛ kala nya ne, va nya geze hɛ: «'Yi'yɛghwə ya yitea ghə ve», ke hɛ.

Meghekɛa Yɛsə ba'a ka menəhɛnyɛ

³¹ Pɛkwe yɛ meghekɛa Yɛsə ba'a ka menəhɛnyɛ, ghereŋe hɛ pelɛke kwa degha, pa hɛ ghwenakɛ wəndə kaheka ŋkɛ.

³² Mbeli kwele kwele ya mentishɛ yitea Yɛsə, ma ke kwete wəndə shɛ: «Wa nya meyɛ ŋa ba'a ka menəhɛ ŋa nyi pelɛ kwa degha kaheka ŋa.»

³³ Ma ke Yɛsə: «Wa meyɛ ɗa hwa wəndə wa, wa ka kesaka meyɛ ɗa wa?»

³⁴ Newe ke sha mbeli nyi dzeyi tagha mentishɛ ma ke: «Newe ma mə, wa nya yɛ meyɛ ɗa le ka menəhɛ ɗa nyi teke.

³⁵ Kwa nza ŋkɛ, ma wəndə nya kemene wəsə nya ɗe Shala ne, gheŋkɛ ya kamenə ɗa ba'a kameyɛ ɗa.»