Mark 12 - Ghena ta Shala

Yipə pa te ka mene slene nyi 'yaghwa 'yaghwa mehele

¹ Ntake Yɛsə kageze nda ghena ke hɛ le ghena keyipə pa: «Pa kwete wəndə mɓete yɛ rɛzɛŋe, ŋate zli ntəslə yitea wəvea shɛ, lakwe ŋkɛ sha ki kezha hetəsə kwa, ŋakwe ŋkɛ sha ŋkwa keya ŋkɛ. Pa ŋkɛ dapate nda ŋkɛ te dzeve ke ka mene slene, cape ŋkɛ kadzehwa mte.

² Ma kwa nakanji wəshia shɛhɛ ne, pa ghwenakɛ nda mava ta ŋkɛ ke ka mene slene ta wəfe ta rɛzɛŋe, kezha kele nda zhike ŋa ŋkɛ bela kase.

³ Ama pa hɛ keseve mava shɛ, ɗate ŋkɛ ba'a ŋkamte ŋkɛ pala pala.

⁴ Pa wəndə ke wəve nyagha ghwenakɛ kwa bake ta mava kalə sha hɛ, pa hɛ mpave ŋkɛ mbe ghə ba'a ŋelekɛ ŋkɛ.

⁵ Pa wəndə ke wəve ghweneghe kwete mava zhɛkwa, pa hɛ peslekɛ ŋkɛ. Pa hɛ menete nda ke kweci mbeli tsagha shɛ, pa hɛ ɗate kweci, mpəmte kweci.

⁶ Kwetɛŋe wəndə nya ketene va wəndə ke wəve, wəzege ta ŋkɛ nya ɗehwe ŋkɛ. Pa ŋkɛ ghweneghe nda ŋkɛ ke hɛ kakwa keɗaŋe, ma ke ke ta ŋkɛ: Katehawe hɛ va wəzege ta ɗa.

⁷ Ama ma ke ka mene slene ta wəvea shɛhɛ kwelɛ ghəa nci: Yawa, wa nya nde zeme ghɛ nya te kwete və nya gɛ! Ŋa ŋkɛ tenza wəve nya, ngara ɓəmə, peslekɛ ɓəmə ŋkɛ yitea nza wəve kaŋa ɓəmə.

⁸ Pa hɛ keseve wəzegea shɛ, peslekɛ ŋkɛ ba'a neghamte geva ta ŋkɛ shave mbe wəve.

⁹ Tsema temene wəndə ke wəve wa? Katese ŋkɛ, kateza sebe ŋkɛ te ka mene slenea shɛhɛ ba'a katedape nda wəvea ŋkɛ ŋkɛ te dzeve ke kweci mbeli.

¹⁰ Nahe gheyɛ kejaŋgate ghena shɛ mbe Ghena ta Shala, ghəpə yite we: Ma pelɛ nya neghamte mbeli nyi keŋa cɛ ne, gheŋkɛ nde zhɛrenyɛ kapelɛa megwekwe.

¹¹ Gheŋkɛ ya kaslene ta Mahwətə. Wəsə meŋele ŋkɛ kwa ntsə ta ɓəmə.»

¹² Kaɗe mbeli nyi te ghəa ka Zhəwif kakese ŋkɛ, kwa nza ŋkɛ nahe hɛ keɗepe te ghəa nci gezete ghena keyipə pa nya ŋkɛ, ama kazhɛ nda ghazlənə ke hɛ va mbeli. Pa hɛ sərəakɛ ŋkɛ ba'a dzeghwanji.

Tsehe nda jaɓeregwale ke Sɛzar

¹³ Pa mbeli ghweneghe kweci ka Fariziyɛn ba'a kweci mbelia Hɛrode sha Yɛsə kezha ŋa nda keleŋa laka 'yɛwe ghena.

¹⁴ Ma ke hɛ se kagezete nda: «Nde sleke n'yɛ, nahe n'yɛ keɗepe ghena nya kaganda yageze na. Kaghazlənə na va wəsə nya zəzə mbeli we, kwa nza ŋkɛ ne, katsakɛ ŋa ghena ta kwele nya geze mbeli we, ama kaganda ta wəsə nya ɗe Shala kanza wəndə le, yateke nda na ke mbeli. Gezete n'yɛ, nahe wəsə mahalegəa ɓəmə kendeke ɓəmə hweŋkwa ketsehe nda jaɓeregwale ke Sɛzar ŋgwamna nya wəba na? Tserame nda tsehe nda ghen'yɛ na, na ewə na?»

¹⁵ Ama nahe Yɛsə keɗepe zəzə nya mbe ghəa nci nyagha, ma ke sha hɛ: «Wa raberə ŋa ɗa keleŋa yɛ wa? Ncɛte ɗa mə cɛdɛa shɛ kwetɛŋe ga!»

¹⁶ Pa hɛ ncɛte nda cɛdɛa shɛ kwetɛŋe, ma ke Yɛsə sha hɛ: «Ŋa wa pa ta kema nya ba'a slə nya te wa?» Ma ke hɛ zhɛnete nda: «Ŋa Sɛzar.»

¹⁷ Ma ke Yɛsə sha hɛ: «Yawa, zhɛnave nda mə wəsə nya kenza kaŋa ŋkɛ ke Sɛzar, zhɛnave nda mə wəsə nya kenza kaŋa ŋkɛ ke Shala.» Heheɓake hɛ va zhɛne ta Yɛsə.

Same ta mbeli kwa kwele

¹⁸ Pa kweci hwa ka Sadəsɛyɛn se sha Yɛsə. Ghenci ka geze kaɗema mbeli kasame kwa kwele le mpi. Ma ke hɛ 'yɛwete ghena ve:

¹⁹ «Nde sleke n'yɛ, ma ke Moyize rafete n'yɛ: Ma kemtenyɛ wəndə kaɗema ŋkɛ keyake wəzege sawa hwa male ta ŋkɛ ne, hweŋkwa ya va wəza meghekɛ kakele malea shɛ kezha ya nda hwelefe sawa hwe.

²⁰ Kweci mbeli ya shɛ hwa ghen'yɛ mberefaŋe kaŋwalea male. Wəmakwe Tezhɛa megheyɛa nci sha male, mtiwə ŋkɛ kaɗema keyake wəzege hwe.

²¹ Wəmakwe nde bake sha malea shɛ, mtiwə ŋkɛ perə kaɗema keyake ŋkwa hwe. Tsagha kwa maheke perə.

²² Pɛtɛa nci mberefaŋe se malea shɛ yitea hɛ, mpəakwe hɛ pɛtɛ kaɗema keyake ŋkwa hwe. Mtiwə malea shɛ kwa sebe ta nci perə.

²³ Yawa, ma te veci nya tesame mbeli pɛtɛ kwa kwele le mpi ne, ŋa wa tenza male hwa mbeli nyi mberefaŋe nyi, kwa nza ŋkɛ nahe nde kese yitea hɛ pɛtɛ wa?»

²⁴ Ma ke Yɛsə zhɛnete nda ke hɛ: «Nahe ghena kezave ŋayɛ za, va nya ɗepema Ghena ta Shala ba'a berete ta ŋkɛ yɛ.

²⁵ Ma vəa ŋkwa nya tesame mbelia kwahɛɗi kwa kwele ne, mba yɛ zhili le mi kawəme geva we, kala ka ghwene ta Shala tenza mbeli pɛtɛ pelɛ ghweme.

²⁶ Ma te ghəa same ta mbeli kwa kwele le mpi ne, kegha yɛ kajaŋgate ghena ta tigə nya tse ghwə mbe palepa ta Moyize wəka? Ma ke Shala gezete nda ke Moyize: 'Ya ya kaShala ta Abraham, kaShala ta Izak ba'a kaShala ta Zhakob.

²⁷ Kenza Shala kaShala ta ka mpə mpə we, ama nahe ŋkɛ kenza kaShala ta mbeli nyi teghweme. Tsagha gɛ, nahe hweŋkwa kezave ŋayɛ za fate fate.»

Wəsə mahalegə nya kwele ma

²⁸ Nahe kwete nde rafe wəsə mahalegə kefa nda ghəpə hɛ. Ma kwa nakɛ ŋkɛ megela zhɛnete nda ghena Yɛsə ke ka rafe ghena ta Shala ne, pa hendave nda geva, ma ke 'yɛwete ve: «Nyama ya kwele ma hwa wəshi mahalegə wa?»

²⁹ Ma ke Yɛsə zhɛnete nda: «Wa nya wəsə mahalegə nya kwele ma nya: Fa, hwelefe ta Israyɛl, deke Shala Mahwətə ta ɓəmə ya kaMahwətə.

³⁰ Ɗe Shala Mahwətə ta ŋa le wənəa ŋa pɛtɛ, mehele ta ŋa pɛtɛ, le zəzə ta ŋa pɛtɛ ba'a berete ta ŋa pɛtɛ.

³¹ Wa nya kwa bake ta wəsə mahalegə nya: Ɗe nde ghedəkwəa ŋa kala ghəa ŋa. Kwete wəsə mahalegə shɛ kwele ma ke nyi bake nyi we.»

³² Ma ke nde rafe wəsə mahalegəa Shala sha Yɛsə: «Megela Nde sleke ɗa, kaganda yagezete na, deke Mahwətə ya kaShala, kwete shɛ keɗema gheŋkɛ we.

³³ Nahe ŋkɛ kehi kaɗe Shala wəndə le wənəa ŋkɛ pɛtɛ, mehele ta ŋkɛ pɛtɛ ba'a berete ta ŋkɛ pɛtɛ. Nahe ŋkɛ kehi kaɗe nde ghedəkwəa ŋkɛ ŋkɛ kala ghəa ŋkɛ. Ganyɛ ma ŋkɛ ke yɛ melɛ kwa tere tere ba'a wəshi nyi fə nda mbeli ke Shala.»

³⁴ Ma kwa nakɛ Yɛsə le mehele zhɛnete ŋkɛ ne, ma ke shɛ: «Kenza na cakeɗake le Meghea Shala we.» Mba wəndə shɛ kashɛ 'yɛwe ghena ve zhɛkwa we.

Yɛ Mɛsi le David

³⁵ Ma kateke nda wəsə Yɛsə ke mbeli mbe ghɛa Shala, ma ke: «Tsema geze ka rafe wəsə mahalegə kahwelefe ta David Mɛsi wa?

³⁶ Kwa nza ŋkɛ ma ke David gezete le ghəa ŋkɛ kwa nza Sefəa Shala mbe: Ma ke Mahwətə sha Nde sleke ɗa, Ntishɛ ŋa te kwa zeme ta ɗa, nda ŋkeyi ka jaga ta ŋa 'ya mbe hwəa seɗa ta ŋa.

³⁷ Nahe David le ghəa ŋkɛ kegezete kaNde sleke ŋkɛ Mɛsi. Tagha gɛ ne, tsema nza Mɛsi kahwelefe ta David wa?» Nahe fa ghena ta Yɛsə kenza zeɗehwe nda ke mbeli kwele kwele.

Yɛsə kageze nda ke mbeli kaya ghə va ka rafe wəsə mahalegə

³⁸ Ma ke mbe wəshi nyi teke nda ŋkɛ ke mbeli: «Ntsehwele mə yitea ka rafe wəsə mahalegə. Mbe gare ɗe hɛ kadzeghwa, le hawe ɗe hɛ kanjiŋwe hɛ mbeli te shikwə.

³⁹ Wəshi kentishɛ nyi te kema yawədə hɛ mbe cɛ kesəkwə ghə, tsagha hwa yɛ veghe perə.

⁴⁰ Pɛtɛ hɛ fəhwe wəshia ka wedidi, ɓiyitsa ne, kwele kwele temə hɛ te səkwə ghə kezha newe hɛ mbeli kambeli ganji. Kwele ma tenza ɗa te hɛ.»

Wəsə nya veyi male wede kwa səndəkwə

⁴¹ Mentishɛ dzeme vare wəsə kebete wəshi nya mbe ghɛa Shala ne, ntake Yɛsə kanewe tsema tsema bete wəshi mbeli kwa. Kwele kwele ka mcɛləa kɛfi nyi kebete cɛdɛ kwele kwele kwa.

⁴² Pa kwete male wede kakwa titikwə se ba'a beteyi dala dala bake kwa, cɛdɛ nya ɓɛhwɛ.

⁴³ Pa Yɛsə hekakɛ mbeli nyi ketəkwə təkwə, ma ke sha hɛ: «Kaganda ne, ma 'ya sha gheyɛ: wede kwa titikwə nya ne, kwele ma beteyi cɛdɛ nde kwa səndəkwə ke pɛtɛa kweci mbeli.

⁴⁴ Kwa nza ŋkɛ ma cɛdɛ nya beteyi kweci mbeli kwa ne, nya ketene yitea slene ta nci, ama ghenta mbe titikwəa nta ne, pɛtɛ beteyi nde kwa, pa ta ŋkɛ nyagha ve kaŋa wəsə kezeme ta nta.»