Mark 1 - Ghena ta Shala

Zhaŋe Batiste

¹ Gha ta Ghena kwatenca nya ganyɛ ta Yɛsə Kriste, Wəzege ta Shala.

² Ma ke rafete geva mbe palepa ta Ɛzayi, nde mɛ ŋkwa: «Ma 'ya Shala ne, 'ya kateghwene nde mɛ ŋkwa ta ɗa te kema ta ŋa, kezha hi ŋa hweŋkwa.

³ Ma ke kwete wəndə sha zlape ghena kwamte te ɓerama: Hele nda mə hweŋkwa ke Mahwətə, hi nda mə yɛ hweŋkwa tiɗiɗia tiɗiɗia.»

⁴ Pa Zhaŋe Batiste nca kwamte te ɓerama, ma ke sha zlape ghena ta batɛme: «Zhɛre mə nza ta ŋayɛ, mene mə batɛme kezha kele ŋayɛ jaɗafa ta ŋayɛ Shala seyi te wənə.»

⁵ Kase pɛtɛa mbeli nyi te hɛɗia Zhəwdɛ ba'a nyi mbe meleme ta Zhɛrəzalɛm shɛ kampi dzeve te yɛ jaɗafa ta nci kwa ntsə ta mbeli pɛtɛ, kamene nda batɛme Zhaŋe ke hɛ kwa hələa Zhəwrdɛŋe.

⁶ Le shintia zlegwemə tsate lekwesa ta Zhaŋe mbeli, hətə ya hwa hwə ve, hegi ba'a mze nyi hwa gamba yazeme ŋkɛ.

⁷ Ma ke sha mbeli: «Ma wəndə nya ketese kwa sebe ta ɗa ne, berete ma ŋkɛ ke 'ya. Kehi 'ya kavəkwə kezha pele zewe nyi mbe tsahwa ta ŋkɛ we.

⁸ Ma 'ya ne, le yɛmə menete ŋayɛ batɛme 'ya, ama gheŋkɛ ne, le Sefəa Shala temene ŋayɛ batɛme ŋkɛ.»

Batɛmea Yɛsə ba'a dzeghe ta ŋkɛ

⁹ Yewə, ma te vecia shɛ ne, pa Yɛsə se mbe Nazarɛt nya te hɛɗia Galilɛ, pa Zhaŋe menete nda batɛme kwa hələa Zhəwrdɛŋe.

¹⁰ Ma vəa ŋkwa nya same Yɛsə kwa yɛmə ne, pa nakɛ ghweme kaghwene geva ba'a Sefəa Shala kasawa kadzeghə kala gheɗepe.

¹¹ Ma ke ghena gezete geva sawa pelɛ ghweme: «Gha ya kaWəzege ta ɗa nya ɗehwe 'ya, kazlama 'ya te gha kwele kwele.»

¹² Te ŋkwa shɛnyɛ kwa sebe ta ŋkɛ, pa Sefəa Shala kelehwe ŋkɛ kadzemte te ɓerama.

¹³ Pa ŋkɛ nzanyɛ kahɛ wəfaɗemsə kwamte te ɓerama kezha dzeghe ŋkɛ Satan. Hwa wəshi nyi hwa gamba nza ŋkɛ, kamene nda slene ka ghwene ta Shala.

Yɛsə kaheka ka kese kelepe wəfaɗe

¹⁴ Ma kwa sebe ta nya veyi Zhaŋe mbeli kwa daŋgayɛ ne, cape Yɛsə kadzawa Galilɛ kazlape Ghena kwatenca nya ganyɛ nya kese va Shala.

¹⁵ Ma ke: «Nahe və nya kedzeghete geva kese, kwa nza ŋkɛ nahe Meghea Shala kehendeke geva. Zhɛre mə wənəa ŋayɛ, yɛ mə Ghena kwatenca nya ganyɛ.»

¹⁶ Ma kwa nza Yɛsə kadzeghwa dzeyi mɛa ndərəa Galilɛ ne, pa nakɛ ka kese kelepe bake, Simon le wəza meghekɛ Andrɛ. Kanegha bararawe hɛ te ndərə kezha kese kelepe.

¹⁷ Ma ke Yɛsə sha hɛ: «Təkwə təkwə ɗa mə, kaka kese mbeli tezhɛre ŋayɛ 'ya.»

¹⁸ Te ŋkwa shɛnyɛ sərəakɛ bararawea nci hɛ kezha təkwə təkwə ŋkɛ.

¹⁹ Pa Yɛsə hendakɛ geva dzeyi te kema ba'a nakɛ yɛ Zhake le wəza meghekɛ Zhaŋe, ŋwalea Zɛbɛdɛ. Kwa kwambeləa nci hɛ kahi bararawea nci.

²⁰ Taghanyɛ ne, pa Yɛsə hekakɛ hɛ, pa hɛ sərəakɛ yitenyɛa nci Zɛbɛdɛ kwa kwambelə le ka mene slene, cape hɛ yitea Yɛsə.

Wəndə nya shewə va 'yi'yɛghwə

²¹ Pa yɛ Yɛsə le mbeli nyi ketəkwə təkwə dzembe Kapɛrnawəm. Taghanyɛ te veci kezhɛne mpi ne, pa Yɛsə dzembe cɛ kesəkwə ghə, ntake ŋkɛ kateke nda wəshi ke mbeli.

²² Ma mbeli nyi kefa ghena ta ŋkɛ ne, heheɓake hɛ kwele kwele va ntsehwelea Yɛsə kateke nda wəshi ke mbeli, kwa ɗema ŋkɛ kala ka rafe wəshi mahalegə, ama le berete ta Shala tekete nda ŋkɛ ke hɛ.

²³ Taghanyɛ ne, pɛkwe kwete wəndə nya nza 'yi'yɛghwə yitea ghə ve hwa hɛ mbe cɛ kesəkwə ghə, ma ke sha lewela:

²⁴ «Wa yaɗe na va ghen'yɛ wa, Yɛsə nde Nazarɛt? Gha se kezha za sebe te ghen'yɛ na? Nahe 'ya keɗepe ŋa, wəndə nya keveyi geva tekeleke nya ghweneke Shala na.»

²⁵ Ma ke Yɛsə shɛ le ghyana: «Nza divə, shave ŋa mbe wəndə nya.»

²⁶ Pa 'yi'yɛghwəa shɛ gagəzəte wəndəa shɛ le berete ba'a shavenyɛ mbe le lewela nya wəba.

²⁷ Heheɓake mbeli pɛtɛ va ntsehwelea Yɛsə kateke nda wəshi ke mbeli, ma ke hɛ 'yɛwete kwelɛ ghəa nci: «Wa nya wəsə wa, kwete nya mɛnɛfɛa teke nda wəshi ke mbeli nya le berete. Wəndə nya ne, pa le 'yi'yɛghwə sleke ŋkɛ kafa nda ghena hɛ.»

²⁸ Pɛtɛ mbeli kefate ghena nya geze mbeli te Yɛsə te ŋkwa shɛnyɛ tsagha te pɛtɛa hɛɗia Galilɛ.

Yɛsə kambe ka zereghwe kwele kwele

²⁹ Ma kwa shave hɛ mbe cɛ kesəkwə ghə ne, cape hɛ kalə kadzeki ghɛa yɛ Simon le Andrɛ, zlaɓe hɛ le yɛ Zhake le Zhaŋe.

³⁰ Meɓelahe kwa hawe ta Simon shewə va ɗawa, sema ta Yɛsə ne, pa mbeli gezete nda ghena te ghəa nta.

³¹ Pa ŋkɛ lə kadzeghə, pa keseve te dzeve, kesakate te ŋkwa, nahe ɗawa ta nta tsagha, pa nde takɛ nda wəsə kezeme ke hɛ.

³² Ma kwa se tɛhwɛɗi, pəkwəma ta veci ne, pa mbeli fəke nda pɛtɛa ka zereghwe ba'a ka 'yi'yɛghwə ke Yɛsə.

³³ Pɛtɛ tseneke geva mbeli nyi mbe melemea shɛ tagha kwa degha.

³⁴ Pa Yɛsə mbete mbeli kwele kwele nyi te yaka va mama ta zereghwe, pa ŋkɛ ŋkamte 'yi'yɛghwə kwele kwele perə. Kendeke nda hweŋkwa kegeze ghena ŋkɛ ke 'yi'yɛghwəa shɛhɛ we, kwa nza ŋkɛ nahe hɛ keɗepe nza ta Yɛsə.

Yɛsə kadzeghwa dzeyi mbe Galilɛ

³⁵ Mbanyɛ ŋkwa heviɗi te hendɛ ta ŋkwa ne, cape Yɛsə shave ki ghɛ. Kashavenyɛ mbe meleme kalə te ŋkwa nya ɗema wəndə te, ntake ŋkɛ kasəkwə ghə te ŋkwa shɛ.

³⁶ Cape yɛ Simon le mbeli nyi nza ŋkɛ le hɛ kalə kazele ŋkɛ.

³⁷ Ma kwa nakɛ ŋkɛ hɛ ne, ma ke hɛ shɛ: «Pɛtɛa mbeli kazele ŋa.»

³⁸ Ma ke Yɛsə sha hɛ: «Mbi ɓəmə kalə kadzembe kweci meleme, nahe ŋkɛ kehite geva kezha geze nda ghena 'ya ke hɛ perə, kwa nza ŋkɛ kezha gheŋkɛ se 'ya.»

³⁹ Tagha gɛ, ntəŋə ŋkɛ dzeyi mbe hɛɗia Galilɛ pɛtɛ kazlape ghena mbe cɛ kesəkwə ghə nyi te hɛɗia shɛ, pa ŋkamte 'yi'yɛghwə.

Yɛsə kambe nde derena

⁴⁰ Pa nde derena se kagwəɗəŋə mbe kema ta Yɛsə kampi nda dzeve, ma ke shɛ: «Ma keɗe na ne, wərə na kakiɗimte ɗa derena ta ɗa wɛŋe.»

⁴¹ Ntake helia Yɛsə kazhɛ nda yite kwele kwele, pa hake dzeve ba'a kwaɗakɛ, ma ke: «Kaɗe 'ya, nza wɛŋe.»

⁴² Tewə ketemə, nahe derena te wəndəa shɛ, wɛŋe ŋkɛ.

⁴³ Pa Yɛsə gezete nda kalə ŋkɛ sha ghɛa ŋkɛ le berete te ŋkwa shɛnyɛ.

⁴⁴ Ma ke shɛ: «Fa ndeɗekə, geze nda ma na ghena nya ke kwete wəndə ma. Ama kwiɗi ncɛte nda ghəa ŋa ke nde dzeghe Shala, dzeghekɛ melɛ kala nya gezete Moyize kezha ncɛ nda ke mbeli pɛtɛ nahe na kembe.»

⁴⁵ Ama sləma ta wəndəa shɛ ne, ntake kageze wəsə nya kemenete nda geva. Vatse nda shɛma Yɛsə ncɛ ghəa ŋkɛ darahwe mbe meleme, pa nzanyɛ pelɛ te ŋwela te ŋkwa nya ɗema wəndə te. Kase mbeli shɛ se te yayata ŋkwa.