Ləwke 4 - Ghena ta Shala

Gətəli kadzeghe Yɛsə

¹ Pa Yɛsə zhɛnakame geva same kwa Zhəwrdɛŋe. Nahe ŋkɛ kenza bətə mbe Sefəa Shala. Pa Sefəa Shala keleghe ŋkɛ kadzete ɓerama.

² Pa gətəli dzeghakɛ ŋkɛ kahɛ wəfaɗemsə. Wəsə shɛ kezehwe Yɛsə mbe hɛa shɛhɛ we. Ma kwa kiɗi hɛa shɛhɛ ne, pa ma zhɛte nda.

³ Tagha gɛ, ma ke gətəli shɛ: «Ma kenza ŋkɛ Wəzege ta Shala na ne, geze nda ke pelɛ nya kezha zhɛrenyɛ ŋkɛ kaɗafa.»

⁴ Ma ke Yɛsə shɛ: «Ma ke rafete geva mbe Ghena ta shala: Deke ɗafa nde ve ŋkwa teghweme we.»

⁵ Pa gətəli keleghe ŋkɛ kadzeme ŋkwa nya biya ma. Taghanyɛ ne, pa ncɛte nda pɛtɛa hɛɗi meghe nyi te hɛɗi lema.

⁶ Ma ke shɛ: «Kateve ŋa pɛtɛa berete ba'a mcɛləa hɛɗi meghea shɛhɛ 'ya. Kwa nza ŋkɛ nahe ŋkɛ kendeke ɗa geva, wərə 'ya kandeke nda ŋkɛ ke wəndə nya ɗe 'ya.

⁷ Vatse gɛ, gwəɗəŋə ŋa kwa kema ta ɗa, katenza pɛtɛa wəshia shɛhɛ kaŋa ŋa.»

⁸ Ma ke Yɛsə shɛ: «Ma ke rafete geva mbe Ghena ta Shala: Mahwətə Shala ta ŋa yahi na kahawe ve, deke gheŋkɛ yagwəɗəŋə na kwa kema ta ŋkɛ.»

⁹ Pa gətəli keleghe ŋkɛ kadzeme Zhɛrəzalɛm, veyi ŋkɛ kwa ghəa ghɛa Shala. Ma ke shɛ: «Ma kenza ŋkɛ Wəzege ta Shala na ne, neghaghe ghəa ŋa kadzawa,

¹⁰ kwa nza ŋkɛ ma ke rafete geva mbe Ghena ta Shala: Kategeze nda Shala ke ka ghwene ta ŋkɛ kaya ŋa.

¹¹ Zhɛne ne, katekele ŋa hɛ te dzeve ta nci kezha ɗema seɗa ta ŋa kampə nda geva ke pelɛ.»

¹² Ma ke Yɛsə zhɛnete nda: «Ma ke rafete geva mbe Ghena ta Shala: Dzeghema Mahwətə Shala ta ŋa na ma.»

¹³ Ma kwa kiɗimte dzeghe Yɛsə gətəli le mama ta ntsehwele ne, pa slənyɛ yite hwa'a te və nya kesləyi geva.

Yɛsə kagha slene ta ŋkɛ kwa Galilɛ

¹⁴ Pa Yɛsə zhɛneghe geva kadzawa Galilɛ, viɗi va berete ta Sefəa Shala. Pɛtɛ mbeli kageze ghena ta ŋkɛ te hɛɗia shɛ.

¹⁵ Kateke nda wəshi ŋkɛ ke mbeli mbe yɛ cɛ kesəkwə ghə ta ka Zhəwif, pɛtɛ mbeli kageze zləvəa ŋkɛ.

Kayɛ Yɛsə ka Nazarɛt we

¹⁶ Cape Yɛsə kadzawa Nazarɛt, te ŋkwa nya kele ŋkɛ. Ma te veci kezhɛne mpi ne, pa dzembe cɛ kesəkwə ghə kala nya seneve ŋkɛ. Pa ŋkɛ sate kajaŋga ghena ta Shala.

¹⁷ Pa mbeli ndeke nda palepa ta nde mɛ ŋkwa Ɛzayi. Pa ŋkɛ pelemte ba'a sepate kwete ŋkwa, ma ke rafete geva te ŋkwa shɛ:

¹⁸ «Nahe Sefəa Shala kenza kənəa 'ya. Nahe ŋkɛ kentave ɗa kezha zlape nda Ghena kwatenca nya ganyɛ ke ka titikwəa kɛfi, keghwenakɛ ɗa kezha geze pele ta ka daŋgayɛ waɗe ba'a pele ta ntsə ta ka ghwələa kɛfi, kezha mbele mbeli nyi sa nda yaka kweci mbeli ke hɛ,

¹⁹ kezha geze va nya tezlaɓa Mahwətə le mbeli te.»

²⁰ Pa Yɛsə peɗete palepa shɛ, ndeke nda ŋkɛ ke nde mene slene ba'a ntishɛnyɛ. Pɛtɛ mbeli nyi mbe cɛa shɛ kavereghe ŋkɛ.

²¹ Tagha gɛ, ma ke sha hɛ: «Nahe ghena nya gezete nya Ghena ta Shala kemenete geva ɓeshi kaŋa ŋayɛ, gheyɛ nyi kefa ghena ta ɗa.»

²² Zlama yazlama pɛtɛa mbeli nyi kefave ghena ta ŋkɛ. Hehake hɛ va ghena ganyɛ nya geze ŋkɛ. Ma ke hɛ: «Ashɛ wəzege ta Zhozɛf ŋkɛ wəka?»

²³ Ma ke Yɛsə sha hɛ: «Ghəpə yite we, ma pe yɛ sha tegeze ɗa ghena ŋela nya: Dakwəterə, mbete ghəa ŋa le ghəa ŋa gɛ gi! Ma pe yɛ tegeze ɗa zhɛkwa: Nahe n'yɛ kefave pɛtɛa wəshi nyi kemenete geva kwa Kapɛrnawəm, menete kala nyagha teke mbe meleme ta ŋa gi ga!»

²⁴ Ma ke Yɛsə sha hɛ zhɛkwa: «Kaganda ne, ma 'ya sha gheyɛ: Nde mɛ ŋkwa shɛ kayɛ ghena ta ŋkɛ mbeli mbe meleme ta ŋkɛ we.

²⁵ Kaganda ne, ma 'ya sha gheyɛ: ghəpə yite we, ka wedidi ya shɛ kwele kwele hwa ka Israyɛl vəa ŋkwa nya nza Ɛli teghweme. Te vecia shɛ ne, pa va ɗema me kava mahekene ba'a tere ŋkwaŋe. Kwele kwele ma menete geva te yayata ŋkwa.

²⁶ Ndagwara keghwenakɛ Ɛli Shala kalə sha kwete wəndəa nci we, ama deke ke male wede nya mbe Sarɛpta, te hɛɗia ka Sidon.

²⁷ Ka derena ya shɛ kwele kwele hwa ka Israyɛl te vəa Ɛlizɛ, nde mɛ ŋkwa, ama kwete wəndəa nci shɛ kekiɗinyɛ derena wɛŋe te we, ama deke Na'aman nde Siri.

²⁸ Kwele kwele hwepete wənə mbeli nyi mbe cɛa shɛ kwa fave ghena shɛ hɛ.

²⁹ Pepelɛhetɛme hɛ sate te ŋkwa, pa hɛ kesakave ŋkɛ mbe meleme ba'a keleghe ŋkɛ kadzeme ghəa ghweme nya nza meleme ta nci pelɛ, yitea tsəkwə ŋkɛ kadzawa.

³⁰ Ama seɗakwe ŋkɛ shavenyɛ kwelɛ tepe ta nci ba'a dzeghwanyɛ.

Wəndə nya nza 'yi'yɛghwə yitea ghə ve

³¹ Pa Yɛsə dzawa Kapɛrnawəm, meleme ta ka Galilɛ. Kateke nda wəshi ŋkɛ ke mbeli te veci kezhɛne mpi.

³² Heheɓake hɛ kwele kwele va ntsehwelea ŋkɛ kateke nda wəshi ke mbeli, kwa nza ŋkɛ le berete ta Shala geze nda ghena ŋkɛ ke hɛ.

³³ Ma mbe cɛ kesəkwə ghə ne, kwete wəndə nya nza 'yi'yɛghwə yitea ghə ve ya shɛ. Ma ke tsate lewela le berete:

³⁴ A! Wa yaɗe na va ghen'yɛ wa Yɛsə nde Nazarɛt? Gha se kezha za sebe te ghen'yɛ na? Nahe 'ya keɗepe ŋa, wəndə nya keveyi geva tekeleke nya ghweneke Shala na.»

³⁵ Ma ke Yɛsə shɛ le ghyana: «Nza divə, shave ŋa mbe wəndə nya.» Pa 'yi'yɛghwəa shɛ neghate wəndəa shɛ te ŋkwa kwa kema ta pɛtɛa mbeli nyi tagha. Pa nde shavenyɛ mbe kaɗema kemenete nda wəsə kwa ndiremi.

³⁶ Heheɓake mbeli pɛtɛ ve, ma ke hɛ kwelɛ ghəa nci: «Wa nya wəsə wa? Kantsə nda ghyana wəndəa shɛ ke yɛ 'yi'yɛghwə le berete, tagha gɛ, kashave hɛ.»

³⁷ Ntake mbeli kageze ghena ta Yɛsə te yayata ŋkwa te hɛɗia shɛ.

Yɛsə kambe ka zereghwe kwele kwele

³⁸ Cape Yɛsə shave mbe cɛ kesəkwə ghə kalə kadzeki ghɛa Simon. Shewə kwa hawe ta Simon va ɗawa kwele kwele, pa mbeli 'yɛwakɛ va Yɛsə kezha mbe malea shɛ ŋkɛ.

³⁹ Vəkwə Yɛsə kənəa malea shɛ, pa ŋkɛ ntsehete nda ŋzle ke ɗawa. Pa ɗawa ta nta kiɗinyɛ, te ŋkwa shɛnyɛ ne, pelɛhetɛme nde. Pa nde takɛ nda wəsə kezeme ke hɛ.

⁴⁰ Yipə le pəkwə veci ne, pɛtɛ mbeli nyi nza mama ta ka zereghwe va hɛ ki ghɛa nci fəke nda hɛ ke Yɛsə. Pa ŋkɛ dapaghe dzeve kənəa yayata wəndəa nci ba'a mbete hɛ.

⁴¹ Kashave 'yi'yɛghwə mbe kweci ka zereghwe kwele kwele le lewela, ma ke sha tsa lewela: «Gha ya kaWəzege ta Shala.» Ama pa Yɛsə ŋelete hɛ ba'a fɛake hɛ kegeze ghena, kwa nza ŋkɛ nahe hɛ keɗepe gheŋkɛ ya kaMɛsi.

Yɛsə kazlape ghena mbe Zhəwdɛ

⁴² Ma peslema ta ŋkwa ne, cape Yɛsə shave mbe meleme kalə te ŋkwa nya ɗema mbeli te. Ntake mbeli kwele kwele kazele ŋkɛ. Ma kwa ntsate ŋkɛ hɛ ne, pa hɛ ɗehwe kezha keseyi ŋkɛ kezha ɗema ŋkɛ kaslə yitea hɛ.

⁴³ Ma ke Yɛsə sha hɛ: «Nda 'ya kalə kageze nda Ghena kwatenca nya ganyɛ ta Meghea Shala ke kweci meleme perə, kwa nza ŋkɛ kezha gheŋkɛ ghweneke ɗa Shala.»

⁴⁴ Pa ŋkɛ zlapete ghena shɛ mbe cɛ kesəkwə ghə ta ka Zhəwdɛ.