Ka Rome 7 - Ghena ta Shala

Waɗe nde Kriste laka wəsə mahalegə

¹ Ka kesaka ma, nahe yɛ keɗepe wəsə nya tegeze ŋayɛ 'ya, kwa nza ŋkɛ ke mbeli nyi keɗepe wəsə mahalegəa Shala geze 'ya, kasleke wəndə wəsə mahalegə vəa ŋkwa nya nza wəndə teghweme we.

² Nahe male nya wəmeve mbeli kenza tehwepe vare za nta laka wəsə mahalegəa Shala, ama kemtenyɛ za, waɗe nde va wəsə mahalegəa shɛ.

³ Ma mba za nta teghweme nda wəmeve kwete nde ne, kwa vale tahe heka ŋkɛ mbeli. Ama kemte za nta nda wəmeve kwete ne, kaheka ŋkɛ mbeli kakwa vale tahe we, waɗe nde va wəsə mahalegəa shɛ, kwa wəmeve ŋkɛ kwete wəndə.

⁴ Tsetse yɛ perə ka kesaka meyɛ ɗa, nahe gheyɛ kempə ŋayɛ laka wəsə mahalegəa Shala te veci nya jikəte geva yɛ le Yɛsə. Tsetsenya ne, ŋa wəndə nya kelakame Shala same kwa kwele yɛ yitea mene wəsə nya zeɗehwe nda ke Shala gheɓəmə.

⁵ Kwa nza ŋkɛ ma kwa nza gheɓəmə vəashi kamene ɗe ta geva ne, le wəsə mahalegə mene slene ɗe ta geva ta ɓəmə kezha mene wəsə nya kekele ŋkwa kalə sha mte gheɓəmə.

⁶ Ama tsetsenya ne, nahe gheɓəmə kenza waɗe laka wəsə mahalegə, kwa nza ŋkɛ nahe gheɓəmə kenza kempə mpə laka wəsə nya kekeseyi ɓəmə kaka mavashi. Wərə mə kamene slene ta Shala kala wəndə mɛnɛfɛ laka Sefəa ŋkɛ, kaɗema kala nya heca, laka wəsə mahalegə nya kerafe rafe.

Wəsə mahalegə ba'a jaɗafa

⁷ Wa ke gheɓəmə sha geze wa? Nahe wəsə mahalegə kenza kajaɗafa na? Tsagha we. Ama nahe wəsə mahalegə kencɛte ɗa wəsə nya kajaɗafa. Kwa nza ŋkɛ kaɗepete sla ntsə 'ya yitea wəsə keɗema wəsə mahalegə kegezete: «Slama ntsə na yitea wəsə ma», ke we.

⁸ Laka ghena nya gezete Shala kemave hweŋkwa jaɗafa kezha mene pɛtɛa sla ntsə yitea wəshi kwa wənəa ɗa. Ma ya keɗema wəsə mahalegəa shɛ shɛ ne, nza kala wəsə nya kemte mte jaɗafa.

⁹ Ma vəashi, kaɗema wəsə mahalegə shɛ ne, teghweme 'ya. Ama veci nya se ghena nya gezete Shala ne, nahe jaɗafa kenza teghweme,

¹⁰ ma 'ya ne, kemte mte 'ya. Vatse gɛ, nahe ghena nya gezete Shala nya kehi kave ɗa mpi kekeleghe ɗa kalə sha mte.

¹¹ Kwa nza ŋkɛ, nahe jaɗafa kekemave hweŋkwa ba'a keghwetete ɗa laka ghena nya gezete Shala, tsagha gɛ, nahe ŋkɛ kepeslekɛ ɗa laka wəsəa shɛ.

¹² Tsagha ne, nahe wəsə mahalegə keveyi geva tekeleke, nahe ghena nya gezete ŋkɛ kenza tekeleke, tiɗiɗi ŋkɛ ba'a ganyɛke.

¹³ Wəsə nya megela nde zhɛrenyɛ kawəsə kemte sha 'ya na? Tsagha we. Ama jaɗafa nde menete. Kezha ncɛ geva ŋkɛ kawəsə kwa ndiremi, pa kelete wəsə ganyɛ yitea peslekɛ ɗa. Tsagha mbakete geva berete ta jaɗafa laka ghena nya gezeke Shala.

Jaɗafa kasleke wəndə

¹⁴ Nahe gheɓəmə keɗepe va Shala se wəsə mahalegə. Ama 'ya le ŋa ɗa ne, nahe 'ya kenza deke kawəndə ŋelɛ, nya kepamte nda geva ke jaɗafa kala mava.

¹⁵ Keɗepe 'ya tsema tsema mene 'ya we, wəsə nya ɗe 'ya kamene ne, kamene 'ya we, ma nya ɗema 'ya tɛape ne, gheŋkɛ yamene 'ya.

¹⁶ Ma kwa nza 'ya kamene wəsə nya zəzətema 'ya ne, nahe 'ya keyɛte wəsə mahalegə ba'a keɗepe ndeɗekə ŋkɛ.

¹⁷ Ma tsagha ne, 'ya nde mene wəsə nya kehitema geva we, jaɗafa nya mbe wənəa ɗa nde mene.

¹⁸ Nahe 'ya keɗepe kaɗema ghena ganyɛ mbe 'ya, geze ta ŋkɛ, mbe 'ya nya kawəndə ŋelɛ. Berete ya va 'ya kezha zəzə ghena ganyɛ, ama berete shɛ kamene we.

¹⁹ Ganyɛa mehele nya ɗe 'ya kamene, kamene 'ya we. Ama 'yaghwa mehele nya ɗema 'ya ne, gheŋkɛ yamene 'ya.

²⁰ Ama kemenete wəsə nya ɗema ghəa ɗa 'ya ne, 'ya nde mene wəsəa shɛ we, ama jaɗafa nya mbe 'ya.

²¹ Wa nya wəsə nya ntsate 'ya nya: ma 'ya nya keɗe kamene ghena ganyɛ ne, deke wəsə kwa ndiremi yamene 'ya.

²² Kwa wənəa ɗa ne, kazlama 'ya te wəsə mahalegə,

²³ ama nahe 'ya kentsate kwete wəsə mahalegə nya kempa le nya ɗe mehele ta ɗa mbe nza ta ɗa. Kazhɛre ŋkɛ kamava ta wəsə mahalegəa jaɗafa nya mbe 'ya.

²⁴ Ndiremi ya te 'ya deŋwa! Wa nde tembele ɗa va geva nya ketsəkwə ɗa nya kalə sha mte wa?

²⁵ Hana 'ya sha Shala laka Yɛsə Kriste Nde sleke ɓəmə. Ma mbe mehele ta ɗa ne, wəsə mahalegəa Shala yamene 'ya. Ama dewə ŋelia ɗa ne, slene ta wəsə mahalegəa jaɗafa yamene 'ya.