Ka Rome 3 - Ghena ta Shala

¹ Tagha gɛ, tsema nza ka Zhəwif za ma ke kweci mbeli wa? Wa wəsə nya ve nda sla ta mɓɛta ke wəndə wa?

² Za ma ŋkɛ laka yayata hweŋkwa. Kaba ne, ke ka Zhəwif dapate nda ghena ta ŋkɛ Shala.

³ Ma keɗema kweci mbelia nci kese dɛŋe dɛŋe te Shala ne, kafɛake Shala ŋkɛ kenza megela laka hɛ na?

⁴ Ewə, nda mbeli kaɗepe Shala yanza kaganda ve, ama nahe pɛtɛa mbeli kenza kaka tseŋwə. Kwa nza ŋkɛ ma ke Ghena ta Shala: «Nda mbeli kaɗepe tiɗiɗi na te ghena nyi geze na, nza hərə ŋkwa kenza mbeli kave ŋa fete te ghwə.»

⁵ Ma kenza nde wəsə kwa ndiremi nya mene gheɓəmə nde ncɛ nza ta Shala tiɗiɗi ne, tsema tegeze gheɓəmə wa? Shala ɗema tiɗiɗi va nya 'yɛ ɓəmə ŋkɛ na? Kala wəndə ŋelɛ geze ghena 'ya teke.

⁶ Kenza tsagha we. Ma nda tsagha nde ne, tsema tenza Shala kameha ghwə te mbeli wa?

⁷ Ma kenza nde nahe tseŋwəa ɗa kencɛte kaganda ta Shala fate fate ba'a kevate zləvə te ne, tsema ve ɗa fete mbeli zhɛkwa kala nde jaɗafa wa?

⁸ Ma tsetse ŋkɛ ne, va wa ɗema gheɓəmə mene jaɗafa kezha nca geva ganyɛ shave mbe, kala geze ɓəmə kweci mbeli nyi kesla tseŋwə wa? Nahe ŋkɛ kehi kave nda geva fete ke mbelia shɛhɛ.

Wəndə shɛ tiɗiɗi we

⁹ Ama tsema wa? Nahe gheɓəmə ka Zhəwif kenza za ma ke kweci mbeli na? Tsagha we. Nahe 'ya kencɛte tsema tsema nza mbeli pɛtɛ, ka Zhəwif ba'a kweci hwelefefi mbe berete ta jaɗafa.

¹⁰ Ma ke Ghena ta Shala gezete: «Wəndə shɛ tiɗiɗi ya kwetɛŋe we,

¹¹ wəndə nya nza mehele ve shɛ we, wəndə nya kezele Shala shɛ we.

¹² Pɛtɛ hɛ kesamenji kwa hweŋkwa ganyɛ, kenza kebeze beze. Wəndə shɛ kamene ganyɛ we.

¹³ Hagarake ŋwələa nci kala kwele nya keghwene ghwene, nahe ghɛnia nci kenza kezha ghwete ŋkwa, ghwɛa mentsape ya kwa mɛ va hɛ.

¹⁴ Ghwɛnɛ ghwɛnɛ mɛa nci kezha bezla ŋkwa.

¹⁵ Wɛre wɛre seɗa ta nci kalə kezha pesle ŋkwa.

¹⁶ Beze ba'a ndiremi yave hɛ te yayata ŋkwa nya dzete hɛ.

¹⁷ Keɗepe hweŋkwa ta kwelɛŋe hɛ we.

¹⁸ Kahawe hɛ va Shala ya ci'a we.»

¹⁹ Nahe gheɓəmə keɗepe pɛtɛa wəshi nyi geze wəsə mahalegə, ke mbeli nyi sleke wəsə mahalegə geze nda geva ŋkɛ, yitea ɗema yayata wəndə kaghwene mɛ kezha ve ghəa ŋkɛ tiɗiɗi ba'a kezha nza mbeli kaka jaɗafa kwa kema ta Shala.

²⁰ Vatse ɗema yayata wəndə kanza tiɗiɗi kwa kema ta Shala va nya zelete wəsə mahalegə ŋkɛ. Kwa nza ŋkɛ ne, deke ɗepe jaɗafa yave nda wəsə mahalegə ke mbeli.

Nza tiɗiɗi nya kese mbe yɛ

²¹ Ama tsetsenya tse ne, nahe Shala kencɛte ɓəmə tsema tsema ve ɓəmə ŋkɛ tiɗiɗi kwa kema ta ŋkɛ, kenza laka wəsə mahalegəa Shala we. Nahe wəsə mahalegə ba'a ka mɛ ŋkwa ta Shala keneghate fete yite.

²² Nahe nza tiɗiɗi kwa kema ta Shala kenza laka nya yɛhwe Yɛsə Kriste. Kezha mbeli nyi keyɛte Yɛsə Kriste menete ŋkɛ kala nya, kwa nza ŋkɛ ghala kwelɛ hɛ we:

²³ nahe pɛtɛa mbeli kemenete jaɗafa ba'a kenza ndaŋe te zləvəa Shala.

²⁴ Ama mbe ganyɛa ŋkɛ ne, nahe Shala keveyi hɛ tiɗiɗi kwa kema ta ŋkɛ gəmə, laka Yɛsə Kriste nya kembele hɛ shave mbe jaɗafa.

²⁵ Shala nde veyi Yɛsə kezha yaɓe jaɗafa laka mimia ŋkɛ, laka yɛ ŋkɛ kezha ncɛ nza ta nza tiɗiɗi, laka nya ɗema keɗate mbeli tewəmbəreke jaɗafa nyi vəashi,

²⁶ te vəa zereghe ghena. Ama kancɛ nda tiɗiɗia ŋkɛ Shala ke mbeli nyi tsetsenya, yitea nza ŋkɛ tiɗiɗi ba'a yitea ve wəndə nya keyɛte Yɛsə tiɗiɗi.

²⁷ Hweŋkwa ya shɛ va gheɓəmə kezha kele ghə zhɛkwa na? Ewə, tsagha we. Tewəmbəreke wa? Va nya nza wəsə mahalegəa yɛ shɛ.

²⁸ Nahe gheɓəmə keɗepe laka yɛ nza ve wəndə Shala tiɗiɗi kwa kema ta ŋkɛ, kenza va nya hawe ŋkɛ va wəsə mahalegəa Shala we.

²⁹ Nahe Shala kenza deke kaŋa ka Zhəwif na? Ashɛ ŋa kweci hwelefefi ŋkɛ perə wəka? E'e, ŋa mbeli ŋkɛ pɛtɛ,

³⁰ va nya nza ŋkɛ Shala kwetɛŋe ya shɛ. Gheŋkɛ nde zhɛre mbeli nyi keslamte mɓɛta kambelia ŋkɛ laka yɛ ŋkɛ, tsagha shɛ nyi keslamtema mɓɛta perə.

³¹ Geze ta ŋkɛ ne, nahe yɛ ta ɓəmə kezhɛre wəsə mahalegə kawəsə nya ɗema zləvə te na? Ashɛ we. Ama nahe gheɓəmə kendeke nda zləvə nya kaganda.