Ka Rome 16 - Ghena ta Shala

Njiŋwe ŋkwa

¹ Wa nya 'ya kaghwene ŋayɛ Fɛbɛ, wəzha ta meyɛ ɓəmə nya kekemane ŋkwa mbe Jikə ta ka Kriste nya mbe Saŋkerɛ.

² Kemaneve mə ŋkɛ te sləa Nde sleke ŋkwa, kala nya mene mbelia Shala, kemane mə ŋkɛ mbe yayata və nya ɗe kamene ta ŋayɛ nde. Ghenta le ghəa nta nde se kakemane mbeli kwele kwele. Nahe nde kekemanakɛ ɗa perə.

³ Njiŋwakɛ mə Prisile ba'a Akilas nyi menete slene ta Shala n'yɛ le hɛ.

⁴ Mbasa mbasa hɛ kempə tewəmbəreke ya ɗa, deke 'ya nde tsa nda ŋ'wese ke hɛ we, ama pɛtɛa Jikə ta ka Kriste nyi hwa kweci hwelefefi katsa nda hana ke hɛ perə.

⁵ Njiŋwakɛ mə mbeli nyi ketsene geva ki ghɛa nci kasəkwə ghə. Njiŋwakɛ ɗa mə Ɛpayinɛte, mcɛ ɗa ganyɛ. Gheŋkɛ nde ghate kayɛte Kriste hwa ka Azi.

⁶ Njiŋwakɛ mə Mari nya kemenete slene kwele kwele kezha gheyɛ.

⁷ Njiŋwakɛ mə yɛ Andronikəs ba'a Zhəniyas ka menəhɛ ɗa, kwa daŋgayɛ se hɛ le 'ya perə. Kwele kwele hwəma hɛ mbeli hwa ka ghwene ta Yɛsə Kriste, mpelɛa hɛ nza kaka Kriste ke 'ya.

⁸ Njiŋwakɛ mə Ampliyatəs nya kamcɛ ɗa laka Nde sleke ŋkwa.

⁹ Njiŋwakɛ mə Ərbɛŋe nya kekemanakɛ n'yɛ le slene ta Kriste kamene, tsagha Stashis mcɛ ɗa ganyɛ.

¹⁰ Njiŋwakɛ mə Apɛle nya kencɛte yɛ ta ŋkɛ kezha Yɛsə. Njiŋwakɛ mə mbelia Aristobəle.

¹¹ Njiŋwakɛ mə menə ɗa Hɛrodiyon. Njiŋwakɛ mə mbelia Narsise nyi keyɛte Nde sleke ŋkwa.

¹² Njiŋwakɛ mə Trifɛne ba'a Trifoze nyi kehwepe ghə yitea slene ta Nde sleke ŋkwa. Njiŋwakɛ ɗa mə mcɛ ɗa Pɛrside, kwele kwele hwepete ghə nde yitea slene ta Nde sleke ŋkwa.

¹³ Njiŋwakɛ mə Rəfəs, wəndə nya ntave Shala, tsagha meghekɛ nya kenza kame ɗa perə.

¹⁴ Njiŋwakɛ mə Asinkrite, Flɛgon, Hɛrmɛs, Patrobas, Hɛrmas ba'a kweci ka kesaka ma nyi nza hɛ le hɛ.

¹⁵ Njiŋwakɛ mə yɛ Filologe le Zhəli, yɛ Nɛrɛ le wəzha ta meghekɛ, yɛ Olimpas le mbelia Shala nyi nza hɛ le hɛ pɛtɛ.

¹⁶ Njiŋwakɛ mə ghəa ŋayɛ le zlama kala ka mama. Pɛtɛa Jikə ta ka Kriste nyi teke kanjiŋwe ŋayɛ.

Ka keɗaŋe ta ncɛ ntsehwele ta Pol

¹⁷ Ka kesaka ma, təhwə təhwə ŋayɛ 'ya, ya mə ghəa ŋayɛ va mbeli nyi keve nehe geva kwelɛ ba'a nyi keza ka Kriste laka ɗema ghena nya tekeve yɛ. Slə ŋayɛ mə yitea mbeli nyi kala nyighɛ.

¹⁸ Kwa nza ŋkɛ ma mbeli nyi kemene kala nya ne, slene ta Nde sleke ɓəmə Yɛsə Kriste yamene hɛ we, ama deke hwəa nci yamene nda slene hɛ, kaghwete ka dewə ŋeli hɛ le ghena ta nci nyi zeɗe zeɗe ba'a keghwete ŋkwa.

¹⁹ Pɛtɛ mbeli keɗepe yɛ fete ta ŋayɛ ke Nde sleke ŋkwa. Zlama yazlama 'ya te gheyɛ. Ama kaɗe 'ya kasepa ghena ganyɛ yɛ le ntsehwele, kaɗema kajikə geva le wəsə kwa ndiremi.

²⁰ Ma Shala nya keve nda kwelɛŋe ke mbeli ne, gheŋkɛ nde təhə Satan mbe seɗa ta ŋayɛ. Pa zlaɓa ta Nde sleke ŋkwa Yɛsə nza le gheyɛ.

²¹ Kanjiŋwe ŋayɛ Timotɛ nya kekemane ɗa va slene, tsagha ka menəhɛ ɗa, Ləsiyəs, Zhazon ba'a Sosipatɛr.

²² 'Ya Tɛrtiyəs nde rafete palepa nya, kanjiŋwe ŋayɛ 'ya te sləa Nde sleke ŋkwa.

²³ Kanjiŋwe ŋayɛ Gayəs nya nza 'ya ki ghɛa ŋkɛ. Ki tsene geva ka Kriste pɛtɛ. Kanjiŋwe ŋayɛ Ɛraste, wəndə nya ketsene cɛdɛ nya mbe meleme, tsagha wəza meyɛ n'yɛ Kartəs.

²⁴ Pa zlaɓa ta Nde sleke ɓəmə Yɛsə Kriste nza le gheyɛ pɛtɛ. Amɛn.

Tsahe mə Shala tehwə ghweme

²⁵ Tsahe ɓəmə Shala. Berete yave gare kezha ntsə ŋayɛ laka Ghena kwatenca nya ganyɛ nya zlape 'ya. Ghena ta Yɛsə Kriste yazlape 'ya yipə yipə le ɗepe wəsə nya kemave gheɓəmə mbe zəzə nya tewəfərə ta Shala. Nahe zəzəa shɛ kenza tewəfərə se vəashi,

²⁶ ama tsetsenya ne, nahe zeweve ta ŋkɛ kencɛte nda geva ke kweci hwelefefi laka palepa nyi rafete ka mɛ ŋkwa, kala nya gezete Shala nya kaghala ghala, kezha yɛ ŋkɛ hɛ ba'a kezha fa nda ghena hɛ.

²⁷ Ŋa Shala nya kentsehwele ntsehwele kwetɛŋenyɛ nza zləvə, laka Yɛsə Kriste kaghala ghala! Amɛn.