Ka Rome 12 - Ghena ta Shala

Mpi mɛnɛfɛ mbe slene ta Shala

¹ Ka kesaka ma, va nya ncɛte ɓəmə ganyɛa ŋkɛ Shala ne, kantsə ŋayɛ berete 'ya kezha ve nda geva ba'a mpia ŋayɛ yɛ ke Shala, gheŋkɛ ya kamelɛ nya dzeghe nda yɛ ba'a nya zeɗehwe nda. Nya ya kasəkwə ghə ganyɛ nya hi yɛ kave nda.

² Zelema wəshi nyi mene mbeli nyi te hɛɗi nya nza nya gheɓəmə yɛ ma, ama sərəakɛ mə Shala kazhɛre nza ta ŋayɛ laka ve ŋayɛ mehele mɛnɛfɛ. Ma tsagha ne, kateɗepe ɗe ta ŋkɛ yɛ: wəsə nya ganyɛ, wəsə nya zeɗehwe nda ba'a wəsə nya kehi.

³ Tewəmbəreke zlaɓa ta ŋkɛ nya ndeke ɗa Shala geze nda 'ya ke yayata wəndəa pɛtɛ kezha ɗema ŋkɛ kave ghəa ŋkɛ kwele ma ke nya veyi Shala. Ama mehate ghwə yayata wəndə yipə yipə le bela yɛ nya ndeke nda Shala.

⁴ Kwa nza ŋkɛ kwele kwele bela nyi te geva ta ɓəmə, ama keghə keghə slene ta nci.

⁵ Tsagha shɛ ne, nahe gheɓəmə kenza kwele kwele perə, ama Yɛsə nde jikə ɓəmə kala geva ta wəndə nya kwetɛŋe. Jikə gheɓəmə pɛtɛ kwelɛ ghəa ɓəmə kala bela nyi te geva ta wəndə.

⁶ Keghə keghə wəshi Shala nyi kemave gheɓəmə, yipə yipə le zlaɓa ta ŋkɛ nya ndeke nda ŋkɛ ke yayata wəndə. Ma kenza nde nde mɛ ŋkwa kwete wəndəa ŋayɛ ne, geze ghena nya kese va Shala laka yɛ.

⁷ Ma kenza kwete wəndə kande mene slene ne, mene slene ŋkɛ. Ma kenza kwete wəndə kande teke nda wəshi ke mbeli ne, teke nda wəshi ŋkɛ ke mbeli.

⁸ Ma kenza kwete wəndə kande mtsehe nda berete ke mbeli ne, mtsehe nda berete ŋkɛ ke mbeli. Ma kenza kwete wəndə kande ɗa nda wəshi ke mbeli ne, ɗa nda wəshi ŋkɛ ke mbeli fate fate. Ma wəndə nya te ghə ne, nza ŋkɛ te ghə megela. Ma nya kekemane ka titikwəa kɛfi ne, kamene hɛ ŋkɛ le zlama.

⁹ Nda ɗe ŋkwa kanza le kaganda. Ɗema mə wəsə kwa ndiremi, ve nda mə ghə ke wəsə ganyɛ.

¹⁰ Ɗe mə ghəa ŋayɛ yɛ kala ka kesaka ma nyi keɗe ghə, hawe mə va ghəa ŋayɛ tsape.

¹¹ Menete mə slene ta Nde sleke ŋkwa le hwepe ghə, kaɗema le meɗə ba'a le wəndə kwetɛŋe.

¹² Zlama mə tewəmbəreke ve ghə ta ŋayɛ, səwə ghena mbe yaka, ntsə mə geva kasəkwə ghə.

¹³ Kemane mə mbelia Shala nyi ɗema wəsə va hɛ, kemaneve ɓəmə ka mentiɓəa sli bake bake dzeve.

¹⁴ Səkwə mə va Shala kezha wəpi mbeli nyi keghweze mɛ hwa gheyɛ ŋkɛ. Səkwə mə ŋkɛ kezha wəpi hɛ ŋkɛ, kaɗema kabezla hɛ.

¹⁵ Zlama mə le mbeli nyi kezlama, nehwene mə le mbeli nyi kenehwene.

¹⁶ Nza mə ketseɓa tseɓa kwelɛ ghəa ŋayɛ. Kelema ghəa ŋayɛ yɛ ma, ama kelete mə slene nyi ɓɛhwɛ kamene kala ŋwale. Mba yɛ kenewe ghəa ŋayɛ kambeli nyi keɗepe wəshi.

¹⁷ Mba yɛ kewa ghena nyi menete ŋayɛ mbeli, zelete mə hweŋkwa kemene ganyɛ kwa kema ta mbeli pɛtɛ.

¹⁸ Ma ya kapesle yɛ yite ne, nza mə kwelɛŋe le pɛtɛa mbeli.

¹⁹ Ka kesaka meyɛ ɗa nyi ɗe 'ya, wama dewa yɛ le ghəa ŋayɛ ma, ama sərəakɛ mə hwepe wənəa Shala kamene slene ta ŋkɛ, kwa nza ŋkɛ ma ke Mahwətə gezete: «'Ya nde tewa dewa, 'ya nde teŋki nda zhɛme ke yayata wəndə.»

²⁰ Ma ke zhɛkwa: «Ma kenza nde ghema ta ŋa shewə va ma ne, ɗave nda wəsə kezeme. Ma kenza ŋkɛ shewə va ndere ne, same nda yɛmə. Kwa nza ŋkɛ laka mene tsetse ne, katenza ŋkɛ kala wəsə nya tseneyi nda laɗe ta ghwə na kwa ghə.»

²¹ Pelema wəsə kwa ndiremi na kahərə ŋa ma, ama nza kande hərə wəsə kwa ndiremi laka wəsə ganyɛ.