Ka Lɛvi 19 - Ghena ta Shala

Tsema tsema ɗe Shala kamene nda slene mbeli

¹ Ma ke Mahwətə sha Moyize:

² «Ma pa na sha pɛtɛa ka Israyɛl: Nza mə kambeli nyi keveyi geva tekeleke, kwa nza ŋkɛ ma 'ya Shala Mahwətə ta ŋayɛ ne, nahe 'ya keveyi geva tekeleke.

³ Pa yayata wəndəa ŋayɛ hawe va yitenyɛ ba'a meghekɛ, pa yayata wəndə hawe va veci kezhɛne mpi. 'Ya ya kaMahwətə Shala ta ŋayɛ.

⁴ Zhɛre nda ma geva yɛ ke kweci shala ma. Vɛsəma yɛ shala yɛ le mze ma. 'Ya ya kaMahwətə Shala ta ŋayɛ.

⁵ Ma kenza yɛ kadzeghe melɛ kejikə ghə ke Mahwətə ne, mene mə kala nya kehi kezha kele ɗafa ŋkɛ.

⁶ Katezeme slia wəsə keseɗa shɛ mbeli te veci nya dzeghekɛ melɛ mbeli ba'a te hendɛ ta ŋkwa. Ama ketene nde kavatahebezle ne, katetere mbeli le ghwə.

⁷ Ma kezehwe wəndə te kwa mahekene ta hɛ ne, sli nya wale wale ŋkɛ. Tsagha gɛ, katekele ɗafa melɛa shɛ we.

⁸ Ma wəndə nya kezehwe te kwa mahekene ta hɛ ne, kwa ghəa ŋkɛ nza fete ta ŋkɛ, kwa nza ŋkɛ nahe ŋkɛ kezhɛrete wəsə nya keveyi nda geva tekeleke ke Mahwətə wale wale. Kateŋkamte geva wəndəa shɛ shave mbe hwelefe ta ŋkɛ.

⁹ Ma kenza yɛ kamene ha se te wəve ne, mba yɛ ketsa ha nyi dzeyi sleme ta wəve ba'a mba yɛ kezhɛne geva kase kezha vɛane zləkə.

¹⁰ Mba yɛ kezhɛne geva kadzembe wəvea rɛzɛŋe ŋayɛ kezha fə ghwedzekwea rɛzɛŋe nyi kezaghəyite geva keɗema ya ta rɛzɛŋe nyi kebetenji te hɛɗi. Katesərə nda hɛ yɛ ke ka titikwəa kɛfi ba'a ke ka se se. 'Ya ya kaMahwətə Shala ta ŋayɛ.

¹¹ Ghərəma yɛ ma, sla nda ma tseŋwə yɛ keɗema mene nda ma mbəɗəkwə yɛ ke menə ŋayɛ ma.

¹² Zemema fela tseŋwə yɛ te sləa ɗa ma. Ma kemenete yɛ tsagha ne, 'ya yakelemte zləvə yɛ te. 'Ya ya kaMahwətə Shala ta ŋayɛ.

¹³ Menema ghəa ŋa le nde ghedəkwəa ŋa ba'a ghərəma na yite ma. Keseyima zhɛme ta nde mene slene na kahendɛ ma.

¹⁴ Ŋelema mədəŋə na ma, vema tehene kwa hweŋkwa ta ghwələ ma. Ma tsagha ne, katencɛ hawe ta ŋa va 'ya na. 'Ya ya kaMahwətə Shala ta ŋa.

¹⁵ Mehama ghwə ɗafa yɛ ma: Mbake nda ma berete yɛ ke ka dewə ŋeli ma, kemanema mbeli nyi nza wəshi va hɛ yɛ ma, ama meha nda mə ghwə nya tiɗiɗi ke ka menəhɛ ŋayɛ.

¹⁶ Gezema ghena nyi kekele zləvə te ka menəhɛ ŋayɛ yɛ ma. Sla nda ma tseŋwə yɛ ke nde ghedəkwəa ŋayɛ kezha pesle ŋkɛ mbeli ma. 'Ya ya kaMahwətə.

¹⁷ Zlɛma yɛ va wəza meyɛ ŋayɛ ma, ama nzama ŋayɛ yɛ keŋele menə ŋayɛ ma. Ma tsagha ne, katemene jaɗafa yɛ tewəmbəreke gheŋkɛ we.

¹⁸ Wama ghena yɛ le ghena ba'a vema menə ŋayɛ yɛ te wənə ma. Pa yayata wəndəa ŋayɛ ɗe nde ghedəkwəa ŋkɛ kala ghəa ŋkɛ. 'Ya ya kaMahwətə.

¹⁹ Katehawe yɛ va wəshi mahalegə nyi: sərəma mama ta wəshi keseɗa bake yɛ kavale ma, tsawema mama felehwe ta wəshi yɛ bake mbe wəvea ŋayɛ ma, seɗema lekwesa nyi tsate mbeli le mama ta pawa bake yɛ ma.

²⁰ Ma keɓelahehwe ɓelahe wəndə le kwatera nya kameghwatenyɛa kwete wəndə, ama kaɗema nde kenaka kambeɗekɛ geva keɗema kapelakɛ geva waɗe ne, pa wəndəa shɛ ŋkikɛ wəsə te. Ama kampə mbeli nyi kemenete fete nyi mbeli, va nya nza nde mba kakwatera we.

²¹ Katekele game wəndəa shɛ kalə kadzemɛa cɛ lekwesa kebegeme geva kezha dzeghe nda melɛ kedimə ghə ke Mahwətə.

²² Ma laka game kedzeghe melɛ kedimə ghə ne, kateɓela gəsəkəa kelemte jaɗafa nde dzeghe Shala kənəa wəndəa shɛ kwa kema ta ɗa. Ma tsagha gɛ, katekelemte geva jaɗafa nya menete wəndəa shɛ te wənə.

²³ Ma vəa ŋkwa nya tedzete hɛɗia Kanan yɛ ba'a nya temɓete mama ta wəfe nyi keya yɛ ne, katenewe ya ta nci yɛ kawəshi nyi wale wale kava mahekene. Katezeme hɛ yɛ we.

²⁴ Ma pɛtɛa ya nyi teya hɛ mbe kwa wəfaɗe ta va ne, kateve ɗa hɛ yɛ tekeleke, 'ya Mahwətə hwa gəsəkəa tsa hana.

²⁵ Ma se te kwa mcɛfe ta va ne, katezeme ya ta nci yɛ. Ma tsagha ne, katemtsehe ya hɛ. 'Ya ya kaMahwətə Shala ta ŋayɛ.

²⁶ Zemema slia wəsə keseɗa yɛ te ŋkwa nya shekeyi geva mimia ŋkɛ ma. Menema ghwɛ yɛ ba'a ləma yɛ sha ka ŋa zlera ma.

²⁷ Tsehema shintia ghə yɛ taghele ghele ba'a ŋsəma balɛaha yɛ ma.

²⁸ Ma kemte wəndə va gheyɛ ne, perawema geva ta ŋayɛ yɛ ma. Perawema gwərəhi keɗema kalaŋgwə yɛ ma. 'Ya ya kaMahwətə.

²⁹ Kelemtema zləvə yɛ te ŋwalea kwɛa ŋayɛ laka pele hɛ kamene mefətekwə mbe ŋkwa nya keveyi geva tekeleke, yagha mbeli nyi te hɛɗi katemene mefətekwə ba'a wəshi keɗema kehi ma.

³⁰ Hawe mə va veci kezhɛne mpi ba'a ve mə zləvə te ŋkwa nya keveyi ɗa geva tekeleke. 'Ya ya kaMahwətə.

³¹ Dzawama weta yɛ ma, ləma yɛ sha ka gepe ŋkwa ma, kwa nza ŋkɛ ne, wale wale tezhɛre ŋayɛ hɛ. 'Ya ya kaMahwətə Shala ta ŋayɛ.

³² Katesate yɛ te ŋkwa kwa kema ta wəndə nya kentsə ntsə. Katehawe yɛ va ka meha mehɛɗi. Ma tsagha ne, katencɛ hawe ta ŋayɛ yɛ va Shala ta ŋayɛ. 'Ya ya kaMahwətə.

³³ Ma vəa ŋkwa nya tese nde se se kanza te hɛɗia ŋayɛ ne, menema ghəa ŋayɛ yɛ le ma.

³⁴ Ama mene nda mə ke nde se sea shɛ kala menə ŋayɛ. Ɗe mə ŋkɛ kala ghəa ŋayɛ. Kwa nza ŋkɛ ma gheyɛ ne, kaka se se se yɛ kwa Ɛzhipte. 'Ya ya kaMahwətə Shala ta ŋayɛ.

³⁵ Menema mbəɗəkwə yɛ mbe meha ghwə, dzeghe biya ta wəshi, dzeghe ɗaŋeɗa ta wəshi ba'a dzeghe ta wəsə kwa yɛmə yɛmə ma.

³⁶ Mene mə slene le kiləwə nyi tiɗiɗi, wəshi kedzeghe biya ta wəsə nyi tiɗiɗi, agweda nyi tiɗiɗi ba'a wəshi kedzeghe wəshi kwa yɛmə yɛmə nyi tiɗiɗi. 'Ya ya kaMahwətə Shala ta ŋayɛ nya kefəakame ŋayɛ same kwa Ɛzhipte.

³⁷ Ya mə wəshi mahalegəa ɗa ba'a wəshi nyi gezete 'ya megela. Mene mə slene le hɛ. 'Ya ya kaMahwətə.»