Ka Lɛvi 13 - Ghena ta Shala

Zereghwe nyi te hweta ta geva ta wəndə ŋelɛ

¹ Ma ke Mahwətə sha yɛ Moyize le Aron:

² «Ma keshavenyɛ wəsə kwəzləvə te hweta, kesleslate geva lame lame keɗema kencake geva kweci wəshi zlayɛ zlayɛ te hweta ta geva ta wəndə ba'a kezhɛrenyɛ wəsəa shɛ kala derena ne, pa mbeli keleke nda wəndəa shɛ ke nde dzeghe Shala Aron keɗema ke kwete hwa ŋwalea ŋkɛ.

³ Pa nde dzeghe Shala neweve ŋkwa nya nza wəsəa shɛ te. Ma kezhɛrenji shinti nyi te ŋkwa shɛ ketɛawetɛa tɛawetɛanji ba'a kenza ghɛa dzate te ŋkwa shɛ ne, derena ŋkɛ tsagha. Ma kwa sebe ta nya newemte ŋkɛ nde dzeghe Shala ne, wərə ŋkɛ kagezete kande wale wale wəndəa shɛ.

⁴ Ma nda kweci wəshi nyi zlayɛ zlayɛ ba'a dawe dawe ya te, kaɗema ghɛa dzate te hweta, ya shinti nyi tɛawetɛa tɛawetɛa ne, pa nde dzeghe Shala veyi wəndəa shɛ te ŋa ŋkɛ ŋkwa kashikwə kwetɛŋe.

⁵ Ma te kwa mberefaŋe ta hɛ ne, pa zhɛne kaneweve: ma kenakɛ ŋkɛ kaɗema ŋkwa shɛ kezhɛrete pa ba'a kemtsehete bezle ne, pa veyi wəndəa shɛ te ŋa ŋkɛ ŋkwa kashikwə kwetɛŋe zhɛkwa.

⁶ Ma kwa sebe ta shikwə nyagha ne, pa nde dzeghe Shala neweve ŋkɛ zhɛkwa: ma kemtsehetema geva ɓayɛ ɓayɛ ta ŋkɛ ba'a bezlea ŋkɛ ne, pa nde dzeghe Shala gezete kawəndə nya wɛŋe wəndəa shɛ. Lame lame ŋkɛ tsagha. Deke lekwesa ta ŋkɛ yanza wəndəa shɛ katsewemte kezha nza wɛŋe.

⁷ Ama kemtsehete geva lame lamea shɛ kwa sebe ta nya neweve nde dzeghe Shala ba'a nya gezete ŋkɛ kawəndə nya wɛŋe ne, pa zhɛneghe geva kalə sha nde dzeghe Shala.

⁸ Pa nde dzeghe Shala neweve ŋkɛ zhɛkwa: ma kenakɛ ŋkɛ nahe lame lamea shɛ kemtsehete geva te hweta ta geva ne, pa gezete kawəndə nya wale wale wəndəa shɛ. Kwete nyagha mama ta derena.

⁹ Ma kekeseve wəndə mama ta derena ne, pa mbeli keleghe nda ŋkɛ ke nde dzeghe Shala.

¹⁰ Pa nde dzeghe Shala neweve ŋkɛ: ma kenza wəsə kwəzləvə kakwa tɛawetɛa te hweta, le shinti nyi tɛawetɛa tɛawetɛa ba'a slia geva te ŋwela ne,

¹¹ derena nya ketemənyɛ ŋkɛ tsagha. Pa nde dzeghe Shala gezete kawəndə nya wale wale wəndəa shɛ. Kaleɓe ghə ŋkɛ kave ŋkɛ te ŋa ŋkwa we, kwa nza ŋkɛ ne, darahwe nza ŋkɛ kande wale wale.

¹² Ama kenakɛ nde dzeghe Shala bətə geva ta wəndə mbe zhi, ghala slə nde kwa ghə hwa'a kwake te yɛ seɗa ne,

¹³ pa neweve ŋkɛ megela: ma kenza geva ta ŋkɛ bətə mbe zhia shɛhɛ ne, pa gezete kawəndə nya wɛŋe wəndəa shɛ. Wɛŋe wəndəa shɛ, va nya zhɛrenyɛ geva ta ŋkɛ pɛtɛ kakwa tɛawetɛa.

¹⁴ Ama te veci nya nakɛ slia geva ta ŋkɛ mbeli te ŋwela ne, kawəndə nya wale wale zhɛre wəndəa shɛ.

¹⁵ Pa nde dzeghe Shala neweve ŋkwa nya nza sli te ŋwela te ba'a gezete kande wale wale wəndəa shɛ. Wale wale sli nya te ŋwela, kwete nyagha mama ta derena.

¹⁶ Ma kezhɛrenyɛ ŋkwa nya nza sli te ŋwela te kakwa tɛawetɛa zhɛkwa ne, pa wəndəa shɛ zhɛneghe geva kalə sha nde dzeghe Shala.

¹⁷ Pa nde dzeghe Shala neweve ŋkɛ: ma kezhɛrenyɛ zhia shɛ kakwa tɛawetɛa zhɛkwa ne, pa gezete kaɗema zhia shɛ kazhɛre ŋkwa wale wale. Wəndə nya wɛŋe wəndəa shɛ.

¹⁸ Ma kenza zhi kwa shave nya kempi mpi te wəndə,

¹⁹ ma keshavenyɛ zhi kwəzləvə kakwa tɛawetɛa keɗema zlayɛ nya keɓayɛ ɓayɛ kakwa gheme te ŋkwa zhia shɛ ne, pa wəndəa shɛ lə sha nde dzeghe Shala.

²⁰ Pa nde dzeghe Shala neweve ŋkwa nya nza zhi te: ma kemenete deɓafeŋə zlayɛa shɛ te hweta ba'a kezhɛrenji shinti ketɛawetɛa tɛawetɛanji ne, pa nde dzeghe Shala gezete kawəndə nya wale wale wəndəa shɛ. Mama ta derena nya kemene geva te mevɛvi ŋkɛ.

²¹ Ama kenakɛ nde dzeghe Shala kaɗema shinti nyi tɛawetɛa tɛawetɛa te zlayɛa shɛ, kaɗema deɓafeŋə te hweta ba'a ɓayɛ ɓayɛ te ne, pa veyi wəndəa shɛ te ŋa ŋkɛ ŋkwa kashikwə zake.

²² Ma kemtsehete geva bezlea zlayɛa shɛ te hweta ne, pa nde dzeghe Shala gezete kawəndə nya wale wale wəndəa shɛ. Kwete nyagha mama ta derena.

²³ Ama keɗema zlayɛa shɛ kezhɛrete pa ba'a kemtsehete bezle ne, deke mevɛvia zhi nya keshave ŋkɛ. Tagha gɛ, pa nde dzeghe Shala gezete kawəndə nya wɛŋe wəndəa shɛ.

²⁴ Ma kendəhwe wəndə ghwə nda nzanyɛ mevɛvi nya keɓayɛ ɓayɛ kakwa tɛawetɛa keɗema kakwa gheme te ŋkwa shɛ ne,

²⁵ pa nde dzeghe Shala neweve ŋkwa shɛ: ma kezhɛrenji shinti ketɛawetɛa tɛawetɛanji te ba'a kenza deɓafeŋə te hweta ne, kwete mama ta derena nde mene geva te mevɛvia ghwə ŋkɛ. Ma tsagha gɛ, pa nde dzeghe Shala gezete kawəndə nya wale wale wəndəa shɛ.

²⁶ Ama vəa ŋkwa nya neweve ŋkɛ nde dzeghe Shala, kaɗema shinti nyi tɛawetɛa tɛawetɛa te zlayɛa shɛ, kaɗema deɓafeŋə te hweta ba'a kaɗema ŋkwa shɛ kaɓayɛ ɓayɛ ne, pa veyi wəndəa shɛ te ŋa ŋkɛ ŋkwa kashikwə zake.

²⁷ Ma te kwa mberefaŋe ta hɛ ne, pa nde dzeghe Shala neweve ŋkɛ: ma kemtsehete geva zlayɛa shɛ te hweta ta ŋkɛ ne, pa gezete kawəndə nya wale wale wəndəa shɛ. Kwete ŋkɛ mama ta derena.

²⁸ Ama keɗema zlayɛa shɛ kezhɛrete pa, kemtsehete bezle ba'a kaɗema kaɓayɛ ɓayɛ ne, deke zhi nya keshave te mevɛvia ghwə ŋkɛ. Pa nde dzeghe Shala gezete kawəndə nya wɛŋe wəndəa shɛ, va nya nza ŋkɛ kamevɛvia ghwə.

²⁹ Ma kemenenyɛ wəsə zlayɛ mbe ghə keɗema yitea cakame ta za keɗema male ne,

³⁰ pa nde dzeghe Shala neweve ŋkwa nya nza wəsəa shɛ te: ma kenza ŋkwa deɓafeŋə te hweta ba'a kenza shinti nyi te keghemea ghemeanji ba'a wɛare wɛarɛaŋe ne, pa nde dzeghe Shala gezete kawəndə nya wale wale wəndəa shɛ. Zereghwe nya keŋsə shinti ŋkɛ, geze ta ŋkɛ, derena ta ghə keɗema ŋa cakame.

³¹ Ama vəa ŋkwa nya neweve nde dzeghe Shala kaɗema ŋkwa deɓafeŋə te hweta ba'a kaɗema shinti nyi te ɗɛke ɗɛke ne, pa veyi wəndəa shɛ te ŋa ŋkɛ ŋkwa kashikwə zake.

³² Ma kenza ŋkɛ te kwa mberefaŋe ta hɛ, pa nde dzeghe Shala zhɛne neweve ŋkwa shɛ zhɛkwa: ma keɗema ŋkwa shɛ kemtsehete bezle, keɗema shinti nyi te keghemea ghemeanji, keɗema deɓafeŋə te hweta ne,

³³ pa wəndəa shɛ ŋsəmte ghə keɗema ghwɛmɛ, ama mba ŋkɛ keŋsə ŋkwa nya nza zlayɛ te. Kwa sebe ta ŋkɛ, pa nde dzeghe Shala veyi ŋkɛ te ŋa ŋkɛ ŋkwa kashikwə zake zhɛkwa.

³⁴ Ma te kwa mberefaŋe ta hɛ ne, pa neweve ŋkwa shɛ zhɛkwa: ma keɗema zlayɛa shɛ kemtsehete bezle ba'a keɗema deɓafeŋə te hweta ne, pa nde dzeghe Shala gezete kawəndə nya wɛŋe wəndəa shɛ. Deke lekwesa ta ŋkɛ yatsewe ŋkɛ kezha nza wɛŋe.

³⁵ Ama kemtsehete bezle zereghwea shɛ kwa sebe ta nya gezete nde dzeghe Shala kawəndə nya wɛŋe wəndəa shɛ ne,

³⁶ pa nde dzeghe Shala neweve ŋkɛ zhɛkwa: ma kemtsehete bezle zlayɛa shɛ te hweta ne, kazeleke ghena ta shinti nyi gheme gheme nde dzeghe Shala we, kwa nza ŋkɛ ne, darahwe nza ŋkɛ wale wale.

³⁷ Ama keɗema zlayɛa shɛ kezhɛreke pa ba'a kepesenji shinti nyi ɗɛkeɗɛa ɗɛkeɗɛa te ne, nahe zereghwea shɛ kekiɗinyɛ ba'a wɛŋe wəndəa shɛ. Tagha gɛ, pa nde dzeghe Shala gezete ŋkɛ kawəndə nya wɛŋe.

³⁸ Ma kenakɛ ŋkwa nyi zlayɛ zlayɛ ba'a nyi tɛawetɛa tɛawetɛa za keɗema male te geva ta ŋkɛ ne,

³⁹ pa nde dzeghe Shala neweve ŋkɛ: ma kenza zlayɛ zlayɛ nyi te geva ta nci ketɛawetɛa tɛawetɛanji ne, zhi nyi keshave mbe geva hɛ. Wəndə nya wɛŋe wəndəa shɛ.

⁴⁰ Ma kebetenji shinti mbe ghə va wəndə ne, nde dəhwə dəhwəa ghə ŋkɛ: wəndə nya wɛŋe ŋkɛ.

⁴¹ Ma kebetenji shinti mɛa kema ve ne, nde dəhwə dəhwəa ŋkwa nya mɛa kema ŋkɛ: wəndə nya wɛŋe wəndəa shɛ perə.

⁴² Ama nda te ŋkwa nya betenji shinti kwa dapana ta ghə keɗema mɛa kema ncake geva zlayɛ nya kakwa gheme ne, kwete mama ta derena nde mene geva.

⁴³ Pa nde dzeghe Shala neweve ŋkwa shɛ: ma nda keghemea ghemeanji zlayɛ nyi kwa dapana ta ghə keɗema nyi mɛa kema shɛhɛ, kala nza ta derena ne,

⁴⁴ nde derena wəndəa shɛ ba'a wəndə nya wale wale ŋkɛ. Pa nde dzeghe Shala gezete kawəndə nya wale wale wəndəa shɛ, kwete nyagha mama ta derena nya kekese ŋkwa mbe ghə.

⁴⁵ Nda wəndə nya shewə va derena kaseɗe lekwesa nyi keŋkwahe ŋkwahe, mba ŋkɛ keslaɗe ghə, pa hwepeyi wəsə sawa mbe ghweleme ta ŋkɛ. Ma ke sha tezlape: ‹Wəndə nya wale wale 'ya! Wəndə nya wale wale 'ya!›

⁴⁶ Kande wale wale nza ŋkɛ kala temə ta zereghwea shɛ te. Vatse hi ŋkwa kenza ta ŋkɛ kanza te ŋa ŋkɛ ŋkwa, pelɛke te wəmbəa ghedəkwə.

Pə nyi dzate te yɛ lekwesa

⁴⁷ Ma kencake geva pə te lekwesa nyi tsate mbeli le shintia təmə keɗema le pawa,

⁴⁸ te zlave keɗema te shiŋelɛti nyi tsate mbeli le shintia təmə keɗema le pawa, te hweta keɗema te wəshi nyi menete mbeli le hweta,

⁴⁹ nda nza pəa shɛhɛ kakwa nɛ nɛ keɗema kakwa gheme te lekwesa keɗema te hweta, te zlave keɗema te shiŋelɛti, keɗema te wəshi nyi menete mbeli le hweta ne, kwete ŋkɛ mama ta derena. Pa mbeli ncɛte nda ke nde dzeghe Shala.

⁵⁰ Pa nde dzeghe Shala neweve pəa shɛ ba'a veyi wəsəa shɛ te ŋa ŋkɛ ŋkwa kashikwə zake.

⁵¹ Ma te kwa mberefaŋe ta hɛ ne, pa neweve zhɛkwa: ma nda nahe pəa shɛ kemtsehete bezle te wəsəa shɛ ne, pə nya keɗema kaslə te wəsə ŋkɛ. Wəsə nya wale wale wəsəa shɛ.

⁵² Tagha gɛ, pa nde dzeghe Shala teremte lekwesa, zlave, shiŋelɛti nyi le shintia təmə keɗema le pawa shɛhɛ, keɗema yayata wəsə nya le hweta nya nza pəa shɛ te. Ma kwa ɗema pəa shɛ kaslə te ne, pa mbeli teremte wəsə shɛ le ghwə.

⁵³ Ama vəa ŋkwa nya neweve nde dzeghe Shala, kaɗema pəa shɛ kemtsehete geva te wəsəa shɛ ne,

⁵⁴ pa geze nda ke mbeli kezha tsewemte wəsəa shɛ mbeli, kwa sebe ta ŋkɛ, pa veyi te ŋa ŋkɛ ŋkwa kashikwə zake zhɛkwa.

⁵⁵ Katezhɛne nde dzeghe Shala kanewe pəa shɛ kwa sebe ta nya tsewemte geva nde: ma keɗema pəa shɛ kezhɛreke pa ya gheŋkɛ ɗema kembakete bezle ne, wəsə nya wale wale wəsəa shɛ. Katetere geva ŋkɛ le ghwə ya gheŋkɛ pəmte geva mbe hwə keɗema te wəmbə.

⁵⁶ Ama vəa ŋkwa nya neweve nde dzeghe Shala nahe pəa shɛ kekiɗiakɛ geva kwa sebe ta nya tsewemte geva nde ne, pa slamte ŋkwa nya nza pə te te lekwesa keɗema te hweta, te zlave keɗema te shiŋelɛti.

⁵⁷ Ama kezhɛne pəa shɛ kancake geva te lekwesa, zlave, shiŋelɛti keɗema te yayata wəsə nya le hweta ne, pə nya kezhɛne kamene geva ŋkɛ. Tagha gɛ, katetere geva wəsəa shɛ.

⁵⁸ Ma ketsewemte geva wəsə nya nza pə te, lekwesa, zlave, shiŋelɛti keɗema yayata wəsə nya le hweta, nda kiɗinyɛ pəa shɛ ne, pa mbeli zhɛne katsewemte kezha nza ŋkɛ wɛŋe.»

⁵⁹ Nyi ya kaghena nyi kegezete geva te ghəa pə nyi kencake geva te lekwesa nyi tsate mbeli le shinti təmə keɗema le pawa, te zlave keɗema te shiŋelɛti, keɗema te yayata wəsə nya le hweta. Ghena nyi ka pele nda hweŋkwa ke mbeli kageze kenza nde wɛŋe keɗema wale wale wəsə nya nza pə te.