Ka Kolose 3 - Ghena ta Shala

¹ Nahe yɛ kesame kwa kwele le mpi le Kriste. Ma kala nya ŋkɛ, zele mə wəshi nyi pelɛ ghweme, pelɛ ŋkwa nya nza Kriste mentishɛ laka bela kwa zeme ta Shala.

² Veyi mə zəzə ta ŋayɛ te wəshi nyi pelɛ ghweme, kaɗema te wəshi nyi te hɛɗi.

³ Kwa nza ŋkɛ nahe yɛ kempə ŋayɛ, nahe mpia ŋayɛ kentikəakɛ geva le Kriste mbe Shala.

⁴ Ma mpia ŋayɛ nya ganyɛ ne, gheŋkɛ Kriste, ma vəa ŋkwa nya tenca ŋkɛ ne, katenca yɛ zlaɓe le, katenza yɛ mbe zləvəa ŋkɛ.

Meha nza ba'a mɛnɛfɛa nza

⁵ Peslekɛ mə ghwə te ghena ta wəshi nyi te hɛɗi mbe geva ta ŋayɛ: mefətekwə, nza wale wale, vale tahe, mawe wəshi nyi ndiremi ndiremi, dzeghwama ntsə, kwa nza ŋkɛ ma dzeghwama ntsə ne, gheŋkɛ ya kahawe va kwete shala.

⁶ Wəshi nyi kala nyi ka ve wənəa Shala kənəa mbeli nyi keɗema kayɛ nda fete.

⁷ Wa nya tsetse se nza ta ŋayɛ vəashi, kwa nza yɛ mbe jaɗafa nya kesleke ŋayɛ.

⁸ Ama tsetsenya gɛ, betakɛ mə pɛtɛa wəshi nyi: hwepe wənə, beze ta wənə, 'yaghwa mehele. Yagha ŋele ŋkwa keɗema ghena kwa ndiremi kasame kwa mɛa ŋayɛ.

⁹ Mba yɛ kesla tseŋwə kwelɛ ghəa ŋayɛ, va nya sərəakɛ meha nza nya vəashi yɛ le wəshi nyi mene ŋkɛ.

¹⁰ Nahe yɛ keseɗaghe mɛnɛfɛa nza, gheŋkɛ nde zhɛre ŋayɛ kajive kajive kambeli nyi yipə yipə le Shala nya kepate ɓəmə, yitea ɗepete Shala yɛ fate fate.

¹¹ Ma tsagha gɛ ne, nde Grɛk keɗema nde Zhəwif shɛ we, nde slamte mɓɛta keɗema nde slamtema mɓɛta shɛ we, nde ntsehwelema keɗema ɓaŋara shɛ we, mava keɗema mamza shɛ we. Ama nahe Kriste kenza kapɛtɛa wəshi ba'a mbe pɛtɛa wəshi.

¹² Hwa mbelia Shala yɛ, Shala nde ɗehwe ŋayɛ, gheŋkɛ nde tsehave ŋayɛ kezha nza yɛ kaŋa ŋkɛ. Vatse gɛ, seɗaghe mə ndeɗea mehele, ganyɛa mehele, shifə ghə, gwedə ba'a zereghe ghena kənəa geva.

¹³ Zereghe mə ghena kwelɛ ghəa ŋayɛ ba'a kelemte mə ghəa ŋayɛ te wənə kenza ghena va kwete wəndəa ŋayɛ kaŋele kwete. Nahe Nde sleke ŋkwa kekelemte ŋayɛ te wənə, mene mə tsagha perə.

¹⁴ Ya tsagha ŋkɛ ne, seɗaghe mə ɗe, gheŋkɛ nde nza kaveyi nza ta ŋayɛ jikə fate fate.

¹⁵ Pelave nda mə hweŋkwa ke kwelɛŋea Kriste kasleke wənəa ŋayɛ, kezha kwelɛŋe nya kala nya hekakɛ ŋayɛ Shala kezha nza yɛ kageva kwetɛŋe. Nza mə kambeli nyi ketsa nda ŋ'wese ke Shala yitea yayata wəsə.

¹⁶ Pa ghena ta Kriste laka mcɛləa ŋkɛ nza mbe gheyɛ. Ncɛ nda mə ntsehwele ke ghəa ŋayɛ, ncɛ nda mə ghena ke ghəa ŋayɛ le ntsehwele fate fate. Gha nda mə cimə ke Shala le wənə kwetɛŋe, ŋ'wese, cimə ketsahe Shala ba'a cimə nyi kese va Sefəa Shala.

¹⁷ Yayata wəsə nya mene yɛ ba'a nya geze yɛ ne, mene mə te sləa Nde sleke ŋkwa Yɛsə, laka tsa nda ŋ'wese ke Shala Yita laka gheŋkɛ.

Nza ta mbeli nyi ki ghɛ

¹⁸ Mi, fa nda mə ghena ke zhilia ŋayɛ kala nya hi ŋkɛ kwa kema ta Nde sleke ŋkwa.

¹⁹ Zhili, ɗe mə mia ŋayɛ, mba yɛ kehwepe nda wənə ke hɛ.

²⁰ Ŋwale, fa nda mə ghena ke mbeli nyi keyake ŋayɛ, gheŋkɛ ya kaslene nya neghe Nde sleke ŋkwa va gheyɛ.

²¹ Mbeli nyi keyake ŋwale, mbeɗe nda ma ntsə yɛ ke ŋwalea ŋayɛ, yagha mehele ta nci kataze ma.

²² Gheyɛ ka mavashi, yɛ nda mə fete ke mbeli nyi kesleke ŋayɛ kwake te hɛɗi. Mba yɛ kentsə geva yitea slene vəa ŋkwa nya nza hɛ tagha kaya ŋayɛ kezha nza ghəa nci gwəfə. Ama fa nda mə ghena ke hɛ le wənə kwetɛŋe va nya nza yɛ kahawe va Nde sleke ŋkwa.

²³ Ma yayata wəsə nya mene yɛ ne, mene mə le wənə kwetɛŋe, kala wəsə nya nza yɛ kamene nda ke Nde sleke ŋkwa, kaɗema kezha mbeli.

²⁴ Nahe yɛ keɗepe katekemave wəsə yɛ va Nde sleke ŋkwa, katekemave ŋa ŋayɛ yɛ wəsə kezeme ghɛ nya meɗeyi ŋayɛ ŋkɛ. Nde sleke ŋkwa yamene nda slene yɛ, gheŋkɛ Kriste.

²⁵ Ma wəndə nya kemene wəsə kwa ndiremi ne, kala wəsə kwa ndiremia shɛ teŋki nda zhɛme Shala, kanta ghala Shala we.