Ka Galate 6 - Ghena ta Shala

Kemane ghə va wəshi nyi ɗaŋeɗa ɗaŋeɗa

¹ Ka kesaka ma, ma kemenete jaɗafa wəndə ne, kemanakɛ mə ŋkɛ kase kadzawa hweŋkwa nya tiɗiɗi, gheyɛ nyi nza Sefəa Shala mbe gheyɛ. Ama nza mə kagwedə laka gheŋkɛ. Ama ya mə ghəa ŋayɛ yagha wəndəa ŋayɛ teteɗe perə.

² Kemane mə ghəa ŋayɛ kakele wəshi nyi ɗaŋeɗa ɗaŋeɗa, tsagha ne, wəsə mahalegəa Kriste yatseramete yɛ.

³ Kwa nza ŋkɛ ma keveyi ghəa ŋkɛ wəndə kawəndə kwele, ndagwara wəsəa kwadanyɛa wəndə ŋkɛ ne, ghəa ŋkɛ yaghwete ŋkɛ.

⁴ Ama nda wəndə kamareve ghəa ŋkɛ tiɗiɗi kenza nde megela slene ta ŋkɛ, kakemave kwele ŋkɛ kezha ghəa ŋkɛ nahe, kaɗema kezha kwete wəndə.

⁵ Kwa nza ŋkɛ yayata wəndə katekele wəsə nya ɗaŋeɗa ta ŋkɛ.

⁶ Ma wəndə nya keteke nda Ghena kwatenca nya ganyɛ ke kwete wəndə ne, pa wəndə nya tekete nda nyagha mbeli ɗave nda wəsə ke nya keteke nda shɛ kezha kemane ŋkɛ.

⁷ Mba ghəa ŋayɛ kenza bake bake, ma ke kwete ghena: Kaŋ'wəshi Shala mbeli we. Wəsə nya tsawete wəndə yatemene ŋkɛ se te wəve.

⁸ Ma kenza ŋkɛ wəsə nya ɗe geva yatsawete wəndə ne, gheŋkɛa shɛ yatemene ŋkɛ se te wəve, gheŋkɛ mte. Ma wəndə nya ketsawete wəsə nya ɗe Sefəa Shala ne, gheŋkɛa shɛ yatemene ŋkɛ se te wəve, mpi nya kaghala ghala.

⁹ Leɓema gheɓəmə va mene ganyɛ ma, kwa nza ŋkɛ ma keɗema gheɓəmə kewənə ɓəmə ne, katekemave meleɓe ta ɓəmə gheɓəmə te vəa ŋkɛ.

¹⁰ Ma kala nya nza hweŋkwa shɛ tsetsenya kezha mene ganyɛ ne, mene nda ɓəmə ganyɛ ke yayata wəndə, halama ka kesaka meyɛ ɓəmə mbe yɛ.

Ka keɗaŋe ta ghena ba'a njiŋwe ŋkwa

¹¹ Newema mə rafe nyi jama jama shɛhɛ, 'ya nde rafe ŋayɛ palepa le dzeve ta ɗa.

¹² Ma mbeli nyi keŋka ŋayɛ nyi kasla mɓɛta ne, ɗe ta geva yaɗe hɛ kamene, ghəa nci yakele hɛ gəmə. Kaɗe hɛ kasa nda yaka mbeli te mte ta Kriste te sheghwə ke hɛ we.

¹³ Ya mbeli nyi keslamte mɓɛta shɛhɛ ne, kezelete ghena ta wəsə mahalegə hɛ we, ama kaɗe hɛ kaslamte mɓɛta yɛ kezha fege hɛ le gheyɛ gəmə.

¹⁴ Ma 'ya kwa ŋa ɗa ne, kaɗe 'ya kafege keɗema le baŋe ta Nde sleke ɓəmə te sheghwə kwa zleŋkwa Yɛsə Kriste we. Kwa nza ŋkɛ laka baŋe ta Yɛsə te sheghwə kwa zleŋkwa ne, kempə mpə wəshi nyi te hɛɗi lema sha 'ya. Ma 'ya ɓiyitsa ne, kemte mte 'ya sha wəshi nyi te hɛɗi lema.

¹⁵ Nahe slamte mɓɛta keɗema slamtema mɓɛta kenza gəmə. Ma ghena nya wəba ne, zhɛrete geva kawəndə mɛnɛfɛ.

¹⁶ Ke yayata wəndə nya kehawe va wəsə nya tekete nda 'ya ne, ma ghena nya geze nda 'ya: Pa kwelɛŋe, ndeɗea mehelea Shala nza kənəa hɛ, tsagha kənəa pɛtɛa mbelia Shala.

¹⁷ Yagha kwete wəndə kateghweze mɛ hwa 'ya te kwete hɛ. Kwa nza ŋkɛ mevɛvi nya te 'ya nde ncɛ kaŋa Yɛsə 'ya.

¹⁸ Pa zlaɓa ta Nde sleke ɓəmə Yɛsə Kriste nza le gheyɛ pɛtɛ ka kesaka ma. Amɛn.