Ka Galate 5 - Ghena ta Shala

Zamtema nza waɗe ta ŋayɛ yɛ ma

¹ Nahe Kriste kendeke ɓəmə nza waɗe kezha nza mə kaka mamzashi kaganda kaganda. Nza mə tiɗiɗi mbe mamza ta ŋayɛ yagha yɛ kazhɛne kazhɛrete ghəa ŋayɛ kaka mavashi zhɛkwa, ya mə ghəa ŋayɛ ndeɗekə.

² Fatema mə! Ma 'ya Pol ne, ma 'ya sha gheyɛ: ma keslamte mɓɛta yɛ ne, mba Kriste kaketekɛ ŋayɛ we.

³ Wa nya 'ya nya kageze zhɛkwa: ma yayata wəndə nya keslamte mɓɛta ne, nda ŋkɛ kazele wəsə mahalegə tserame.

⁴ Ma gheyɛ mbeli nyi keɗe kanza tiɗiɗi kwa kema ta Shala laka wəsə mahalegə ne, nahe yɛ kenehemte geva le Kriste, nahe yɛ kenza ndaŋe te zlaɓa ta Shala.

⁵ Ma ghen'yɛ ne, nahe n'yɛ kevate ghə te Shala nya keteve n'yɛ tiɗiɗi laka Sefəa ŋkɛ laka yɛ ta n'yɛ.

⁶ Kwa nza ŋkɛ ma sha wəndə jikə le Yɛsə Kriste ne, nahe slamte mɓɛta keɗema slamtema mɓɛta kenza gəmə. Ma wəsə nya kwele ne, yɛ nde mene slene laka ɗe.

⁷ Nahe gheyɛ kese kahwɛ ndeɗekə. Wa nde fɛake ŋayɛ hweŋkwa wa? Wa nde fɛa ŋayɛ keyɛ kaganda wa?

⁸ Ma ghwete nya ghwete ŋayɛ nya mbeli ne, va Shala nya keheka ŋayɛ se ŋkɛ we.

⁹ Tenjɛne ɓɛhwɛ nde mesle mbazli.

¹⁰ Ma tewəmbəreke Nde sleke ŋkwa ne, kagezleŋe ghə 'ya va gheyɛ we, nahe 'ya keɗepe kazhɛne yɛ kazele kweci ghena we. Ama yayata wəndə nya keghwetete ŋayɛ ne, katesa yaka ŋkɛ va Shala.

¹¹ Ka kesaka ma, ma nda mba 'ya kageze ghena ta sla mɓɛta ne, va wa sa ɗa yaka mbeli pa tsetsenya wa? Nza kazhɛre ghena nya geze mbeli te ghəa baŋe ta Yɛsə Kriste te sheghwə kwa zleŋkwa kaghena gezhi nya kezhɛ nda ke kweci mbeli we.

¹² Ma mbeli nyi kebeze ŋayɛ nyi kezha slamte mɓɛta ne, tsewemte sepele ta nci hɛ perə.

¹³ Ma gheyɛ gɛ ka kesaka ma, kezha nza kaka mamzashi hekakɛ ŋayɛ Shala. Mba yɛ kezhɛrete mamza ta ŋayɛ kawəsə kesla ntsə yitea wəshi kala nya ɗe geva, ama kemane mə ghəa ŋayɛ kwa nza ɗe va gheyɛ.

¹⁴ Kwa nza ŋkɛ nahe pɛtɛa wəsə mahalegəa Moyize kejikəte geva mbe ghena kwetɛŋe: «Nda na kaɗe nde ghedəkwəa ŋa kala ghəa ŋa.»

¹⁵ Ama kenza nde kala wəshi nyi hwa gamba mene yɛ laka hehale ghəa ŋayɛ ba'a mpeɗe ghəa ŋayɛ ne, ntsehwele mə yagha yɛ kazamte sebe te ghəa ŋayɛ.

Fa nda ghena ke Sefəa Shala, kaɗema ke ɗe ta geva

¹⁶ Fa mə ghena ta ɗa: pelakɛ mə Sefəa Shala kancɛ ŋayɛ hweŋkwa, mba yɛ kefa wəsə nya ɗe geva.

¹⁷ Kwa nza ŋkɛ tekeleke wəsə nya zəzə geva ta ɓəmə, kenza ŋkɛ kala nya ɗe Sefəa Shala we, wəsə nya ɗema geva yaɗe Sefəa Shala. Tene hɛ kaka ghema tsagha, kashɛ yɛ mene wəsə nya ɗe yɛ kamene we.

¹⁸ Ma kenza nde Sefəa Shala nde sleke ŋayɛ ne, mba yɛ kaka mavashia wəsə mahalegə we.

¹⁹ Nahe mbeli keɗepe slene ta geva: vale tahe, nza wale wale, mefətekwə,

²⁰ hawe va kweci shala, mene slibə ghwɛ, ɗema ntsə ta wəndə, mpa, zlɛ, hwepe wənə, heɗe geva, nehe ŋkwa,

²¹ sla ntsə, ghwəyi, ɓerawe ba'a kweci wəshi nyi ndiremi ndiremi nyi kala nyi. Gheŋkɛ yageze ŋayɛ 'ya tsetsenya, kala nya gezete ŋayɛ 'ya kaghate. Ma mbeli nyi kemene wəshi nyi kala nyi ne, kazeme Meghea Shala hɛ we.

²² Ama wa nyi wəshi nyi mene Sefəa Shala nyi: ɗe, zlama, kwelɛŋe, zereghe ghena, zhɛ heli, ndeɗea mehele, nza dɛŋe dɛŋe,

²³ gwedə ba'a tsefe ghə. Wəsə mahalegə shɛ kafɛa wəshi kala nyi we.

²⁴ Ma mbeli nyi kaŋa Yɛsə Kriste ne, nahe hɛ kebaŋate ɗe ta geva ta nci te sheghwə kwa zleŋkwa zlaɓe le wəshi nyi ndiremi ndiremi nyi mene ba'a nyi zəzə wəndə.

²⁵ Ma kenza nde laka Sefəa Shala nza gheɓəmə ne, dzeghwa ɓəmə kala nya ncɛ ɓəmə hweŋkwa ŋkɛ.

²⁶ Mba gheɓəmə kekele ghəa ɓəmə, mba gheɓəmə keghweze mɛ hwa ghəa ɓəmə keɗema kesla ntsə kwelɛ ghəa ɓəmə.