Ka Galate 4 - Ghena ta Shala

¹ Wa nya ghena nya geze 'ya nya: ma wəzege nya ketezeme ghɛ ne, mba ŋkɛ kawəzege kaba, kala mava nza ta ŋkɛ ki ghɛ tsetsenya, ya gheŋkɛ nza kawəndə nya ketesleke wəshi nyi ki ghɛ pɛtɛ kekele ŋkɛ.

² Ama mbe dzeve ta mbeli nyi keya nda ghɛ nza ŋkɛ nda tenaka və nya sləyi yitenyɛ kezha zeme ghɛa shɛ.

³ Tsagha se gheɓəmə perə, kwa se gheɓəmə kaŋwale, kaka mavashia berete nyi kesleke hɛɗi lema.

⁴ Ama kwa nakanyɛ və nya dzeghete geva ne, pa Shala ghweneke Wəzege ta ŋkɛ nya keyake geva hwa male, nya kenzate nza kala nya ɗe wəsə mahalegə,

⁵ kezha mbeɗe mbeli nyi kaka mavashia wəsə mahalegə, kezha zhɛre ɓəmə kaŋwalea Shala.

⁶ Va nya nza yɛ kaŋwalea ŋkɛ ne, nahe Shala keghwenakɛ Sefəa Wəzege ta ŋkɛ kadzawa wənəa ɓəmə, Sefə nya kezlape: «Aba! Yita!»

⁷ Kala nya gɛ ne, mba na kamava we, ama wəzege ta Shala na. Ma kwa nza na kawəzege ta ŋkɛ ne, kateve ŋa hweŋkwa kezeme ghɛ Shala hwa ŋwalea ŋkɛ laka zlaɓa ta ŋkɛ.

Yirə Pol va ka Galate

⁸ Ma vəashi ne, keɗepe Shala yɛ we, kaka mavashia wəshi nyi zhɛrete mbeli kashala se yɛ, ama kenza kashala we.

⁹ Ama tsetsenya ne, nahe yɛ keɗepe Shala, keɗema nahe Shala keɗepe ŋayɛ. Tsema shɛ yɛ zhɛne geva kalə sha wəshi nyi ɗema berete va hɛ ba'a nyi ɗema zləvə te hɛ wa? Gheyɛ ɗe kanza kaka mavashia nci zhɛkwa na?

¹⁰ Kahawe yɛ fate fate va yɛ veci, yɛ tere, yɛ və ba'a yɛ va.

¹¹ Kazhɛ ɗa ghazlənə va gheyɛ, gəmə leɓe ghəa ɗa 'ya le slene kezha gheyɛ.

¹² Ka kesaka ma, təhwə təhwə ŋayɛ 'ya, yipəte mə ghəa ŋayɛ le 'ya, kala nya nza 'ya yipə yipə le gheyɛ perə. Kebezemte ɗa ghena yɛ we.

¹³ Nahe yɛ keɗepe ndeɗekə, vəa ŋkwa nya nza shewə ne, nahe 'ya kezlapete ŋayɛ Ghena kwatenca nya ganyɛ kakwa ghate.

¹⁴ Nahe zereghwe ta ɗa kedzeghakɛ zereghe ghena ta ŋayɛ, kese yɛ kaɗema ɗa keɗema kaŋka ɗa we. Ama nahe yɛ kekemaneve ɗa kala nde ghwene ta Shala ba'a kala Yɛsə Kriste.

¹⁵ Kwele kwele se yɛ kazlama! Tema zlama ta ŋayɛ nya veci ŋkwa shɛ gɛ wa? Kaganda yageze 'ya te ghəa ŋayɛ, ma ya kaferaɗakame ntsə ta ŋayɛ kwa ghə va gheyɛ kezha ve ɗa ne, nza kamene yɛ.

¹⁶ Nahe 'ya kezhɛre ɗa kande jaga ta ŋayɛ tsetsenya va nya nza 'ya kageze ŋayɛ kaganda na?

¹⁷ Kwele kwele mene ŋayɛ ndeɗe mbelia shɛhɛ, ama kenza wəshi nyi zəzə hɛ megela we. Ma wəsə nya ɗe hɛ kamene ŋayɛ ne, kezha zlenekɛ ɗa yɛ kalə ŋayɛ yitea hɛ.

¹⁸ Megela kezha mene ndeɗe yɛ kevə kevə, ama kezha wəsə ganyɛ, kenza deke vəa ŋkwa nya nza 'ya tagha hwa gheyɛ we.

¹⁹ Ŋwalea ɗa, kala male nya keya le yaka ne, kasa yaka 'ya zhɛkwa kezha gheyɛ hwa'a te və nya ntishɛ Yɛsə mbe wənəa ŋayɛ.

²⁰ Kwele kwele ɗe 'ya kanza hwa gheyɛ tsetsenya kezha geze ŋayɛ kwete ghena. Kwele kwele yirənyɛ ɗa 'ya te ghəa ŋayɛ.

Yipə pa te ghəa yɛ Agar le Sara

²¹ Geze ɗa mə ghena ta ŋayɛ, gheyɛ mbeli nyi keɗe kanza kaka mavashia wəsə mahalegə, kefate wəsə nya geze wəsə mahalegə yɛ wəka?

²² Ma ke rafete geva: bake yake ŋwale Abraham, kwete ne, wəzege ta kwatera, kwete, wəzege ta makwa.

²³ Ama laka ɗe ta geva yake geva wəzege ta kwatera, ŋa male makwa ne, kala ghena nya meɗeyi nda Shala ke Abraham yake geva ŋkɛ.

²⁴ Ghena keyipə pa ya mbe ghena nya. Nahe mi nyi bake nyi kenza kajikə geva bake. Ma kwete jikə geva nya ncɛ Agar ne, jikə geva nya kesawa pelɛ ghweme ta Sinay. Ghenta nde yake ka mavashi.

²⁵ Ma Agar ne, ghenta ghweme ta Sinay nya te hɛɗia Arabi, nya yipə yipə le Zhɛrəzalɛm nya tsetsenya, nya kamava le pɛtɛa mbeli nyi mbe.

²⁶ Ama nahe Zhɛrəzalɛm nya pelɛ ghweme kenza waɗe, gheŋkɛ ya kameyɛ ɓəmə.

²⁷ Kwa nza ŋkɛ ma ke Ghena ta Shala gezete: «Male jɛŋa, zlama, gha nya keghama yake ŋkwa. Tsa yɛyi kwa ghama na kasahwe yaka yitea ya wəzege. Kwa nza ŋkɛ kwele kwele ma tenza ŋwale va male nya ɗema mbeli ke male nya ɗe mbeli.»

²⁸ Ma gheyɛ gɛ ka kesaka ma, ŋwale nyi keyake geva kala ghena nya meɗeyi nda Shala ke mbeli yɛ, kala nya nza Izak.

²⁹ Ama kala nya se wəzege nya keyake geva laka slia geva nya kaghweze mɛ hwa wəzege nya keyake geva laka Sefəa Shala ne, tsagha shɛnyɛ ŋkɛ tsetsenya perə.

³⁰ Ama tsema ke Ghena ta Shala wa? Ma ke: «Ŋkamte kwatera le wəzege ta nta, kashɛ wəzege ta kwatera zeme ghɛ le ŋa male makwa we.»

³¹ Tsagha shɛnyɛ ŋkɛ le gheɓəmə perə ka kesaka ma, ŋwalea kwatera gheɓəmə we, ama ŋwalea male makwa.