Ka Galate 3 - Ghena ta Shala

Yɛ ya za ma ke wəsə mahalegə

¹ Gheyɛ ka Galate, gezhia kɛfi yɛ! Wa nde zhɛ ŋayɛ yitea ghə wa? Ndagwara nahe mbeli kencɛte ŋayɛ mte ta Yɛsə te sheghwə kwa zleŋkwa darahwe rahwe.

² Kaɗe 'ya kazhɛnete ɗa ghena nya yɛ: ma nda se yɛ kakemave Sefəa Shala ne, kwa zelete ghena ta wəsə mahalegə yɛ na, na, va nya fate ba'a nya yɛte Ghena kwatenca nya ganyɛ yɛ na?

³ Tsema nza yɛ kaka gezhia hɛɗi kala nya wa? Pa yɛ ghate le Sefəa Shala ne, le berete ta geva ta ŋayɛ ɗe yɛ kakiɗi na?

⁴ Ghena nya wəba kala nya ne, kawəsə gəmə ɗe yɛ kazhɛrete tsetsenya na? Kashɛ ŋkɛ nza kawəsə gəmə we.

⁵ Ma nda ve ŋayɛ Sefəa ŋkɛ Shala ba'a nda mene wəshi meŋele ŋkɛ hwa gheyɛ ne, va nya zelete wəsə mahalegə yɛ na, na va nya fate ba'a nya yɛte Ghena kwatenca nya ganyɛ yɛ na?

⁶ Ma ke ghena nya gezete Ghena ta Shala te ghəa Abraham: «Ma kwa yɛte Shala ŋkɛ ne, pa veyi ŋkɛ kawəndə tiɗiɗi kwa kema ta ŋkɛ se te yɛ ta ŋkɛ.»

⁷ Megela ma ɗepete yɛ: ma mbeli nyi keyɛte Shala ne, ghenci ya kahwelefefia Abraham nyi fate fate.

⁸ Ma ke Ghena ta Shala vəashi: kateve kweci hwelefefi Shala tiɗiɗi kwa kema ta ŋkɛ tewəmbəreke yɛ ta nci. Vatse gɛ, ma ke ghena kwatenca nya ganyɛ nya ŋkɛ sha Abraham: «Katewəpi mbeli nyi te hɛɗi Shala pɛtɛ se te gha.»

⁹ Ma kwa yɛte Shala Abraham ne, pa Shala wəpikɛ ŋkɛ, tsagha nza yayata wəndə nya keyɛte Shala kewəpi wəpi kala nya nza Abraham.

¹⁰ Ma mbeli nyi kezele wəsə mahalegə ne, kebezla bezla hɛ va Shala. Kwa nza ŋkɛ ma ke Ghena ta Shala: «Yayata wəndə nya kezeletema wəshi nyi gezete wəsə mahalegə fate fate ne, nahe wəndəa shɛ kenza kebezla bezla.»

¹¹ Ama wəndə shɛ kazele wəsə mahalegə kezha nza tiɗiɗi laka gheŋkɛ we, kwa nza ŋkɛ ma ke Ghena ta Shala gezete: «Ma wəndə nya veyi Shala tiɗiɗi laka yɛ ne, teghweme tenza wəndəa shɛ.»

¹² Ma wəsə mahalegə ne, laka yɛ mene geva ŋkɛ we. Kwa nza ŋkɛ ma ke Ghena ta Shala: «Ama wəndə nya kemene wəshi nyi gezete wəsə mahalegə ne, kanza ŋkɛ teghweme laka hɛ.»

¹³ Kriste nde mbeɗeke ɓəmə va wəsə mahalegə, pa Yɛsə zhɛrenyɛ kande bezla bezla te ŋkwa ɓəmə. Ma ke Ghena ta Shala: «Yayata wəndə nya baŋate mbeli te sheghwə ne, kebezla bezla ŋkɛ.»

¹⁴ Ma nda menete ŋkɛ kala nya ne, kezha baŋe Shala kawəpikɛ kweci hwelefefi kala nya gezete nda ŋkɛ ke Abraham laka mte ta Yɛsə Kriste, kezha baŋe gheɓəmə kakemave Sefəa Shala nya meɗeyi nda ŋkɛ ke mbelia ŋkɛ laka yɛ.

Wəsə mahalegə ba'a meɗe mɛ

¹⁵ Ka kesaka ma, banda ta ŋkɛ, ma vəa ŋkwa nya gezeyi meɗe mɛa ŋkɛ wəndə kala nya kehite geva ne, wəndə shɛ kabelewəmte keɗema kazhɛremte meɗe mɛa shɛ we.

¹⁶ Yawa, nahe Shala kemeɗeyi nda ghena shɛ ke Abraham ba'a hwelefefia ŋkɛ. Kegezete Ghena ta Shala: «Kaŋa hwelefefia ŋkɛ», ke we, kwa nza ŋkɛ kwele kwele mbeli. Ma ke: «Kaŋa hwelefe ta ŋa», laka wəndə kwetɛŋe gezete ŋkɛ, gheŋkɛ Kriste.

¹⁷ Wa nya ghena nya ɗe 'ya kageze nya: Nahe Shala kemenete meɗe mɛ ba'a kemeɗeyi kezha nza ŋkɛ tsagha. Ma wəsə mahalegə nya kese kwetere wəmbəa va wəfaɗe gwəmsə ba'a mahekenemsə ne, kabezemte ghena nya meɗeyi nda Shala ke mbeli ŋkɛ we.

¹⁸ Ma ya laka wəsə mahalegə tezeme ghɛ hɛ yitea Shala ne, kenza laka ghena nya meɗeyi ŋkɛ we. Ama laka ghena nya meɗeyi nda ŋkɛ menete nda zlaɓa ta ŋkɛ ŋkɛ ke Abraham.

¹⁹ Ma nda kala nya ŋkɛ ne, yitea wa keleke wəsə mahalegə Shala wa? Ma nda veyi geva wəsə mahalegə ne, kezha ncɛ jaɗafa ta mbeli kadzete ŋwela, nahe ŋkɛ kehite geva kezha temə ŋkɛ nda tese hwelefe ta Abraham nya veyi nda geva meɗe mɛa Shala. Ke ka ghwene ta Shala ndeke nda wəsə mahalegəa ŋkɛ ŋkɛ kaba, pa hɛ ndeke nda ke kwete wəndə kwetɛŋe yitea zlape nda ke mbeli.

²⁰ Ma wəndə kwetɛŋe nde mene wəsə ne, gəmə wəndə nya kwelɛ tepe, kwa nza ŋkɛ Shala kwetɛŋenyɛ nde menete slenea shɛ.

Slene ta wəsə mahalegə

²¹ Nahe wəsə mahalegə keɗema ghena nya meɗeyi nda Shala ke mbeli na? Ewə. Ma nda se wəsə mahalegə kakeleke geva ne, kezha nza mbeli teghweme, ma keyate wəsə mahalegəa shɛ wəndə ne, katenza wəndəa shɛ tiɗiɗi kwa kema ta Shala.

²² Ama nahe Ghena ta Shala kegezete kaka mavashia jaɗafa mbeli pɛtɛ kwake te hɛɗi, kezha baŋe wəsə gəməa Shala nya meɗeyi ŋkɛ kezha mbeli kamenete geva, mbeli nyi keyɛte Yɛsə nde nza kakemave laka yɛ ta nci mbe Yɛsə Kriste.

²³ Tewə yɛ kenaka kamene geva ne, kaka mavashia wəsə mahalegə gheɓəmə, yitea ncake geva yɛ shɛ te kwete hɛ.

²⁴ Tsagha ne, nahe wəsə mahalegə keveyi geva kawəsə nya keya ŋkwa nda tese Kriste, kezha nza gheɓəmə kambeli nyi tiɗiɗi kwa kema ta Shala laka yɛ mbe Kriste.

²⁵ Ma tsetsenya ne, nahe vəa yɛ kese, mba gheɓəmə kedambeghə ɓəmə yitea wəsə keya ŋkwa ɓiyitsa.

²⁶ Kwa nza ŋkɛ ma gheyɛ nyi keyɛte Yɛsə ne, ŋwalea Shala yɛ pɛtɛ laka nza ta ŋayɛ jikə le Yɛsə Kriste.

²⁷ Ma yayata wəndə nya kekelete batɛme te sləa Yɛsə ne, jikə ŋkɛ le, nahe ŋkɛ keseɗaghe Yɛsə kala lekwesa.

²⁸ Kezhɛne ghala kanza kwelɛ nde Zhəwif le nde Grɛk, mava le mamza, za le male we. Kwa nza ŋkɛ nahe gheyɛ pɛtɛ kenza jikə mbe Yɛsə Kriste.

²⁹ Ma kenza nde kaŋa Kriste yɛ ne, hwelefefia Abraham yɛ tsagha, ka zeme ghɛ yɛ kala nya meɗeyi Shala.