Ka Filipe 2 - Ghena ta Shala

Shifə ghə ba'a kwelea Kriste

¹ Nahe jikə ta ŋayɛ le Kriste kendeke ŋayɛ hwepe ghə na? Kantsə ŋayɛ berete ɗe ta ŋkɛ na? Nahe yɛ kenza jikə le Sefəa Shala na? Kazhɛ heli yɛ ba'a kamene ganyɛ yɛ kwelɛ ghəa ŋayɛ na?

² Ndeke ɗa mə zlama laka nza ta ŋayɛ kanya kwetɛŋe, laka nza le ɗe kwetɛŋe, wənə nya kwetɛŋe ba'a mehele nya kwetɛŋe.

³ Menema wəshi yɛ le nta ghala ba'a zelema zləvə nya gəmə yɛ ma, ama nza mə kaka gwedəa kɛfi, newe mə kweci mbeli kambeli nyi za ma ke gheyɛ.

⁴ Mba wəndə kezəzə ŋa ŋkɛ ghə nahe, ama zəzə ŋa kweci mbeli ŋkɛ kala ŋa ŋkɛ perə.

⁵ Nza mə kwelɛ ghəa ŋayɛ kala mbeli nyi jikə le Yɛsə Kriste:

⁶ Ma Yɛsə ne, Shala ŋkɛ le ghəa ŋkɛ, ama keveyi ghəa ŋkɛ ŋkɛ yipə yipə le Shala we.

⁷ Ama nahe ŋkɛ kesərəakɛ pɛtɛa wəshi yitea nza kala mava. Nahe ŋkɛ keyipəte ghəa ŋkɛ le wəndə ŋelɛ, tsagha nza ta ŋkɛ kala wəndə fate fate.

⁸ Nahe ŋkɛ keyɛhwe shifə ghəa ŋkɛ ba'a keveyi ghəa ŋkɛ kande yɛ fete tsape hwa'a te mte, mte nya te sheghwə kwa zleŋkwa.

⁹ Vatse keleghe ŋkɛ Shala kadzeme ghweme, nahe ŋkɛ kendeke nda slə nya za ma ke kweci slə pɛtɛ.

¹⁰ Ma te sləa Yɛsə ne, pɛtɛa mbeli nyi pelɛ ghweme, nyi kwake te hɛɗi, nyi kwa zeweve ta hɛɗi kagwəɗəŋə kwa kema ta ŋkɛ.

¹¹ Pɛtɛa mbeli kategeze le mɛa nci, Yɛsə Kriste ya kande sleke ŋkwa, kazləvəa Shala Yita.

Nza mə kawaŋe ta mbeli

¹² Kala nya gɛ, ka mcɛhɛ ɗa, kwele kwele fa ɗa ghena yɛ kwa nza 'ya hwa gheyɛ, jara ma hawe yɛ va 'ya kwele kwele ya 'ya ɗema tagha. Mene mə slene ta mbele ta ŋayɛ le ghazlənə ba'a bare bare ta geva.

¹³ Kwa nza ŋkɛ slene yamene Shala mbe gheyɛ keveci keveci kezha ve ŋayɛ berete keɗe ba'a kekiɗi wəsə nya zəzəte ŋkɛ.

¹⁴ Mba yɛ kemene ndəghwə ndəghwə ba'a ghəpə mbe yayata wəsə nya mene yɛ,

¹⁵ yitea nza yɛ kaka menetema fete, kaŋwalea Shala kaɗema deghale te hɛ hwa mbeli nyi ndiremi ndiremia mehele nyi kwake te hɛɗi nya. Nahe ŋkɛ kehi kezha ɓele yɛ hwa hɛ kala yɛ saseregwa pelɛ ghweme,

¹⁶ kwa nza yɛ kakele nda ghena ta mpi ke hɛ. Ma kenza nde kala nya mene yɛ ne, kazlama 'ya te veci nya tese Kriste. Ma vəa ŋkwa shɛ ne, kateɗepe mbeli kaɗema slene nya se 'ya kamene le ntsə geva gəmə.

¹⁷ Kave nda yɛ ta ŋayɛ gheyɛ ba'a yɛ fete ta ŋayɛ ke Shala kala wəsə nya ve nda mbeli yitea wəsə kedzeghe melɛ, nda kwete mimia ɗa nde tesheke geva kənəa wəsə kedzeghe Shala shɛ. Ma kenza nde tsagha ŋkɛ ne, fare fare tenza wənəa ɗa, kazlama 'ya le gheyɛ.

¹⁸ Tsagha yɛ perə, kazlama yɛ le 'ya.

Yɛ Timotɛ le Ɛpafrodite

¹⁹ Kasla heli 'ya, va Nde sleke ŋkwa Yɛsə yitea ghwene ŋayɛ Timotɛ te kwete hɛ we. Tsagha ne, katenza ghəa ɗa gwəfə kefake ɗa ghena ta ŋayɛ ŋkɛ.

²⁰ Gheŋkɛ wəndə nya nakɛ 'ya kazəzə te ghəa nza ta ŋayɛ kwele kwele kala 'ya kaganda kaganda.

²¹ Ma kweci mbeli ne, deke ŋa nci ghə yazəzə hɛ, kaɗema kazəzə ŋa Yɛsə Kriste.

²² Ama nahe yɛ keɗepe gheyɛ le ghəa ŋayɛ tsema tsema se Timotɛ kamene yitea slene, nahe yɛ keɗepe slene nya menete 'ya le, kala yɛ wəzege le yitenyɛ menete slene 'ya le kezha Ghena kwatenca nya ganyɛ.

²³ Gheŋkɛ yateghwene ŋayɛ 'ya kahe kahe vəa ŋkwa shɛ keneweve nza ta ɗa 'ya.

²⁴ Ama kagezleŋe ghə 'ya va Shala we, katelə 'ya le ghəa ɗa kanewe ŋayɛ temə ɓɛhwɛ.

²⁵ Ma zəzə 'ya ne, megela keghweneghe ŋayɛ Ɛpafrodite 'ya kaba, wəza meyɛ ɓəmə, wəndə nya kebeghe ɗa mbe slene ba'a mbe mpa nya mpa 'ya, gheŋkɛ yaghweneke ɗa yɛ le wəshi nyi kemanakɛ ɗa yɛ le hɛ, kwa nza titikwəa ŋkɛ te 'ya.

²⁶ Kaɗe ŋkɛ kalə kanewe ŋayɛ, kwele kwele beze mehele ta ŋkɛ kwa fate shewə se ŋkɛ.

²⁷ Kaganda ne, shewə se ŋkɛ, takwa takwa ŋkɛ kamte, ama nahe Shala kezhɛakɛ heli yite, yite nahe we, ama yitea 'ya perə, yagha wənəa ɗa kazhɛne kazhɛ ɗa za ma ke nya kaghate.

²⁸ Vatse ghweneghe ŋayɛ ŋkɛ 'ya kahe kahe, ma kenakɛ ŋkɛ yɛ ne, katezlama yɛ, 'ya ɓiyitsa, nahe wənəa ɗa kegweɗakwe.

²⁹ Ma kala nya ne, kemaneve mə ŋkɛ le zlama nya wəba tewəmbəreke Nde sleke ŋkwa. Nahe ŋkɛ kehite geva kezha hawe yɛ va mbeli nyi kala nyighɛ.

³⁰ Va nya nza ŋkɛ, tewəmbəreke slene ta Kriste ne, cɛame cɛame yɛmə se ŋkɛ, weli mpia ŋkɛ keza tewəmbəreke kele ɗa wəsə kekemane ɗa, nya ndɛare yɛ va kele ɗa le ghəa ŋayɛ.