Ka Filipe 1 - Ghena ta Shala

Pol kanjiŋwe ŋkwa

¹ Se va yɛ Pol le Timotɛ, ka mene slene ta Yɛsə Kriste. Ke pɛtɛa mbelia Shala nyi mbe Filipe, gheyɛ nyi jikə mbe Yɛsə Kriste, mbeli nyi te ghəa Jikə ta ka Kriste ba'a ke ka kemane ŋkwa.

² Pa Shala Yita ba'a Nde sleke ŋkwa Yɛsə Kriste ndeke ŋayɛ zlaɓa ta ŋkɛ ba'a kwelɛŋea ŋkɛ.

Səkwə ghə ta Pol kezha ka Kriste nyi mbe Filipe

³ Ŋ'wese 'ya sha Shala keveci keveci kezəzə ŋayɛ 'ya.

⁴ Yayata və nya səkwə Shala 'ya kwa kezha gheyɛ ne, le farefa səkwə 'ya.

⁵ Va nya kemanakɛ ɗa yɛ yitea nehe nda ghena ta Shala ke mbeli se te kwa ghate ta hɛ pa ɓeshi.

⁶ Nahe 'ya keɗepe fate fate: ma Shala nya keghate slene ganyɛke mbe gheyɛ ne, katejive mbe kema le kiɗi ta slenea shɛ hwa'a te vəa Yɛsə Kriste.

⁷ Tiɗiɗi nya kala nya sha 'ya kezha zəzə 'ya te ghəa ŋayɛ kwele kwele, kaɗe ŋayɛ 'ya, ya 'ya nza kwa daŋgayɛ, ya 'ya nza waɗe kezha geze nza ta Ghena kwatenca nya ganyɛ, kezha ncɛ tiɗiɗia ŋkɛ jikə gheyɛ le 'ya mbe slenea shɛ kanewe 'ya.

⁸ Shala nde negha fete yitea 'ya kwa geze 'ya kamawe ŋayɛ 'ya kwele kwele le ɗe nya kese va Yɛsə Kriste 'ya.

⁹ Wa nya səkwə ghə ta ɗa nya: pa ɗe ta ŋayɛ mtsehe geva jive mbe kema mbe kema le fa ghena tiɗiɗi ba'a ɗepe wəsə fate fate,

¹⁰ kezha nza yɛ le berete kezha nta wəsə nya ganyɛ ma. Tsagha ne, katenza yɛ wɛŋe wɛŋe ba'a kaɗema fete te gheyɛ vəa ŋkwa nya tese Yɛsə Kriste.

¹¹ Katenza mpia ŋayɛ mpɛafe va slene nya tiɗiɗi laka berete ta Yɛsə Kriste, kezha ve zləvə mbeli te Shala ba'a kezha tsahe ŋkɛ mbeli te nza ta ŋayɛ megela.

Kriste ya kampi

¹² Ka kesaka ma, kaɗe 'ya kaɗepe yɛ: ma wəsə nya kemenete ɗa geva nya ne, nahe ŋkɛ kepesleyi Ghena kwatenca nya ganyɛ te ŋkwa nya.

¹³ Kwa nza ŋkɛ nahe ka mene slene ki ghɛa ŋgwamna ba'a kweci mbeli nyi teke keɗepe tewəmbəreke slene ta Kriste hwepeyi ɗa mbeli kwa daŋgayɛ.

¹⁴ Nahe wəba ta kweci ka kesaka ma mbe Nde sleke ŋkwa kekemave berete se te nza ta ɗa kwa daŋgayɛ kageze nda ghena ta Shala ke mbeli kaɗema kaghazlənə.

¹⁵ Kaganda, ma kweci mbeli hwa hɛ ne, va zlɛ ba'a le ghəpə laka 'ya geze ghena ta Kriste hɛ, ama kweci ne, le mehele ganyɛ geze hɛ.

¹⁶ Ma mbeli nyi kemenete slenea shɛ le ɗe ne, nahe hɛ keɗepe kezha Ghena kwatenca nya ganyɛ veyi geva 'ya.

¹⁷ Ma mbeli nyi kezlapema ghena ta Kriste le wənə ganyɛ ne, ghəpə yave hɛ hwa mbeli. Ma zəzə hɛ ne, yaka yazhɛne hɛ kambake ɗa kwa daŋgayɛ nya.

¹⁸ Katsakɛ ŋkwa ghena ta nci we, ya ghenci nza kageze le wənə bake bake keɗema le wənə kwetɛŋe ne, ɗa ma ta nci kezlapete ghena ta Kriste, zlama yazlama 'ya, kaganda shɛ zlama 'ya.

¹⁹ Kwa nza ŋkɛ nahe 'ya keɗepe ma nza ta ɗa mbe yaka nya ne, kezha mbele ta ɗa, laka səkwə nya səkwə Shala yɛ kezha 'ya ba'a kemane nya kemane ɗa Sefəa Yɛsə Kriste.

²⁰ Ma wəsə nya neghe 'ya ba'a nya ve ghə 'ya te ne, mba 'ya kehawe mbe pɛtɛa wəshi pɛtɛ. Ama mba 'ya kaghazlənə kala nya ghalanza, hawe mbeli ve se te 'ya, ya 'ya mte ya 'ya nza teghweme.

²¹ Kwa nza ŋkɛ ma sha 'ya ne nahe nza teghweme kenza kezha Kriste, ma mte ne, meleɓe ta ɗa nyagha.

²² Ma kenza 'ya mba teghweme, wərə 'ya kamenete kwete slene nya ganyɛ, ama keɗepe wəsə nya tenta 'ya hwe 'ya we.

²³ Bake mbe ghəa ɗa va ghena shɛ, kaɗe 'ya kamte ɗa kezha nza vare Kriste, gheŋkɛ ya ganyɛ ma.

²⁴ Ama kezha gheyɛ ɓiyitsa ne, ganyɛ ma nza ta ɗa teghweme.

²⁵ Ma kwa nza ŋkɛ nahe 'ya keɗepe tsagha ŋkɛ ne, nahe 'ya keɗepe katentishɛ 'ya le gheyɛ, kaganda ne, katenza 'ya le gheyɛ pɛtɛ kezha kemane ŋayɛ kajive mbe kema ba'a yitea nza yɛ le farefa ta wənə mbe yɛ ta ŋayɛ.

²⁶ Ma kezhɛne 'ya kelə sha gheyɛ, katemene fege yɛ le 'ya fate fate laka nza ta mpia ŋayɛ mbe Yɛsə Kriste.

Mpa kezha ghena kwatenca nya ganyɛ

²⁷ Deke nza mə kala nya ncɛte ŋayɛ Ghena kwatenca nya ganyɛ ta Yɛsə Kriste. Ya 'ya lə sha gheyɛ, ya 'ya ləma ne, kaɗe 'ya kafate nza ta ŋayɛ tiɗiɗi, jikə mbe mehele kwetɛŋe, nda mpa yɛ le wənə kwetɛŋe kezha yɛ nya yɛte Ghena kwatenca nya ganyɛ yɛ.

²⁸ Mba yɛ keghazlənə va ka jaga ta ŋayɛ. Ghazlənə nya ɗema yɛ kaghazlənə nde ncɛ nda ke hɛ kaka za za hɛ, ma gheyɛ ne, kwa hweŋkwa ta mbele yɛ, va Shala se ŋkɛ.

²⁹ Kwa nza ŋkɛ nahe Shala kezlaɓa le gheyɛ laka Kriste, kenza deke yɛ nya yɛte ghena ta ŋkɛ yɛ we, ama kezha sa yaka tewəmbəreke gheŋkɛ.

³⁰ Tsetsenya gɛ ne, mbe mpa shɛ yɛ kala 'ya. Gheŋkɛ mpa nya nakɛ ɗa yɛ kampa vecagha, mba 'ya kampa tsetsenya kala nya fa yɛ.