Ɛzayi 9 - Ghena ta Shala

¹ Nahe mbeli nyi kese kadzeghwa mbe ŋkwesle kenakɛ waŋe nya wəba. Nahe waŋe keɓelete geva kənəa mbeli nyi kese te hɛɗi nya mbe ŋkwesle.

² Shala, nahe na keyate hwelefefi kwele kwele, nahe na kembakete nda zlama ta nci ke hɛ. Fare fare hɛ mbe kema ta ŋa kala nya nza mbeli fare fare te və kemene wəshi se te wəve, kala nya tsa gaghwe mbeli kənəa nehe ta wəshi nyi fəke mbeli hwa mpa.

³ Kwa nza ŋkɛ ma sheghwə nya te welɛ va hɛ kala sla ke wəza, geta nya kesla nda te bazla ke hɛ ba'a ghəa demea wəndə nya kesa nda yaka ke hɛ ne, nahe na keɓelemte hɛ kala nya te veci nya hərəte ka Madiyan na.

⁴ Pɛtɛ tsahwa ta ka ghema nyi kegaŋkeɓe hɛɗi ba'a lekwesa nyi bətə mbe mimi keteremte geva va ghwə.

⁵ Kwa nza ŋkɛ ne, nahe wəzege keyake ɓəmə geva, nahe wəzege teza kendeke ɓəmə geva. Nahe ŋkɛ kekemave berete kenza ka meghe. Ma ke mbeli sha heka ŋkɛ: Nde ncɛ ghena ganyɛ, Shala nde berete, Yita nya kaghala ghala, wəndə nya te ghəa kwelɛŋe.

⁶ Katembake meghea ŋkɛ ŋkɛ ba'a katekeseyi kwelɛŋe nya keɗema kakiɗi ŋkɛ. Katenza ŋkɛ pelɛ pasla ta meghe David ba'a katesleke hɛɗi meghea ŋkɛ ŋkɛ. Katehi ŋkɛ ba'a katezhɛre ŋkɛ bereteke laka hawe va wəsə nya kehi ba'a nya tiɗiɗi, se tsetsenya pa kaghala ghala. Nya ya kawəsə nya temene Mahwətə nde berete va wəba ta ɗe ta ŋkɛ.

Hwepe wənə ta Mahwətə va ka Israyɛl

⁷ Nahe Mahwətə kegezete ghena te hwelefefia Zhakob nahe ŋkɛ keteɗe kənəa Israyɛl.

⁸ Pɛtɛ mbeli kateɗepete, ma ke ka Ɛfrayim ba'a mbeli nyi mbe Samari sha geze mbe farefa ta nci ba'a le kele ghəa nci:

⁹ «Nahe yɛ dewe brəki keŋzlanji, katezhɛne n'yɛ kaŋa hɛ le pelɛ nyi tsehe tsehe. Nahe yɛ medaŋa mekweɗa ketsaslemte geva, katela yɛ medaŋa gwevɛre ghen'yɛ te ŋkwa nci.»

¹⁰ Nahe Mahwətə keheɗeyite ka jaga ta Rɛsin yitea ka Israyɛl, nahe ŋkɛ kendeke nda hwepe ghə ke ka ghema ta nci:

¹¹ Laka ŋkwa kesame ta veci ka Siri, laka ŋkwa kepəkwə ta veci ka Filisti. Nahe hɛ kempeɗehwe ka Israyɛl tereslɛme. Ya tsagha shɛ ŋkɛ ne, kegweɗakwete geva hwepe wənəa ŋkɛ we, mba dzeve ta ŋkɛ tekafe yitea ghweme.

¹² Ama kese mbelia shɛhɛ kazhɛre geva kase sha wəndə nya kese kaɗa hɛ we, kese hɛ kasepa Mahwətə, nde berete we.

¹³ Tagha gɛ, pa Mahwətə slamte ghə ba'a sheghe, dzeve ta peha ba'a ghwəvərə te veci kwetɛŋe mbe Israyɛl.

¹⁴ Mbelia jama ba'a mbeli nyi te ghə ya kaghə, ka mɛ ŋkwa nyi keteke nda tseŋwə ke mbeli ya kasheghe.

¹⁵ Nahe mbeli nyi te ghəa mbeli kezamte hɛ ba'a nahe mbeli nyi sleke hɛ kendahwe geva.

¹⁶ Vatse ɗema Mahwətə katenza ganyɛke laka ka megelɛgeshia nci, katezhɛ heli ŋkɛ yitea ka mezhɛtiti ba'a ka wedidia nci we. Kwa nza ŋkɛ ne, pɛtɛ hɛ kaka ndiremia mehele nyi kemene wəsə kwa ndiremi ba'a pɛtɛa mɛa nci kageze ghena nyi ndiremi ndiremi. Ya tsagha shɛ ŋkɛ ne, kegweɗakwete geva hwepe wənə ŋkɛ we, mba nza dzeve ta ŋkɛ tekafe yitea ghweme.

¹⁷ Kwa nza ŋkɛ katse 'yaghwa mehele kala ghwə nya ketere yɛ tigə ba'a yɛ ndəŋwə, nya katere yɛ sleke nyi mbe ghɛa wəfe ba'a nya kemene yɛ geɗeɗe ta n'yi dzeme yitea ghweme.

¹⁸ Ma va kwelea hwepe wənəa Mahwətə, nde berete ne, ghwə ya yitea meleme, kazhɛre mbeli kala wəsə ketere ta ghwə. Wəndə shɛ kese kazhɛ heli yitea menənyɛ we.

¹⁹ Slave mbeli te kwa zeme ne, kazhɛ ŋkwa ma shanda, mpeɗe mbeli te kwa gwela ne, kebehe mbeli we, yayata wəndə kampeɗe slia dzeve ta ŋkɛ.

²⁰ Kaha nda mpa hwelefe ta Manasɛ ke ŋa Ɛfrayim kaha nda ŋa Ɛfrayim ke ŋa Manasɛ, katsene geva hɛ bake nci yitea hwelefe ta Zhəwda. Ya tsagha shɛ ŋkɛ ne, kegweɗakwete geva hwepe wənəa ŋkɛ we, mba nza dzeve ta ŋkɛ tekafe yitea ghweme.