Ɛzayi 8 - Ghena ta Shala

Ya ta wəzege ta Ɛzayi

¹ Ma ke Mahwətə sha 'ya: «Kelete wəsə kwa slapesla nya bezle shɛ na rafate ‹Mahɛr-Shalal-Hash-Baz› jamake jamake te, geze ta ŋkɛ, ‹Fə wəshi kahe kahe hwa mpa, wədə geva kafə wəshia mbeli le berete.›»

² Tagha gɛ, pa 'ya fəte ka negha fete bake, nyi gezleŋema ghə mbeli va hɛ: Əwriya, nde dzeghe Shala ba'a Zakari, wəzege ta Yebɛrɛkiya.

³ Kwa sebe ta ŋkɛ, pa 'ya ɓelahehwe ɓelahe le male ta ɗa, nya kakwa mɛ ŋkwa. Pa nde dzawa hwə nda ba'a yake wəzege teza. Ma ke Mahwətə sha 'ya: «Hekate nda slə kaMahɛr-Shalal-Hash-Baz,

⁴ kwa nza ŋkɛ ma nda teɗepe geze ‹Yite ɗa› keɗema ‹Meyɛ ɗa›, wəzegea shɛ ne, nahe mbeli kefəke nda mcɛlə nyi mbe Damas ba'a wəshi nyi fəhwe mbeli hwa mpa nyi mbe Samari ke meghe nya mbe Asiri.»

Se ta ka Asiri vəkə le mpa

⁵ Ma ke Mahwətə sha 'ya zhɛkwa:

⁶ «Ma va nya ɗema yɛməa Silowɛ nya kehwɛ le zayɛ mbelia shɛhɛ, va nya ghazlənə hɛ va Rɛsin ba'a Pɛka ne,

⁷ 'ya katehwɛ yɛməa Efrate nya berete ba'a nya kwele kwele kasame yitea hɛ, geze ta ŋkɛ, meghea ka Asiri ba'a pɛtɛa berete ta ŋkɛ. Kateviɗi geva hələa Efrate pa pelɛ wəmbə.

⁸ Katehwɛ ŋkɛ dzeyi te hɛɗia Zhəwda, katenza ŋkɛ mpɛafe ba'a kasheke sheke, hwa'a yitea ŋwələa ŋkɛ tedzeme ŋkɛ. Katepesle geva ŋkɛ cakeɗake te hɛɗia ŋa Ɛmanəwɛl.»

Ɛmanəwɛl, wəsə kencɛ hərə ŋkwa

⁹ Gheyɛ mbeli, bare bare mə, nza mə keta ta va ghazlənə. Ghwene mə sleme ta ŋayɛ, gheyɛ hɛɗi nyi te mendɛkwe ta hɛɗi. Wərə yɛ kahite geva megela yitea mpa, ama neghe yaneghe ŋayɛ ghazlənə. Kaganda ne, wərə yɛ kahite geva yitea mpa, ama neghe yaneghe ŋayɛ ghazlənə.

¹⁰ Zəzəte mə wəshi nyi temene yɛ, katetazemte geva hɛ. Geze mə ghena nyi ɗe yɛ, katemene geva hɛ we. Kwa nza ŋkɛ ne, le gheɓəmə Shala.

Deke Mahwətə yahi mbeli kahawe ve

¹¹ Pa Mahwətə keseve ɗa ba'a gezete ɗa kezha ɗema 'ya kateke dzeghwa ta ka Zhəwda. Ma ke sha 'ya:

¹² «Hekama pɛtɛa wəshi nyi heka mbelia shɛhɛ ‹katsa ghena› yɛ ‹katsa ghena› ma. Ghazlənəma yɛ va wəsə nya ghazlənə hɛ ve ma. Ghazlənəma yɛ va hɛ ma.

¹³ Deke Mahwətə nde berete yateve yɛ kaShala, gheŋkɛ yatehawe yɛ ve, gheŋkɛ yateghazlənə yɛ ve.

¹⁴ Katenza ŋkɛ kaŋkwa nya keveyi geva tekeleke ba'a kapelɛ nya ketsa ŋkwa katehene, kagela nya kewele hɛɗi meghe nyi bake mbe Israyɛl. Katenza ŋkɛ kadagalawe ba'a kakeleŋa kaŋa mbeli nyi mbe Zhɛrəzalɛm.

¹⁵ Kwele kwele mbeli nyi ketetsepe tsepe, nyi keteteɗe ba'a nyi keteɓele. Katekesehwe hɛ keleŋa ba'a katembelenji hɛ we.

Vəa nza tikə tikə ba'a neghe wəsə

¹⁶ Yate ghena nya, veyi ghena nyi gezete 'ya hwa ka təkwə təkwə ɗa.»

¹⁷ Kaneghe Mahwətə nya kewəfərə kema ta ŋkɛ va hwelefefia Zhakob 'ya, kave ghə 'ya te.

¹⁸ Ma 'ya ba'a ŋwale nyi ndeke ɗa Mahwətə ne, nahe n'yɛ kenza kawəshi kencɛ wəshi ba'a kawəshi nyi ketemene geva mbe Israyɛl te sləa Mahwətə nde berete nya kenza pelɛ ghweme ta Siyon.

¹⁹ Ma tegeze ŋayɛ kweci mbeli: «'Yɛwe mə ghena va mbelia kwahɛɗi, va yɛ kwahyɛ ba'a ka mene weta. Nahe ŋkɛ kehi ka'yɛwe ghena va yɛ shala ta ŋkɛ, va mbelia kwahɛɗi kezha mbeli nyi te ghweme.» Ma kegezete ŋayɛ mbeli kala nya ne,

²⁰ ma pe yɛ sha tezhɛne nda ke hɛ: «Ke wəshi nyi tekete ba'a ghena nyi gezete Mahwətə hi mbeli kazhɛne nda geva.» Ma wəndə nya keɗema kageze kala nya ne, katenakɛ kiɗi ta ŋkwa ŋkɛ we.

Dzeghwa mbe ŋkwesle

²¹ Katejive mbeli mbe hɛɗi nya nza yaka ba'a ma. Ma va nya zhɛte nda ma ke mbeli ne, katehwepe wənə ba'a katebezla yɛ meghe le Shala mbeli. Katenewe ŋkwa kedzeme ghweme mbeli.

²² Kwa sebe ta ŋkɛ ne, katenewe ŋkwa nya te hɛɗi mbeli. Deke yaka, ŋkwesle, taze ta mehele nya keve nda ghazlənə ke mbeli ba'a viɗi nya zhikwətəkwə yatesləyi mbeli.

²³ Ama katenza ŋkwesle kaghala ghala kənəa hɛɗi nya se nya yaka te we. Ma vəashi ne, nahe Mahwətə kekelemte zləvə te hɛɗia Zabəlon ba'a ŋa Nɛftali. Ama kwa sebe ta ŋkɛ ne, nahe ŋkɛ kevate zləvə te hweŋkwa kedzawa ndərə, te hɛɗi nya laka ŋkwa kesame ta veci yitea hələa Zhəwrdɛŋe ba'a te Galilɛ, hɛɗia kweci hwelefefi.