Ɛzayi 7 - Ghena ta Shala

Ghena ke meghe Ahaz

¹ Te və nya se Ahaz, wəzege ta Yotam, shia Oziyas, te meghe mbe Zhəwda se Rɛsin, meghea ka Siri, Pɛka, wəzege ta Remaliya ba'a meghe nya mbe Israyɛl kezha ha nda mpa ke Zhɛrəzalɛm. Ama shaŋe hɛ kahərə ŋkɛ.

² Ma ke mbeli gezete nda ke hwelefefia David: «Nahe Aram kekelehwe hɛɗia Ɛfrayim.» Tagha gɛ, ntake ŋkɛ kabare bare le mbeli nyi yite kala nya gaŋkəɗə yɛ wəfe va sefə.

³ Ma ke Mahwətə sha Ɛzayi: «Shave mə kabegeme le Ahaz, gha ba'a wəzege ta ŋa Shɛyar-Yashəwb mɛa kwa keɗaŋe ta ŋkwa nya tsate ghwa nya pelɛ ghəa ŋkwa mbeli le, laka hweŋkwa nya kedzeyi wəvea ka tsewe lekwesa.

⁴ Ma pa na sha tegeze nda: Gweɗakwe pa, ghazlənəma na ma. Slama heli na va ghwə ta hwepe wənəa Rɛsin, nde Siri ba'a va ŋa wəzege ta Remaliya ma. Kametelike ghwəa sheghwə nyi keɗələ ka meghe nyi bake nyi.

⁵ Va nya nza ŋkɛ, nahe yɛ Pɛka le Ɛfrayim ba'a wəzege ta Remaliya kezəzəte za mpia ŋa. Ma ke hɛ gezete:

⁶ ‹Mbara ɓəmə kadzeme kaha nda mpa ke Zhəwda, ndeke nda ɓəmə ghazlənə, dzembe ɓəmə ŋkɛ shɛ mə kelehwe ŋkɛ ba'a veyi ɓəmə wəzege ta Tabɛyɛl kameghe mbe.›»

⁷ Ama wa nya ghena nya geze Shala Mahwətə nya: «Katemene geva nyagha ghena tɛape we.

⁸ Kwa nza ŋkɛ Damas ya kawədəa meleme Siri, Rɛsin ya kameghe nya mbe Damas. Ma mbe va ŋkwaŋemsə mcɛfeghəmbe ne, katetene mbelia Ɛfrayim we.

⁹ Samari ya kawədəa Ɛfrayim, wəzege ta Remaliya ya kameghea ka Samari. Ma keɗema yɛ kave nda ghə ke Shala ne, katenzate nza yɛ we.»

Ɛmanəwɛl

¹⁰ Ma ke Mahwətə gezete nda ghena ke Ahaz zhɛkwa:

¹¹ «'Yɛwakɛ va Shala Mahwətə ta ŋa kezha ndeke ŋa wəsə kencɛ wəsə nya kwa ghɛa mbelia kwahɛɗi keɗema nya pelɛ ghweme ŋkɛ.»

¹² Ma ke Ahaz zhɛnete: «Ewə, wəsə shɛ ka'yɛwe 'ya ba'a kadzeghe Mahwətə 'ya we.»

¹³ Tagha gɛ, ma ke Ɛzayi gezete: «Fa mə gɛ, gheyɛ hwelefefia David! Dewə newe leɓe nya leɓe mbeli yɛ nda leɓe Shala ta ɗa yɛ na?

¹⁴ Yawa, Mahwətə le ghəa ŋkɛ nde teve ŋayɛ wəsə kencɛ wəsə: Katedzawa hwə degheli kezha ya wəzege teza. Kateheka nda slə nde kaƐmanəwɛl, geze ta ŋkɛ, Shala le gheɓəmə.

¹⁵ Ŋ'wa kwa msle msle ba'a yɛməa mze yatesa ŋkɛ pa te və nya teɗema wəsə kwa ndiremi ba'a nya tentave wəsə ganyɛ ŋkɛ.

¹⁶ Ma nda teɗepe ɗema wəsə nya ndiremi ba'a nta wəsə ganyɛ wəzege ne, katewəfəyite geva hɛɗia ka meghe nyi bake nyi, nyi ghazlənə nyi na va hɛ.

¹⁷ Ama kateghwene kwete və Mahwətə kadzeghəa gha, mbelia ŋa ba'a hwelefefia ŋa, və nya keghama kase ghala neheve geva yɛ Ɛfrayim le hɛɗia Zhəwda. Laka meghea ka Asiri tese ŋkɛ.»

Se ta ka Asiri

¹⁸ Ma te kwete hɛ ne, katevɛ wəsə Mahwətə kezha heka zhiwə nyi te ŋkwa nya jikə geva yɛ Nil le ndərə, tsagha zhiwəa mze nyi te hɛɗia Asiri kase.

¹⁹ Katese ba'a kateme hɛ pɛtɛ dzeyi kwelɛ yɛ zlərə ba'a yɛ zlera, dzeyi hwa pɛtɛa yɛ gezlere ba'a dzeyi te pɛtɛa ŋkwa keya wəshi.

²⁰ Ma te vecia shɛ ne, katekele mpiɗi nya pelɛ kema ta Efrate Mahwətə geze ta ŋkɛ, meghea ka Asiri. Katekelemte zləvə ŋkɛ te gheyɛ, laka ŋsə ŋayɛ ghə, shinti nyi te seɗa ba'a ghwɛmɛ.

²¹ Ma te vecia shɛ perə ne, mbəkwə kwetɛŋe ba'a kwi bake yatekele yayata wəndə.

²² Katempa ŋ'wa mbeli kwele kwele yitea hɛ, katesa ŋ'wa kwa msle msle mbeli. Kaganda ne, ŋ'wa kwa msle msle ba'a yɛməa mze yatesa mbeli nyi ketetene te hɛɗia shɛ.

²³ Te vecia shɛ zhɛkwa, ma wəve nya nza dəŋwəa rɛzɛŋe slibə mbe, nya yipə yipə le dəɓərəa mze kwa tɛawetɛa slibə ne, katewəfəyite geva ŋkɛ hwa yɛ tigə le ndəŋwə.

²⁴ Katedzembe ŋkɛ mbeli le yɛ gwecɛ, kwa nza ŋkɛ katezhɛre pɛtɛa hɛɗi katigə ba'a kandəŋwə.

²⁵ Ma pɛtɛa ghweme nyi se mbeli kawəza mbe hɛ le wəɗə ne, katezhɛne mbeli kadzeme hwa hɛ va ghazlənə va yɛ tigə ba'a yɛ ndəŋwə we. Katenza hɛ kaŋkwa kezeme gwəzəa yɛ sla ba'a yɛ timɛti.