Ɛzayi 66 - Ghena ta Shala

Katemeha ghwə Shala te mbeli pɛtɛ

¹ Wa nya ghena nya geze Mahwətə nya: «Nahe ghweme kenza kapasla ta ɗa ba'a nahe hɛɗi kenza kaŋkwa keve seɗa ta ɗa. Wa ghɛ nya nza yɛ kaŋate ɗa wa? Wa ŋkwa nya nza 'ya kanza ɗa te wa?

² Ma pɛtɛa wəshi nyi newe nyi yɛ ne, dzeve ta ɗa nde menete hɛ, nahe hɛ kenza kaŋa ɗa, 'ya Mahwətə nde geze ŋayɛ. Ma wəndə nya ve ntsə 'ya te ne, nde dewə berete nya keyirə yirə ba'a nya kehawe va ghena ta ɗa.

³ Kadzeghe melɛ mbeli le mca, ama kapesle wəndə ŋelɛ mbeli perə. Kahene təmə mbeli, ama kahene kelɛ mbeli perə. Kave ɗa hə mbeli, ama kave ɗa mimia gərədə mbeli perə. Katere ɗa 'wərdə mbeli, ama kahawe mbeli va kweci shala perə. Dzeghwa kwa yɛ hweŋkwa ta nci yantave mbelia shɛhɛ, wəshia nci nyi ndiremi ndiremi kashasha yazeɗehwe nda ke hɛ.

⁴ Ma 'ya perə ne, 'ya katenta ve ɗa te hɛ, 'ya katekele wəsə nya keve nda ghazlənə ke hɛ kase. Kwa nza ŋkɛ nahe 'ya kehekate ŋkwa, ama wəndə shɛ kezhɛnete we. Nahe 'ya kegezete ghena, ama kese hɛ kafa we. Nahe hɛ kemenete wəsə kwa ndiremi kwa ntsə ta ɗa ba'a kentave wəsə nya keɗema ndeɗehwe ɗa.»

Kwa keɗaŋe ta meha ghwə ta Mahwətə

⁵ Fa mə ghena ta Mahwətə, gheyɛ mbeli nyi kehawe va ghena ta ŋkɛ. Ka menəhɛ ŋayɛ nyi keɗema ntsə ta ŋayɛ ba'a nya keŋka ŋayɛ tewəmbəreke 'ya ya shɛ. Ma ke hɛ sha geze: «Ncɛte zləvəa ŋkɛ Mahwətə yitea nakɛ zlama ta ŋayɛ ghen'yɛ gi ga!» Ama ghenci yatenza hawe te.

⁶ Fa mə gaka nya kese mbe meleme, gaka nya keshave mbe ghɛa Shala gi! Mahwətə nde ŋki nda zhɛme ta nci ke ka jaga ta ŋkɛ.

⁷ Ma nda tezhɛ nda ya ne, nahe nde keya nda, ma tewə wəzege kegha kazhɛ nda ne, nahe nde kayake wəzege teza.

⁸ Wa nde gha kafate wəsə nya kala nya wa? Wa nde gha kanakɛ wəsə nya kala nya wa? Kayake geva hɛɗi te veci kwetɛŋe na? Kayake geva hwelefe kwetɛŋe seɗa na? Ama tsagha menete geva ŋkɛ le Siyon: zhɛ nda ma ta ya ne, pa nde yake ŋwale.

⁹ Ma ke Shala Mahwətə ta ŋa: «Ma nda pele nda hweŋkwa 'ya ke male kanza le hwə ne, kezha ɗema nde kaya na? Ma 'ya nya keya wəzege sawa kwa hwə ne, katefɛa ŋkɛ keya na?»

¹⁰ Gheyɛ nyi keɗe Zhɛrəzalɛm, zlama mə kezha gheŋkɛ, nza mə fare fare tewəmbəreke gheŋkɛ. Gheyɛ nyi kese kanehwene tewəmbəreke ndiremi nya kese te, zlama mə fate fate kezha gheŋkɛ.

¹¹ Tagha gɛ, katentsə ŋayɛ berete ŋkɛ ba'a katenza yɛ behe behe kala ŋwale nyi te ŋ'wa va megheyɛa nci, nyi kezlama yitea sa ŋ'wa nyi nza ŋ'wa mbe.

¹² Kwa nza ŋkɛ wa nya ghena nya geze Mahwətə nya: «Katehwɛ zeɗe nza 'ya kala ghwa kadzembe Zhɛrəzalɛm ba'a mcɛləa kweci hwelefefi kala hələ nya viɗi. Katenewe ghweme 'ya te gheyɛ kala ma nya kenewe ghweme te wəzege nya sa nda ŋ'wa nde. Kahwepe ŋkɛ nde te wəmbə ba'a kawetse nda wetse nde kwa seɗa.

¹³ Kala nya gweɗakwe wəzege ta nta ma ne, tsagha tegweɗakwe ŋayɛ 'ya perə. Katenza yɛ gweɗakwe mbe Zhɛrəzalɛm.

¹⁴ Kaganda ne, katenakɛ vəa shɛ yɛ, katenza wənəa ŋayɛ fare fare, katezhɛne yɛ 'yɛ'yɛa ŋayɛ kanza bereteke kala gwəzə nyi keɗa hecimə.» Katencɛ nda berete ta ŋkɛ Mahwətə ke ka mene slene ta ŋkɛ, ama katencɛ nda hwepe wənə ta ŋkɛ ŋkɛ ke ka jaga ta ŋkɛ.

¹⁵ Kwa nza ŋkɛ wa nya Mahwətə nya kase mbe ghwə, nahe yɛ wəmata kempa ta ŋkɛ kenza kala sefə nya wəba. Gheŋkɛ kase kezha ncɛ ghwə ta hwepe ta wənəa ŋkɛ ba'a kezha ve ɗa te mbeli le ghwə nya ketse.

¹⁶ Kaganda ne, le ghwə ba'a le kafayɛ temeha ghwə Mahwətə te mbeli pɛtɛ. Kwele kwele tenza mbeli nyi mpəmte Mahwətə.

¹⁷ Te mbeli nyi keve ghəa nci tekeleke ba'a nyi kepɛ ghəa nci wɛŋe kezha dzawa yɛ ntsa geze ghena 'ya teke. Kanza hɛ kwetere wəmbəa wəndə nya te tepe. Kazeme gərədə keɗema təhwələ, wəshi keseɗa nyi ndiremi ndiremi hɛ. Katempə pɛtɛa mbelia shɛhɛ kwetɛŋe seɗa, Mahwətə nde gezete.

Kwa keɗaŋe ta tsene nya wəba

¹⁸ Ma ke Mahwətə: «Nahe 'ya keɗepe yɛ slene ta nci ba'a yɛ zəzə ta nci. 'Ya kase kezha tsene pɛtɛa hwelefefi nyi kegeze pɛtɛa ghena. Katese hɛ ba'a katenewe zləvəa ɗa hɛ.

¹⁹ Kateve wəsə kencɛ wəsə 'ya hwa hɛ. Ma mbeli nyi ketetene teghweme kwa sebe ta meha ghwə ta ɗa ne, kateghwene hɛ 'ya kalə sha ka Tarsis, ka Pəwl, ka Ləwd nyi kaka ɗepemte he have, kalə sha ka Təwbal, ka Yavan ba'a sha hɛɗi nyi cakeɗa cakeɗa dzeyi te ndərə, te ŋkwa nya ghama mbeli kafa sləa ɗa, te ŋkwa nya ghama mbeli kanakɛ zləvəa ɗa. Katencɛ nda zləvəa ɗa hɛ ke hwelefefia shɛhɛ.

²⁰ Katefə ɗa pɛtɛa ka menəhɛ ŋayɛ nyi kese hwa hɛ hwelefefia shɛhɛ kase, 'ya Mahwətə: pelɛ gədəwəa lɛmə, kwa yɛ wəmata gədəwə, dzeyi te yɛ gezle, pelɛ yɛ gədəwə kwara, pelɛ zlegweməa lɛmə hwa'a pelɛ ghweme ta ɗa nya keveyi geva tekeleke, mbe Zhɛrəzalɛm. Gheŋkɛ nde tenza kawəsə nya ve ɗa hɛ, 'ya Mahwətə. Katekele ŋkɛ 'ya kala wəsə nya kele ka Israyɛl te parantɛ nyi wɛŋe wɛŋe kase kadzembe ghɛa ɗa, 'ya Mahwətə.

²¹ Katenta mbeli 'ya hwa hwelefefia shɛhɛ kezha ve hɛ kaka dzeghe Shala ba'a kaka Lɛvi. 'Ya Mahwətə nde gezete.»

²² Kwa nza ŋkɛ kala nya tenza ghweme mɛnɛfɛ ba'a hɛɗi mɛnɛfɛ nya pa 'ya kaghala ghala kwa kema ta ɗa ne, tsagha tenza hwelefe ta ŋayɛ ba'a sləa ŋayɛ kaghala ghala kwa kema ta ɗa. 'Ya Mahwətə nde gezete.

²³ Tsagha gɛ, ma yayata dzemɛa ghweme ta tere ba'a yayata veci kezhɛne mpi ne, katese mbeli pɛtɛ kagwəɗəŋə mbe kema ta ɗa. 'Ya Mahwətə nde gezete.

²⁴ Ma vəa ŋkwa nya teshave hɛ ne, wərə hɛ katenakɛ mbeli nyi kesema kafa ɗa ghena kempə mpə. Katempə menciɗi nyi kezeme hɛ we, katemte ghwə nya ketere hɛ we. Katenza ŋkɛ kawəsə nya ndiremi kashasha sha pɛtɛa mbeli nyi te hɛɗi lema.