Ɛzayi 65 - Ghena ta Shala

Meha ghwə nya te kwetɛ hɛ

¹ Ma ke Shala: «Nahe 'ya kepelakɛ ghəa ɗa kazele ɗa mbeli nyi kesema ka'yɛwe ghena va 'ya. Nahe 'ya kesərəakɛ ghəa ɗa kasləyi ɗa mbeli nyi kesema kazele ɗa. ‹Wa nya 'ya nya, wa nya 'ya nya›, a 'ya sha hwelefe nya kehekɛmema sləa ɗa.

² Nahe 'ya kese kaha nda dzeve kevə kevə ke hwelefe nya kefama ghena, ke ka zele hweŋkwa nya ndiremi, ke ka mene wəshi nyi ɗe ghəa nci,

³ ke hwelefe nya keghweze mɛ hwa 'ya darahwe darahwe ba'a kevə kevə: kadzeghe melɛ hɛ dzeyi kwa yɛ ntsa, katere yɛ 'wərdə hɛ dzeyi te yɛ brəki,

⁴ kantishɛ hɛ dzeyi hwa yɛ kwele, kahɛ hɛ dzeyi mbe yɛ gezlɛŋə, kazeme slia gərədə hɛ, wəshi kezeme nyi wale wale ya kwa yɛ mentsehe ta nci.

⁵ Ma ke hɛ sha geze nda ke mbeli: ‹Hende ɗa ma geva yɛ ma, kwaɗe ɗa ma yɛ ma. Ndiremike tenza ŋkɛ kaŋa ŋayɛ, kwa nza ŋkɛ nahe 'ya keveyi geva tekeleke.› Ma vəa ŋkwa nya newe wəshi nyi 'ya ne, kahwepe wənəa ɗa ba'a katse ŋkɛ kala ghwə kevə kevə.

⁶ Wa nya nahe 'ya kerafete wəshia shɛhɛ. Kaganda ne, katenza 'ya divə keɗema 'ya kemehate ghwə

⁷ te yɛ fete ta nci ba'a ŋa ka shihɛ nci we. Nahe hɛ kese katere 'wərdə dzeyi hwa yɛ ghweme ba'a kese kaŋele ɗa dzeyi te yɛ wəmbə. Katemeha ghwə 'ya tsape tsape te wəshi nyi menete hɛ vəashi. 'Ya Mahwətə nde gezete.»

⁸ Wa nya ghena nya geze Mahwətə nya: «Ma kesləyi yɛmə mbeli mbe ghwedzekwe ta rɛzɛŋe ne, ma ke mbeli sha geze: ‹Bezema ŋkɛ yɛ ma, kwa nza ŋkɛ ne, wəpi ya mbe.› Tsagha temene nda 'ya ke ka mene slene ta ɗa, katebeze hɛ 'ya pɛtɛ we.

⁹ Kateve nda ŋwale 'ya ke hwelefe ta Zhakob, ke yita ta Zhəwda. Katenza yɛ ghweme ta ɗa kaŋa nci. Katenza hɛ kaŋa mbeli nyi ntave 'ya, katenza ka mene slene ta ɗa dzeyi hwa hɛ.

¹⁰ Katenza Saron kaŋkwa keya timɛti ba'a kwi, zlərəa Akor kagəzhia sla kezha mbelia ɗa, kezha mbeli nyi ketezelete ɗa.

¹¹ Ama gheyɛ nyi kewəfəyite ɗa, 'ya Mahwətə, nyi kezaghəyite ghweme ta ɗa nya keveyi geva tekeleke, nyi keve nda wəshi kezeme ke Gad ba'a nyi keɓasle nda tɛ kwa gweɗə gweɗə ke Mɛni ne,

¹² 'ya katefə nda ŋayɛ ke ka ghema ta ŋayɛ. Katebete ghəa shene yɛ te hɛɗi kezha sla ghə mbeli te gheyɛ. Kwa nza ŋkɛ nahe 'ya kese kaheka ŋayɛ, ama kese yɛ kazhɛne we, nahe 'ya kese kageze ŋayɛ ghena, ama kese yɛ kafa we. Nahe yɛ kemenete wəsə kwa ndiremi kwa ntsə ta ɗa ba'a nahe yɛ kentave wəsə nya keɗema zeɗehwe ɗa.

¹³ Vatse gɛ ne, wa nya ghena nya geze 'ya, 'ya Shala Mahwətə nya: Ma te və nya tezhɛ ŋayɛ ma ne, katenza wəshi kezeme va ka mene slene ta ɗa. Ma vəa ŋkwa nya tezhɛ ŋayɛ ndere ne, katenza wəshi kesa va ka mene slene ta ɗa. Tagha gɛ, katezlama ka mene slene ta ɗa, ama gheyɛ ne, katezhɛ ŋayɛ hawe.

¹⁴ Katetsa gaghwe ka mene slene ta ɗa va farefa ta wənəa nci. Ama gheyɛ ne, katetsa lewela yɛ va beze ta wənə ŋayɛ. Kaganda ne, kateŋgaɗe ghə yɛ va taze ta mehele ta ŋayɛ.

¹⁵ Ma ke mbeli nyi ntave 'ya sha tebezla ŋkwa le sləa ŋayɛ: ‹Peslekɛ ŋa Shala Mahwətə kala wəndə nya keɗema kala kwete wəndə nya!› Ama kaŋa ka mene slene ta ɗa ne, kateheka hɛ mbeli le kwete slə.

¹⁶ Ma yayata wəndə nya keteɗe kawəpi ŋkwa te hɛɗi lema ne, ‹Le Shala nya kaganda›, ke sha tewəpi ŋkwa. Ma yayata wəndə nya ketezeme fela te hɛɗi ne, ‹Le Shala nya kaganda›, ke sha tezeme fela.

¹⁷ Kwa nza ŋkɛ ne, 'ya katepa ghweme mɛnɛfɛ ba'a hɛɗi mɛnɛfɛ. Tsagha ne, katezhɛne mbeli kazəzə və nya vəashi we, katezhɛne ŋkɛ kadzembe ghəa mbeli we.

¹⁸ Ama nza mə fare fare, zlama mə keveci keveci yitea wəsə nya tepa 'ya: Zhɛrəzalɛm nya nza farefa mbe ba'a mbeli nyi mbe nyi nza zlama va hɛ.

¹⁹ Katenza 'ya fare fare yitea Zhɛrəzalɛm ba'a katezlama 'ya yitea mbelia ɗa. Katezhɛne mbeli kafa yɛ nehwene keɗema yɛ lewela mbe we.

²⁰ Katezhɛne mbeli kasləyi velɛnjɛ nya kemte, ya wəndə nya kemte kaɗema ŋkɛ kehale mbe we. Ma wəndə nya kemenete va gwəmsə nda mte ŋkɛ ne, kala wəndə nya kemte kawəzege ŋkɛ. Ma wəndə nya kekekavema va gwəmsə ne, kala wəndə nya bezlakɛ mbeli tenza ŋkɛ.

²¹ Kateŋa yɛ ghɛ hɛ ba'a katenza hɛ dzeyi ki hɛ, katemɓe yɛ rɛzɛŋe hɛ ba'a katezeme ya ta nci hɛ.

²² Katezhɛne hɛ kaŋa ghɛ kezha nza kweci mbeli ki hɛ we, katezhɛne hɛ kamɓe yɛ rɛzɛŋe kezha zeme ya ta nci kweci mbeli we. Kwa nza ŋkɛ katenza yɛ hɛa mbelia ɗa kala yɛ hɛa wəfe teghweme. Katefa deme mbeli nyi ntave 'ya te wəshi nyi menete dzeve ta nci.

²³ Katezhɛne hɛ kaleɓe ghə gəmə we, katezhɛne hɛ kaya ŋwale kezha mpə we. Kwa nza ŋkɛ ne, katenza hɛ kahwelefe nya wəpikɛ 'ya, 'ya Mahwətə ba'a katenza ŋwalea nci yitea hɛ.

²⁴ Ma nda teheka ɗa hɛ ne, katezhɛne nda 'ya ke hɛ. Ma tewə hɛ ketekiɗimte geze ghena ne, nahe 'ya ketefate ghena ta nci.

²⁵ Katezeme gwəzə makwagwele ba'a zhɛgwəa təmə zlaɓe, katezeme zhawa nivɛrə kala sla. Katenza hɛɗi kawəsə kezeme ta shishi. Katezhɛne wəsə kwa ndiremi keɗema mene berete kanza pelɛ ghweme ta ɗa nya keveyi geva tekeleke we. 'Ya Mahwətə nde gezete.»